ສະວີເດນ ຝຶກໂຕກາຫາຂີ້ເຫຍື້ອມາແລກອາຫານ

ການສອນມະນຸດໃຫ້ຮູ້ຈັກຖິ້ມຂີ້ເຫຍື້ອເປັນທີ່ເປັນທາງຖືວ່າຍາກ, ຈາກມູມມອງດັ່ງກ່າວ, ບໍລິສັດເຮັດຄວາມສະອາດ ໂຄວິດ-ຄລີນນິ້ງ ຂອງປະເທດສະວີເດນ, ຈິ່ງທຳການຝຶກໂຕກາໃຫ້ເກັບຂີ້ເຫຍື້ອຕ່ອນເລັກຕ່ອນນ້ອຍທີ່ຖືກຖິ້ມຊະຊາຍຕາມທ້ອງຖະໜົນ, ຊຶ່ງໂຕກາກໍຈະໄດ້ຮັບອາຫານເປັນຄ່າຕອບແທນ.

ຄຣິສຕຽນ ຊາຍຜູ້ກໍ່ຕັ້ງບໍລິສັດ ໂຄວິດ-ຄລີນນິ້ງ, ໄດ້ກ່າວຕໍ່ສື່ວ່າ “ໂຕກາສອນງ່າຍກວ່າທີ່ຄິດ, ໃນຂະນະດຽວກັນ ພວກມັນກໍໄດ້ຮຽນຮູ້ພຶດຕິກຳຂອງກັນ ແລະ ກັນໄປດ້ວຍ; ແຕ່ຂະນະດຽວກັນ, ກໍສັງເກດເຫັນຄວາມສ່ຽງຂອງພວກມັນຈາກການຫຼົງກືນຂີ້ເຫຍື້ອເຂົ້າໄປ”.

ສຳນັກຂ່າວຕ່າງປະເທດ ໄດ້ອ້າງການລາຍງານຂອງ Keep Sweden Tidy Foundation ເມື່ອວັນທີ 1 ກຸມພາ2022 ວ່າ: ຊາວສະວີເດນຈຳນວນໜຶ່ງພາກັນຖິ້ມກິດກອກຢາລົງໃສ່ຖະໜົນຫົນທາງເປັນປະລິມານຫຼາຍກວ່າ 1.000 ລ້ານອັນຕໍ່ປີ ຊຶ່ງນັບເປັນ 62% ຂອງຂີ້ເຫຍື້ອມູນຝອຍທັງໝົດ. ທັງນີ້, ທ່ານ ຄຣິສຕຽນ ໄດ້ໃຫ້ທັດສະນະວ່າ “ແນວຄວາມຄິດຝຶກໂຕກາເກັບຂີ້ເຫຍື້ອ ຈະຊ່ວຍໃຫ້ລັດຖະບານທ້ອງຖິ່ນປະຢັດງົບປະມານໄດ້ກວ່າ 75%”.

ຢ່າງໃດກໍດີ, ໂຕກາຂຶ້ນຊື່ວ່າເປັນໜຶ່ງໃນເຫຼົ່ານົກທີ່ສະຫຼາດທີ່ສຸດໃນໂລກ, ໂດຍນັກວິທະຍາ ສາດໄດ້ລະບຸວ່າ: ພວກມັນສາມາດຈົດຈຳໃບໜ້າໄດ້ດີກວ່າມະນຸດດ້ວຍກັນອີກຊ້ຳ. ນອກນັ້ນ, ໂຕກາຍັງເປັນສັດຊະນິດດຽວທີ່ສາມາດສ້າງເຄື່ອງມືໃໝ່ໄດ້, ຊຶ່ງໂຕກາໄດ້ໃຊ້ງ່າໄມ້ ແລະ ໃບໄມ້ເພື່ອລໍ້ຫຼອກປາໃຫ້ຫຼົງເຂົ້າມາເປັນເຫຍື່ອ. ນອກນັ້ນ, ໂຕກາຍັງສາມາດໃຊ້ງ່າໄມ້ແຍ່ເຂົ້າໄປໃນຜົ້ງທີ່ມັນບໍ່ສາມາດໝົ້ນເຂົ້າໄປໄດ້ ແລະ ນີ້ກໍເຮັດໃຫ້ມົດຕົກເປັນອາຫານຂອງມັນ. ໂດຍນັກວິທະຍາສາດໄດ້ປຽບທຽບຄວາມສະຫຼາດຂອງໂຕກາເທົ່າກັບຄວາມຄິດຂອງເດັກອາຍຸ 7 ຂວບ, ການຄົ້ນຄວ້າຍັງພົບອີກວ່າ: ໂຕກາມີຄວາມອາດສາມາດໃນການໃຊ້ເຫດຜົນເຊີງນາມມະທຳເຂົ້າໃນການແກ້ບັນຫາສັບຊ້ອນ ແລະ ພວກມັນຍັງມີການຕັດສິນໃຈເຮັດສິ່ງໃດສິ່ງໜຶ່ງແບບເປັນກຸ່ມໄດ້ເປັນຢ່າງດີ.

แชร์