ບໍ່ແກ້ວ ມ້າງກຸ່ມແກ້ງຄ້າຢາເສບຕິດລາຍໃຫຍ່

4 ຜູ້ຖືກຫາພົວພັນຄ້າຂາຍຢາເສບຕິດ ຖືກເຈົ້າໜ້າທີ່ ປກສ ແຂວງບໍ່ແກ້ວ ຈັບໄດ້, ໃນນີ້ ພົບວັດຖຸຂອງກາງຢາບ້ານໍ້າໜັກຫຼາຍກວ່າ 3 ໂຕນ ແລະ ຢາໄອສ໌ເກືອບ 600 ກິໂລກຣາມ ກັບເຮໂຣອິນອີກ 2 ແທ່ງ, ນອກນັ້ນ ຍັງພົບອາວຸດເສິກ, ພາຫະນະ ແລະ ເຄື່ອງມືສື່ສານອີກຈຳນວນໜຶ່ງ.

ອີງຕາມລາຍງານຂອງກຳລັງປ້ອງກັນຄວາມສະຫງົບ ໃນວັນທີ 28 ມັງກອນ 2022 ລະບຸວ່າ: ເວລາປະມານ 17:30 ໂມງ ຂອງວັນທີ 26 ມັງກອນ 2022, ເຈົ້າໜ້າທີ່ຕຳຫຼວດກອງບັນຊາການ ປກສ ແຂວງບໍ່ແກ້ວ, ສາມາດມ້າງຄະດີຢາເສບຕິດໄດ້ 1 ເລື່ອງ ຢູ່ເຂດເທສະບານເມືອງຫ້ວຍຊາຍ,ໃນນັ້ນ ມີການຈັບກຸມຜູ້ຖືກຫາໄດ້ 4 ຄົນຊື່ ທ້າວ ໄຊບໍທໍ່ ອາຍຸ 34 ປີ, ທ້າວ ມົວວາ ອາຍຸ 25 ປີ ທັງສອງຢູ່ບ້ານກິ່ວລົມ ເມືອງປາກທາ, ທ້າວ ລົງວີ ອາຍຸ 26 ປີ, ນາງ ຈຶເຮີ ອາຍຸ 29 ປີ ທັງສອງຢູ່ບ້ານຮົ່ມເຢັນ ເມືອງຕົ້ນເຜິ້ງ.

ໃນປະຕິບັດການຄັ້ງນີ້, ພົບວັດຖຸຂອງກາງຫຼາຍລາຍການເຊັ່ນ: ລົດໃຫຍ່ 4 ຄັນ, ໂທລະສັບ 5 ເຄື່ອງ, ປືນສັ້ນ 1 ກະບອກ, ຢາບ້າ 18.240 ມັດ ເທົ່າກັບ 36.480.000 ເມັດ ນ້ຳໜັກ 3.648 ກິໂລກຣາມ, ຢາໄອສ໌ 590 ກິໂລກຣາມ ແລະ ເຮໂຣອິນ 2 ແຫ່ງ. ຕໍ່ກັບຄະດີດັ່ງກ່າວ, ທາງເຈົ້າໜ້າທີ່ຕໍາຫຼວດກອງບັນຊາການ ປກສ ແຂວງ ພວມດຳເນີນການສືບສວນ-ສອບສວນ.

แชร์