ກຳມະບານ ສະເໜີປັບຂຶ້ນຄ່າແຮງງານຂັ້ນຕໍ່າເປັນ 1,5 ລ້ານກີບ

ອີງໃສ່ຄ່າຄອງຊີບທີ່ຖີບຕົວສູງຂຶ້ນຕາມສະພາບເສດຖະກິດ-ການເງິນ ເຫັນເຖິງຄວາມຈຳເປັບດັ່ງກ່າວ, ສູນກາງສະຫະພັນກຳມະບານລາວຈິ່ງໄດ້ສະເໜີໃຫ້ປັບຄ່າແຮງງານຂັ້ນຕໍ່າຈາກ 1.100.000 ກີບ ຂຶ້ນເປັນ 1.500.000 ກີບຕໍ່ຄົນຕໍ່ເດືອນ.

ໂດຍທ່ານ ພອນສານ ວິໄລເມັ້ງ ຮອງປະທານຄະນະບໍລິຫານງານສູນກາງສະຫະພັນກໍາມະບານລາວ, ໃຫ້ສໍາພາດຕໍ່ສື່ເມື່ອວັນທີ 26 ມັງກອນ 2022 ວ່າ: ຄ່າແຮງງານຂັ້ນຕໍ່າຢູ່ລາວໃນປັດຈຸ ບັນແມ່ນ 1.100.000 ກີບຕໍ່ຄົນຕໍ່ເດືອນ, ໂດຍເລີ່ມປະຕິບັດນັບແຕ່ກາງປີ 2018 ເປັນຕົ້ນມາ ຊຶ່ງນັບເປັນເວລາກວ່າ 3 ປີແລ້ວ; ແຕ່ເມື່ອເບິ່ງສະພາບເສດຖະກິດໃນປັດຈຸບັນ ທີ່ຍູ້ດັນລາຄາສິນຄ້າ ແລະ ຄ່າໃຊ້ຈ່າຍຕ່າງໆສູງຂຶ້ນນັບມື້, ຊຶ່ງມັນໄດ້ກະທົບຕໍ່ການດໍາລົງຊີວິດປະຈໍາວັນຂອງກໍາມະກອນ ແລະ ຜູ້ອອກແຮງງານຈຳນວນຫຼາຍໃນ 18 ແຂວງທົ່ວປະເທດ ທີ່ກວມເອົາຂົງເຂດກະສິກໍາ, ອຸດສາຫະກຳ, ບໍລິການ ແລະ ກໍ່ສ້າງ ຊຶ່ງຕ້ອງແບກຮັບຄ່າໃຊ້ຈ່າຍໜັກຂຶ້ນເມື່ອທຽບກັບລາຍໄດ້ຈາກຄ່າແຮງງານ; ຕໍ່ກັບບັນຫາດັ່ງກ່າວ, ຄະນະກໍາມະການ 3 ຝ່າຍຄື: ສູນກາງສະຫະພັນກໍາມະບານລາວ, ກະຊວງແຮງງານ ແລະ ສະຫວັດດີການສັງຄົມ ແລະ ສະພາການຄ້າ ແລະ ອຸດສາຫະກໍາແຫ່ງຊາດລາວ ຈິ່ງໄດ້ປຶກສາຫາລືຮ່ວມກັນຫຼາຍຄັ້ງ ແລະ ເຫັນດີໂດຍພື້ນຖານໃຫ້ປັບຂຶ້ນຄ່າແຮງງານຂັ້ນຕໍ່າຕື່ມອີກ.

ຢ່າງໃດກໍຕາມ, ເນື່ອງຈາກບັນດາຫົວໜ່ວຍທຸລະກິດ ກໍຄືຜູ້ໃຊ້ແຮງງານໃນທົ່ວປະເທດ ພວມພົບຄວາມຫຍຸ້ງຍາກຈາກສະພາບລະບາດຂອງພະຍາດໂຄວິດ-19, ອາດເຮັດໃຫ້ບາງຫົວໜ່ວຍແຮງງານຍັງບໍ່ສາມາດປັບຂຶ້ນຄ່າແຮງງານຂັ້ນຕໍ່າ. ແຕ່ອີງໃສ່ສະພາບເສດຖະກິດຕົວຈິງ, ກໍເລັ່ງໃຫ້ຕ້ອງໄດ້ປັບຂຶ້ນແນ່ນອນ; ແຕ່ຈະປັບຂຶ້ນໃນລະດັບໃດກໍຕ້ອງລໍຖ້າການຕົກລົງຮ່ວມກັນໃນກອງປະຊຸມຄະນະກໍາມະການ 3 ຝ່າຍ, ຊຶ່ງຫຼັງຈາກຈາກກອງປະຊຸມຄັ້ງນີ້ກໍຈະໄດ້ສະເໜີຂໍອະນຸມັດຈາກລັດຖະບານເພື່ອຈັດຕັ້ງປະຕິບັດຕົວຈິງຕາມທີ່ 3 ຝ່າຍໄດ້ຕົກລົງກັນ.

ທັງນີ້, ສປປ ລາວ ໄດ້ປັບຂຶ້ນຄ່າແຮງງານຂັ້ນຕໍ່າ ມາແລ້ວ 8 ຄັ້ງ, ໂດຍຄັ້ງຫຼ້າສຸດແມ່ນປັບຂຶ້ນຈາກ 900.000 ກີບ ເປັນ 1.100.000 ກີບ, ຊຶ່ງເລີ່ມປະຕິບັດແຕ່ວັນທີ 1 ພຶດສະພາ ປີ 2018 ຈົນຮອດປັດຈຸບັນ.

แชร์