ເຈົ້າໜ້າທີ່ຊີ້ແຈງ ເຫດກຳມະກອນຈີນກໍ່ຄວາມວຸ້ນວາຍຢູ່ຄຳມ່ວນ

ຈາກການເຜີຍແຜ່ພາບເຫດການຄວາມບໍ່ສະຫງົບເມື່ອວັນທີ 30 ມັງກອນ 2022, ຊຶ່ງເຜີຍໃຫ້ເຫັນຄວາມວຸ້ນວາຍຂອງກຳມະກອນຈີນຈຳນວນໜຶ່ງ ແລະ ເຫດການກໍບານປາຍເນື່ອງຈາກກຳມະກອນຫຼາຍຄົນໄດ້ເຂົ້າຍາດຊີງເອົາປືນຈາກເຈົ້າໜ້າທີ່ທະຫານໃນລະຫວ່າງເຂົ້າລະງັບເຫດ; ຕໍ່ສະພາບການດັ່ງກ່າວ, ພັທ ບຸນເລີດ ບຸບຜາວັນ ຮອງຫົວໜ້າກອງບັນຊາການ ປກຊ ແຂວງຄຳມ່ວນ, ພັທ ຄຳຮຸ່ງ ອາລຸນສັກ ຮອງຫົວໜ້າກອງບັນຊາການ ປກສ ແຂວງ ແລະ ພັທ ພູນສຸກ ໄຊສົມບັດ ຮອງຫົວໜ້າຫ້ອງສັນຕິບານ ປກສ ແຂວງ ໄດ້ຊີ້ແຈງວ່າ: ເພື່ອຢຸດຢັ້ງສະຖານະການບໍ່ໃຫ້ຮຸນແຮງໄປກວ່ານີ້, ດັ່ງນັ້ນເຈົ້າໜ້າທີ່ທະຫານທີ່ຮັບຜິດຊອບໃນພື້ນທີ່ຈິ່ງຕັດສິນໃຈຍິງປືນຂຶ້ນຟ້າຫຼາຍນັດເພື່ອຄວບຄຸມເຫດການ.

​​ໃນການຖະແຫຼງດຽວກັນ ໃຫ້ຮູ້ຕື່ມວ່າ: ເຫດການນີ້ເກີດຂຶ້ນເມື່ອເວລາປະມານ 8:30-9:00ໂມງຂອງວັນທີ 30 ມັງກອນ 2022 ຢູ່ບໍລິສັດ ຊີໂນ-ອາກຣີ ໂປຕາສ ຕັ້ງຢູ່ບ້ານດົງໃຕ້ ເມືອງທ່າແຂກ,ຊຶ່ງກໍາມະກອນຊາວຈີນຈຳນວນ 35 ຄົນຂອງບໍລິສັດ ຊິງອ່ານ ອຸດສາຫະກໍາ ຈຳກັດ ທີ່ເປັນບໍລິສັດຮັບເໝົາກໍ່ສ້າງຫໍພັກກຳມະກອນໃຫ້ແກ່ບໍລິສັດ ຊີໂນ-ອາກຣີ ໂປຕາສ ຈຳກັດ. ບໍລິສັດດັ່ງກ່າວໄດ້ເລີ່ມລົງມືກໍ່ສ້າງໃນຕົ້ນປີ 2021 ໂດຍໄດ້ຕົກລົງກັນວ່າ: ພາຍຫຼັງກໍ່ສ້າງສໍາເລັດແລ້ວ, ທາງບໍລິສັດ ຊີໂນ-ອາກຣີ ໂປຕາສ ຈຳກັດ ຈະຈ່າຍຄ່າ ກໍ່ສ້າງໃຫ້ບໍລິສັດ ຊິງອ່ານ ອຸດສາຫະກຳ ໃນຈຳນວນ 85% ຂອງມູນຄ່າການກໍ່ສ້າງທັງໝົດ, ສ່ວນທີ່ເຫຼືອອີກ 15% ແມ່ນຈະຈ່າຍພາຍຫຼັງທີ່ໄດ້ກວດກາໂຄງການແລ້ວ, ແຕ່ຈະຫັກໄວ້ 5% ສຳລັບແຮໄວ້ເພື່ອຮັບປະກັນຄຸນນະພາບຂອງການກໍ່ສ້າງ.

