ແຕ່ງຕັ້ງຮອງເຈົ້າແຂວງຫຼວງພຣະບາງ ເປັນເລຂາຄະນະບໍລິຫານງານ ສຊປລ

ສະຫາຍ ມອນໄຊ ລາວມົວຊົ່ງ ກຳມະການສຳຮອງສູນກາງພັກ ຮອງເຈົ້າແຂວງຫຼວງພຣະບາງ, ໄດ້ຮັບການແຕ່ງຕັ້ງເປັນເລຂາຄະນະບໍລິຫານງານພັກເລຂາຄະນະບໍລິຫານງານ ສຊປລ ຜູ້ໃໝ່; ຂະນະທີ່ ສະຫາຍ ອາລຸນໄຊ ສູນນະລາດ ເລຂາຄະນະບໍລິຫານງານ ສຊປລ ຜູ້ເກົ່າ, ໄດ້ໄປຮັບໜ້າທີ່ໃໝ່ທີ່ຫ້ອງວ່າການສໍານັກງານນາຍົກລັດຖະມົນຕີ ແລະ ສະຫາຍ ບຸນຕາ ເທບພະວົງ ກຳມະການສຳ ຮອງສູນກາງພັກສະມາຊິກສະພາແຫ່ງຊາດຮອງເລຂາຄະນະບໍລິຫານງານ ສຊປລ, ໄດ້ໄປຮັບໜ້າທີ່ໃໝ່ທີ່ສະພາແຫ່ງຊາດ.

 ພິທີມອບ-ຮັບໜ້າທີ່ລະຫວ່າງ ເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ (ສຊປລ) ຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນເມື່ອວັນທີ 2 ກຸມພາ 2022 ທີ່ສູນກາງຊາວໜຸ່ມ, ໂດຍການເຂົ້າຮ່ວມຂອງ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ, ພ້ອມດ້ວຍພະນັກງານການນຳ ສຊປລ ເຂົ້າຮ່ວມ.

ທັງນີ້, ສະຫາຍ ບຸນທອງ ຈິດມະນີ ໄດ້ໃຫ້ທິດຊີ້ນໍາ ເລຂາຄະນະບໍລິຫານງານ ສຊປລ ຜູ້ໃໝ່, ຄະນະເລຂາທິການ, ຄະນະບໍລິຫານງານ ສຊປລ ແລະ ພະນັກງານທີ່ຮັບຜິດຊອບວຽກງານຊາວໜຸ່ມ-ເຍົາວະຊົນໃນຂອບເຂດທົ່ວປະເທດ ຈົ່ງສືບຕໍ່ຄົ້ນຄວ້າຕີລາຄາຜົນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນຊາວໜຸ່ມຄັ້ງທີ VIII, ການປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ, ຂໍ້ແຂ່ງຂັນ 3 ດີ 4 ຮູ້ ຂອງເຍົາວະຊົນທັນວາໃຫ້ຊັດເຈນຈິ່ງຈະສາມາດຮັບຮູ້ວ່າອັນໃດຄວນເສີມຂະຫຍາຍ, ອັນໃດຄວນປັບປຸງແກ້ໄຂໃນຕໍ່ໜ້າ?. ຄຽງຄູ່ກັບການເສີມຂະຫຍາຍມູນເຊື້ອດີງາມ, ເພີ່ມທະວີຄວາມສາມາດໃນການເຕົ້າໂຮມຄວາມສາມັກຄີ ແລະ ຄວາມເປັນເອກະພາບພາຍໃນຄະນະພັກ, ຄະນະເລຂາ ຕໍ່ການຊີ້ນໍາ-ນໍາພາການຈັດຕັ້ງ ແລະ ການເຄື່ອນໄຫວຂອງຊາວໜຸ່ມໃຫ້ໜັກແໜ້ນກ່ວາເກົ່າ. ເພີ່ມທະວີການ ນໍາພາວຽກງານການເມືອງ, ນໍາພາແນວຄິດ ແນໃສ່ຮັບປະກັນໃຫ້ຄະນະພັກແຕ່ລະຂັ້ນ, ສະມາຊິກພັກ-ພະນັກງານມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຮູ້ໃນລະດັບທີ່ແນ່ນອນ. ເອົາໃຈໃສ່ໃນການກໍ່ສ້າງ ແລະ ພັດທະນາຊາວໜຸ່ມໃຫ້ໜັກແໜ້ນເຂັ້ມແຂງ, ກາຍເປັນກຳລັງປະຈັນບານທີ່ຂະຫຍັນຂັນແຂ່ງກຽມພ້ອມຕະລຸມບອນທຸກເວລາ, ທຸກສະຖານທີ່ເມື່ອຊາດຮຽກຮ້ອງ ແລະ ປະຊາຊົນຕ້ອງການ. ເອົາໃຈໃສ່ວຽກງານປັບປຸງການຈັດຕັ້ງໃຫ້ປອດໃສ, ເຂັ້ມແຂງ, ໜັກແໜ້ນໂດຍສຸມໃສ່ປັບປຸງກົງຈັກການຈັດຕັ້ງໃຫ້ກະທັດຮັດແຕ່ສາມາດເສີມຂະຫຍາຍບົດບາດ ແລະ ຈຸດພິເສດຂອງຄະນະຊາວໜຸ່ມປະຊາຊົນ ປະຕິວັດລາວ ໃນໄລຍະໃໝ່, ສາມາດເປັນໃຈກາງໃນການເຕົ້າໂຮມກໍາລັງແຮງສັງລວມຂອງຊາວໜຸ່ມໃນທຸກສາຂາອາຊີບເຂົ້າໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ.

แชร์