ລາຄານໍ້າມັນພຸ່ງສູງສຸດໃນຮອບ 7 ປີ

ມີລາຍງານວ່າ ລາຄານໍ້າມັນດິບຊື້ຂາຍລ່ວງໜ້າ ( ວັນທີ 2 ກຸມພາ2022) ພຸ່ງທະລຸ 90ໂດລາສະຫະລັດຕໍ່ບາຣ໌ເຣລ (ຫົວໜ່ວຍວັດແທກຂອງແຫຼວ 1 ບາຣ໌ເຣລເທົ່າກັບ 42 ແກລລອນຫຼື ປະມານ158,97 ລິດ) ນັບເປັນລາຄານໍ້າມັນດິບທີ່ສູງທີ່ສຸດນັບແຕ່ເດືອນຕຸລາ 2014 ເປັນຕົ້ນມາ.

ລາຄານໍ້າມັນທີ່ພຸ່ງສູງ, ປາກົດຂຶ້ນຫຼັງຈາກລາຄານໍ້າມັນດິບ ເວສຕ໌ເທ໊ກຊັສ ສ້າງສະຖິຕິສູງທີ່ສຸດໃນຮອບ 7 ປີ ເມື່ອຕົ້ນເດືອນທີ່ຜ່ານມາ, ໂດຍນັກວິຊາການຊີ້ວ່າ: ເປັນຜົນມາຈາກການຜ່ອນຄາຍຄວາມກັງວົນທີ່ມີຕໍ່ໂຄວິດ-19 ສາຍພັນໂອມິຄຣອນ, ລວມໄປເຖິງຄວາມຕຶງຄຽດທາງການເມືອງລະຫວ່າງປະເທດ.

ທາງດ້ານສະມາຊິກອົງການກຸ່ມປະເທດຜູ້ສົ່ງອອກນໍ້າມັນ ຫຼື ໂອເປຄ ຊຶ່ງນຳໂດຍ ຊາອຸດີອາຣະເບຍ ແລະ ພັນທະມິດອີກ10 ປະເທດ ໃນນັ້ນ ກໍລວມມີທັງຣັສເຊຍ ຫຼືທີ່ຮຽກກັນວ່າ ໂອເປຄພລັສ, ກໍຈະປະຊຸມຫາລືໃນວັນທີ2ກຸມພານີ້,ຜ່ານລະບົບວິດີໂອຄອນເຟີເຣນຊ໌ ເພື່ອພິຈາລະນາວ່າຈະເພີ່ມກຳລັງການຜະລິດຫຼາຍຂຶ້ນຫຼືບໍ່?.

ລາຍງານຂ່າວຕ່າງປະເທດເມື່ອວັນທີ 31 ມັງກອນ 2022 ລະບຸໂດຍອ້າງການວິເຄາະຊຶ່ງກໍມີການຄາດຄະເນວ່າ: ໂອເປຄພລັສ ຈະມີມະຕິໃນທີ່ປະຊຸມໃນການເພີ່ມກຳລັງການຜະລິດຂຶ້ນເປັນ4ແສນບາຣ໌ເຣລຕໍ່ວັນໃນເດືອນມີນາທີ່ຈະມາເຖິງນີ້, ຊຶ່ງນັ້ນກໍຈະເປັນໄປຕາມແຜນການຄ່ອຍໆເພີ່ມກຳລັງການຜະລິດຂຶ້ນນັບຕັ້ງແຕ່ເດືອນພຶດສະພາປີຜ່ານມາ, ຫຼັງຈາກທີ່ກຸ່ມຜູ້ຜະລິດນໍ້າມັນໄດ້ຕັດຫຼຸດກຳລັງການຜະລິດເພື່ອແກ້ບັນຫາລາຄານໍ້າມັນຕົກຕໍ່າຫຼັງເກີດສະພາບໂຄວິດ-19 ລະບາດ. ທັງນີ້, ນັກວິເຄາະຈາກ ແຄປິຕອລອີໂຄໂນມິກສ໌ ກໍໃຫ້ທັດສະນະວ່າ: ຈະບໍ່ສາມາດຕັດຄວາມເປັນໄປໄດ້ທີ່ຈະມີການເພີ່ມກຳລັງການຜະລິດປະລິມານຫຼາຍ,ເນື່ອງຈາກລາຄານໍ້າມັນທີ່ສູງໃນເວລານີ້ບວກກັບກຳລັງການຜະລິດຂອງ ໂອເປຄພລັສ ທີ່ບໍ່ພຽງພໍຕໍ່ຄວາມຕ້ອງການ.

แชร์