ໂຄງການກໍ່ສ້າງດັ່ງກ່າວໄດ້ສຳເລັດໃນເດືອນພະຈິກ 2021 ແລະ ບໍລິສັດ ຊີໂນ-ອາກຣີ ກໍໄດ້ຈ່າຍມູນຄ່າການກໍ່ສ້າງໃຫ້ແກ່ບໍລິສັດຊິງອ່ານ ແລ້ວ 85% ຕາມການຕົກລົງ; ແຕ່ວ່າທາງບໍລິສັດ ຊິງອ່ານ ຊ້ຳພັດບໍ່ຈ່າຍເງິນເດືອນໃຫ້ກຳມະມະກອນຄົບຕາມຈຳນວນ, ຈິ່ງເຮັດໃຫ້ກໍາມະກອນສັນຊາດຈີນຂອງບໍລິສັດຊິງອ່ານ ພາກັນລວມຕົວກໍ່ເຫດເພາະບໍ່ພໍໃຈຕໍ່ບໍລິສັດຊິງອ່ານ ທີ່ບໍ່ຈ່າຍເງິນເດືອນເປັນຈຳນວນ 2 ເດືອນ (ເດືອນ 11,12 ປີ 2021) ແລະ ເງິນຄ່າເດີນທາງກັບປະເທດ. ເພາະວ່າໃນເບື້ອງຕົ້ນ ບໍລິສັດຊິງອ່ານ ໄດ້ສັນຍາວ່າ ພາຍຫຼັງໂຄງການສຳເລັດ, ກໍຈະຈ່າຍຄ່າເດີນທາງໃຫ້ກຳມະ ກອນກັບຄືນປະເທດຈີນ, ແຕ່ຍ້ອນສະພາບໂຄວິດ-19 ຈິ່ງເຮັດໃຫ້ຄ່າເດີນທາງເພີ່ມຂຶ້ນ ຈາກ 3.000 ຢວນ ມາເປັນປະມານ 5.000 ຢວນຕໍ່ຄົນ, ຈິ່ງເຮັດໃຫ້ບໍລິສັດ ຊິງອ່ານ ບໍ່ສາມາດຈ່າຍໃຫ້ໄດ້ຕາມຄວາມຮຽກຮ້ອງຕ້ອງການຂອງກຳມະກອນ ຊຶ່ງບໍລິສັດສາມາດຈ່າຍໃຫ້ໄດ້ 4.000 ຢວນຕໍ່ຄົນ.

ດັ່ງນັ້ນ, ກຳມະກອນກຸ່ມໜຶ່ງຈິ່ງໄດ້ວາງແຜນຮວມຕົວກັນ ເພື່ອສ້າງສະຖານະການໃຫ້ບໍລິສັດ ຊີໂນ-ອາກຣີ ຮັບຮູ້ຈຸດປະສົງ ແລະ ໃຫ້ບໍລິສັດຊີໂນ-ອາກຣີ ຮຽກຮ້ອງໃຫ້ບໍລິສັດຊິງອ່ານ ຕ້ອງຈ່າຍເງິນເດືອນທີ່ຍັງຄ້າງ ແລະ ຮັບຜິດຊອບຄ່າເດີນທາງໃຫ້ ເພື່ອຈະໄດ້ກັບປະເທດຈີນ ໂດຍການເອົາເຫຼັກມາຕັນທາງເຂົ້າຫໍພັກ. ຄວາມບໍ່ພໍໃຈຂອງກຳມະກອນຈີນ, ຈິ່ງນຳມາສູ່ເຫດການຄວາມບໍ່ສະຫງົບທີ່ບ້ານດົງໃຕ້ ເມືອງທ່າແຂກ ແຂວງຄຳມ່ວນ ຕໍ່ເຫດການດັ່ງກ່າວ ກຳລັງທະຫານທີ່ປະຈຳການປ້ອງກັນຢູ່ບໍລິສັດ, ຈິ່ງໄດ້ເຂົ້າລະງັບເຫດການ ແຕ່ສະຖານະການຍິ່ງຮຸນແຮງຂຶ້ນ ເພາະກຳມະກອນຄົນຈີນຈຳນວນໜຶ່ງໄດ້ໄລ່ຍາດຊີງເອົາປືນຈາກທະຫານ ດັ່ງນັ້ນ, ເພື່ອເປັນການສະກັດກັ້ນບໍ່ໃຫ້ເຫດການທີ່ເກີດຂຶ້ນຮຸງແຮງ ແລະ ບານປາຍ, ທາງເຈົ້າໜ້າທີ່ທະຫານຈິ່ງໄດ້ຍິງປືນຂຶ້ນຟ້າຫຼາຍນັດ ຈິ່ງເຮັດໃຫ້ສະຖານະການຜ່ອນຄາຍລົງ.

แชร์