ຍີ່ປຸ່ນຊ່ວຍເຫຼືອລາວສ້າງລະບົບແຈ້ງເຕືອນນໍ້າຖ້ວມລ່ວງໜ້າ

ລັດຖະບານຍີ່ປຸ່ນ ໃຫ້ການຊ່ວຍເຫຼືອລັດຖະບານ ສປປ ລາວ ໃນການສ້າງລະບົບແຈ້ງເຕືອນໄພນໍ້າຖ້ວມລ່ວງໜ້າ ໃນ 6 ແຂວງເປົ້າໝາຍ (ຈໍາປາສັກ, ສາລະວັນ, ສະຫວັນນະເຂດ, ເຊກອງ, ອັດຕະປື ແລະຄໍາມ່ວນ) ລວມມູນຄ່າ 1 ຕື້ເຢນ ຫຼື ປະມານ 8,78 ລ້ານໂດລາສະຫະລັດ.

ເມື່ອວັນທີ 2 ກຸມພາ 2022, ທີ່ກະຊວງການຕ່າງປະເທດໄດ້ມີພິທີລົງນາມເອກະສານແລກປ່ຽນເພື່ອຮັບເອົາການຊ່ວຍເຫຼືອລ້ານອກແຜນຂອງລັດຖະບານຍີ່ປຸ່ນ, ຕາງໜ້າລັດຖະບານ ສປປ ລາວ ໂດຍທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດ ແລະ ຕາງໜ້າລັດຖະບານຍີ່ປຸ່ນ ໂດຍທ່ານ ໂຄບາຢາຊິ ເຄນອິຈິ (Mr. KOBAYASHI Kenichi) ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ, ມີພະນັກງານຈາກຂະແໜງການກ່ຽວຂ້ອງຂອງສອງຝ່າຍເຂົ້າຮ່ວມເປັນສັກຂີພິຍານ.

ການຊ່ວຍເຫຼືອຂອງລັດຖະບານຍີ່ປຸ່ນໃນຄັ້ງນີ້, ຈະປະກອບສ່ວນສໍາຄັນໃນການສະໜອງຂໍ້ມູນການພະຍາກອນອາກາດທີ່ຊັດເຈນ ແລະ ການແຈ້ງເຕືອນເພື່ອກະກຽມຮັບມືຢ່າງທັນການໃນ 6 ແຂວງເປົ້າໝາຍ, ທັງຈະເປັນການຊ່ວຍຫຼຸດຜ່ອນຜົນກະທົບ ແລະ ຜົນເສຍຫາຍອັນເນື່ອງມາຈາກໄພທຳມະຊາດ.

ຢ່າງໃດກໍຕາມ, ເມື່ອເດືອນສິງຫາ ແລະ ເດືອນກັນຍາ 2019 ເຂດພາກໃຕ້ຂອງ ສປປ ລາວ ໄດ້ຮັບຜົນກະທົບໜັກຈາກພະຍຸໄຕ້ຝຸ່ນລະດູຮ້ອນສົ່ງຜົນໃຫ້ເກີດຝົນຕົກໜັກ ແລະ ນໍ້າຖ້ວມ, ສ້າງຄວາມເສຍຫາຍຕໍ່ເສດຖະກິດ ແລະ ໂຄງລ່າງພື້ນຖານໃນເຂດປະສົບໄພຢ່າງໜັກໜ່ວງ, ໃນນັ້ນ ຂົວ 97 ແຫ່ງ, ໂຮງຮຽນ 747 ແຫ່ງ, ໂຮງໝໍ ແລະ ສຸກສາລາ 43 ແຫ່ງ, ຖະໜົນ 462 ແຫ່ງເປ່ເພເສຍຫາຍ ແລະ ສູນເສຍສັດລ້ຽງຫຼາຍກວ່າ 275.000 ໂຕ, ລວມມູນຄ່າເສຍຫາຍຫຼາຍກວ່າ 164 ລ້ານໂດລາສະຫະລັດ; ຊຶ່ງບໍ່ພຽງແຕ່ 6 ແຂວງທີ່ໄດ້ຮັບຜົນກະທົບຢ່າງໜັກຈາກໄພພິບັດທາງທຳມະຊາດ, ເພາະຍັງເຮັດໃຫ້ພົນລະເມືອງລາວຢ່າງໜ້ອຍ 153.800 ຄອບຄົວ ຫຼື ປະມານ 765.000 ຄົນ ໄດ້ຮັບຜົນເສຍຫາຍ. ນອກນັ້ນ, ຍັງມີຜູ້ເຄາະຮ້າຍເຖິງຂັ້ນເສຍຊີວິດ 19 ລາຍ, ເຮືອນຊານບ້ານຊ່ອງ ປະມານ 760 ຫຼັງຄາເຮືອນເປ່ເພ.  

แชร์