ໃນຖານະທີ່ກາເຟກໍເປັນໜຶ່ງໃນຜະລິດຕະພັນກະສິກຳສົ່ງອອກສຳຄັນຂອງ ສປປ ລາວ ຊຶ່ງສ້າງລາຍຮັບໃຫ້ແກ່ປະເທດເກືອບ 100 ລ້ານໂດລາສະຫະລັດຕໍ່ປີ, ຂະນະທີ່ການພັດທະນາຕະຫຼາດບໍລິໂພກກາເຟຢູ່ ສປ ຈີນ ກໍໄດ້ດຶງດູດຜູ້ຜະລິດກາເຟລາວເພື່ອນຳເອົາຜະລິດຕະພັນຂອງຕົນເຂົ້າໄປຂາຍໃນຕະຫຼາດຈີນ. ພ້ອມນັ້ນ, ການເປີດນຳໃຊ້ທາງລົດໄຟ ລາວ-ຈີນ ຢ່າງເປັນທາງການ ກໍຖືເປັນໂອກາດໃຫຍ່ຫຼວງສຳລັບການສົ່ງອອກຜະລິດຕະພັນຕ່າງໆຂອງປະເທດລາວສູ່ປະເທດຈີນ, ຊຶ່ງກາເຟກໍແມ່ນໜຶ່ງໃນສິນຄ້າກະສິກຳອັນດັບຕົ້ນໆ.
ເມື່ອບໍ່ດົນມາມານີ້, ບໍລິສັດກາເຟດາວ ຈຳກັດ ໄດ້ເຊັນບົດບັນທຶກຄວາມເຂົ້າໃຈກັບ ບໍລິສັດຈີນ 2 ແຫ່ງ, ຢູ່ເມືອງປາກເຊ ແຂວງຈຳປາສັກ, ເພື່ອມອບສິດໃຫ້ 2 ບໍລິສັດຈີນຂະຫຍາຍຕະຫຼາດ ແລະ ດຳເນີນການຮ່ວມມືດ້ານການຕະຫຼາດຕ່າງໆ, ທັງເພື່ອໂຄສະນາເຜີຍແຜ່ຍີ່ຫໍ້ກາເຟລາວຢູ່ຕະຫຼາດຈີນ.
ຢ່າງໃດກໍດີ, ທ່ານ ພັນຄຳ ວິພາວັນ ນາຍົກລັດຖະມົນຕີ ສປປ ລາວ ກໍເຄີຍປະກອບຄຳເຫັນໃນກອງປະຊຸມລັດຖະບານຫຼາຍຄັ້ງ, ໂດຍຮຽກຮ້ອງໃຫ້ຊຸກຍູ້ການລ້ຽງງົວພັນຊີ້ນພາຍໃນປະເທດລາວ,ເພາະວ່າການເປີດນຳໃຊ້ທາງລົດໄຟ ລາວ-ຈີນ ໄດ້ເຮັດໃຫ້ການຂົນສົ່ງສິນຄ້າທາງບົກມີຄວາມສະດວກກວ່າເກົ່າ ແລະ ຕົ້ນທຶນໃນການຂົນສົ່ງກໍຕ່ຳລົງ, ຊຶ່ງນີ້ກໍຖືເປັນໂອກາດດີທີ່ສຸດສຳລັບການສົ່ງອອກງົວພັນຊີ້ນ.
ພ້ອມນີ້, ປະເທດລາວກໍໄດ້ຮັບໂຄວ໌ຕາເພື່ອສົ່ງອອກຜະລິດຕະພັນກະສິກຳໄປປະເທດຈີນ ເປັນຕົ້ນແມ່ນ: ງົວພັນຊີ້ນ ແລະ ເຂົ້າສານ. ຊຶ່ງກະຊວງອຸດສາຫະກຳ ແລະ ການຄ້າ, ກະຊວງກະສິກຳ ແລະ ປ່າໄມ້ ຂອງ ສປປ ລາວ ກໍໄດ້ຮ່ວມມືກັນຊຸກຍູ້ໃຫ້ວິສາຫະກິດທີ່ກ່ຽວຂ້ອງ, ໃນການເຊັນສັນຍາສົ່ງອອກຜະລິດຕະພັນກະສິກຳຕ່າງໆໄປປະເທດຈີນເຊັ່ນ: ໝາກຖົ່ວດິນ, ມັນຝຣັ່ງ, ໝາກກ້ວຍ, ໝາກຫຸ່ງ ແລະ ອື່ນໆ. ໃນຂະນະດຽວກັນ, ກໍໄດ້ຮັບໂອກາດເຂົ້າຮ່ວມງານວາງສະແດງສິນຄ້າ ຈີນ-ອາຊຽນ ແລະ ໂອກາດອື່ນໆ ຊຶ່ງຖືເປັນການຊຸກຍູ້ການສົ່ງອອກຜະລິດຕະພັນກະສິກຳໄປສູ່ຕະຫຼາດຈີນ. ມາຮອດປັດຈຸບັນ, ລາວໄດ້ສົ່ງອອກເຂົ້າສານ 30 ພັນໂຕນໄປຈີນ ແລະ ຄາດວ່າຈະສົ່ງອອກໄດ້ສຳເລັດຕາມໂຄວ໌ຕາໃນປີ 2022.
