ພົບໂຄວິດກາຍພັນຢ່າງໜ້ອຍ 21 ຄັ້ງໃນແມ່ຍິງຕິດເຊື້ອ HIV

ແມ່ຍິງຊາວແອຟຣິກາໃຕ້ໄວ 22 ປີຄົນໜຶ່ງ ຊຶ່ງມີເຊື້ອ HIV ທີ່ບໍ່ໄດ້ຮັບຢາ ແລະຕິດເຊື້ອໂຄວິດ-19 ເປັນເວລາ9ເດືອນ; ແຕ່ໃນໄລຍະເວລາດັ່ງກ່າວ, ເຊື້ອໂຄວິດ-19 ໃນຮ່າງກາຍຂອງນາງໄດ້ມີການກາຍພັນຢ່າງໜ້ອຍ 21 ຄັ້ງ.

ສຳນັກຂ່າວຕ່າງປະເທດໄດ້ລາຍງານເມື່ອວັນທີ 31 ມັງກອນ 2022 ໂດຍອ້າງການສະເໜີຂອງ Bloomberg ທີ່ເຜີຍໃຫ້ຮູ້ຜົນການສຶກສາຂອງທີມນັກວິທະຍາສາດຈາກ Stellenbosch ແລະມະຫາວິທະຍາໄລ KwaZulu-Natal ຊຶ່ງລະບຸວ່າ: ຜູ້ປ່ວຍໂຄວິດ-19 ຄົນນີ້ ມີການກາຍພັນທີ່ໂປຣຕີນໜາມ(spike protein) ຢ່າງໜ້ອຍ10 ຄັ້ງ ແລະພົບກາຍພັນໃນຕຳແໜ່ງ ອື່ນໆ ອີກ11 ຄັ້ງ ຊຶ່ງການກາຍພັນບາງຢ່າງກໍພົບໄດ້ຕະຫຼອດໃນໂຄວິດ-19 ສາຍພັນໂອມິຄຣອນ ແລະແລມບ໌ດາ, ຂະນະທີ່ອີກບາງສ່ວນກໍມີຄວາມສອດຄ່ອງກັບການກາຍພັນທີ່ເຮັດໃຫ້ໄວຣັສສາມາດຫຼົບຫຼີກແອນຕີບໍດີ.

ໃນລາຍງານດັ່ງກ່າວຊີ້ໃຫ້ເຫັນວ່າ: ເມື່ອແມ່ຍິງຄົນນີ້ໄດ້ຮັບຢາຕ້ານໄວຣັສ HIV ຢ່າງເໝາະສົມກໍເຮັດໃຫ້ລະດັບພູມຄຸ້ມກັນຂອງນາງແຂງແຮງຂຶ້ນ ແລະ ສາມາດເອົາຊະນະໂຄວິດ-19ໄດ້ພາຍໃນໄລຍະ 6-9 ອາທິດ. ຊຶ່ງນັກວິທະຍາສາດທີ່ຮ່ວມໃນການສຶກສາຄັ້ງນີ້ກໍໃຫ້ຮູ້ອີກວ່າ ເຄີຍພົບເຄສ (ກໍລະນີ) ດຽວກັນນີ້ມາກ່ອນ, ຊຶ່ງສະແດງໃຫ້ເຫັນເຖິງຄວາມເປັນໄປໄດ້ຂອງເສັ້ນທາງການເກີດໂຄວິດ-19 ສາຍພັນໃໝ່; ແຕ່ກໍຢໍ້າວ່າ “ນີ້ເປັນພຽງສົມມຸດຕິຖານ”.

ຢ່າງໃດກໍຕາມ, ເມື່ອເດືອນມິຖຸນາ ປີຜ່ານມາ ກໍມີລາຍງານຜົນການສຶກສາຊຶ່ງຖືກເຜີຍແຜ່ເທິງເວ໊ບໄຊຕ໌ການແພດ medRxiv ທີ່ລະບຸວ່າ ແມ່ຍິງຊາວແອຟຣິກາໃຕ້ໄວ 36 ປີຄົນໜຶ່ງ ຊຶ່ງມີເຊື້ອ HIV ແລະ ຕິດເຊື້ອໂຄວິດ-19 ເປັນເວລາກ່ວາ 7 ເດືອນ ກໍກວດພົບການກາຍພັນຂອງໂຄວິດ-19ຢ່າງໜ້ອຍ 32 ຄັ້ງ.

ລາຍງານດຽວກັນໃຫ້ຮູ້ຕື່ມວ່າ ແອຟຣິກາໃຕ້ມີສະພາບການລະບາດຂອງ HIV ທີ່ໃຫຍ່ທີ່ສຸດໃນໂລກ, ດ້ວຍຕົວເລກຜູ້ຕິດເຊື້ອ 8,2 ລ້ານຄົນຈາກປະຊາກອນປະມານ 60 ລ້ານຄົນ ແລະນັ້ນກໍເຮັດໃຫ້ພູມຄຸ້ມກັນຂອງປະຊາກອນຈຳນວນຫຼາຍອ່ອນແອລົງ.

แชร์