ຢ່າງໃດກໍຕາມ, ການລະບາດຂອງພະຍາດໂຄວິດ-19 ເຮັດໃຫ້ການສົ່ງອອກຜະລິດຕະພັນກະສິກຳຂອງປະເທດລາວປະສົບກັບສິ່ງທ້າທາຍຫຼາຍຢ່າງ; ແຕ່ວ່າການເປີດນຳໃຊ້ທາງລົດໄຟ ລາວ-ຈີນ ກໍໄດ້ເປັນ “ພະລັງຂັບເຄື່ອນໃໝ່” ສຳລັບການພັດທະນາຂະແໜງການກະສິກຳຂອງລາວ. ຊຶ່ງນັບແຕ່ເລີ່ມເປີດນຳໃຊ້ທາງລົດໄຟ ລາວ-ຈີນ ຢ່າງເປັນທາງການໃນວັນທີ 3 ທັນວາປີ 2021 ເປັນຕົ້ນມາ, ການຂົນສົ່ງສິນຄ້າທີ່ນຳໃຊ້ທາງລົດໄຟສາຍນີ້ໄດ້ພັດທະນາຢ່າງວ່ອງໄວ, ມາຮອດວັນທີ 17 ມັງກອນ2022 ຂະບວນລົດໄຟຂົນສົ່ງສິນຄ້າສາກົນຕາມທາງລົດໄຟ ລາວ-ຈີນ ກໍມີເຖິງ 153 ຂະບວນ, ໄດ້ຂົນສົ່ງສິນຄ້າ 59.500 ໂຕນ, ມີມູນຄ່າທັງໝົດ 1,068 ຕື້ຢວນ, ຊຶ່ງໄດ້ເຮັດໃຫ້ການສົ່ງອອກຜະລິດຕະພັນກະສິກຳຂອງລາວສູ່ຕະຫຼາດຈີນມີຄວາມສະດວກຂຶ້ນ. ດັ່ງນັ້ນ, ຈິ່ງເວົ້າໄດ້ວ່າ ທາງລົດໄຟ ລາວ-ຈີນ ໄດ້ສ້າງຜົນປະໂຫຍດໃຫ້ແກ່ປະຊາຊົນສອງຊາດ ລາວ ແລະ ຈີນ, ໂດຍສະເພາະແມ່ນສ້າງເງື່ອນໄຂອຳນວຍຄວາມສະດວກໃຫ້ສິນຄ້າລາວກ້າວສູ່ການສົ່ງອອກຫຼາຍຂຶ້ນນັບມື້.
ນັບແຕ່ເດືອນມັງກອນຫາເດືອນພະຈິກປີ 2021, ຍອດມູນຄ່າການຄ້າລະຫວ່າງລາວ ແລະຈີນ ໄດ້ບັນລຸເຖິງ 3,98 ຕື້ໂດລາສະຫະລັດ ຊຶ່ງໄດ້ບັນລຸການເຕີບໂຕເປັນຕົວເລກບວກ, ໃນນັ້ນ ການຄ້າຜະລິດຕະພັນກະສິກຳ ແມ່ນພາກສ່ວນສຳຄັນໃນການຄ້າລະຫວ່າງສອງຝ່າຍ, ການສົ່ງອອກຜະລິດຕະພັນກະສິກຳບໍ່ພຽງແຕ່ສາມາດເພີ່ມລາຍໄດ້ດ້ານພາສີໃຫ້ແກ່ລັດຖະບານລາວ ແລະ ມີຜົນດີຕໍ່ການພັດທະນາເສດຖະກິດແຫ່ງຊາດເທົ່ານັ້ນ, ຫາກຍັງສາມາດສ້າງໂອກາດປະກອບອາຊີບ ແລະ ເພີ່ມລາຍໄດ້ໃຫ້ປະຊາຊົນລາວນັບມື້ຫຼາຍຂຶ້ນອີກດ້ວຍ.
ຂອບໃຈຂໍ້ມູນ: ເພຈວິເຄາະສະຖານະການ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |