ຈຳ​ປາ​ສັກ ຈະເລັ່ງແກ້ຂອດໃຫຍ່ໃນຂະແໜງການເງິນ

ຂອດໃຫຍ່ໃນທີ່ນີ້ໝາຍເຖິງບັນຫາຫຍຸ້ງຍາກຕໍ່ການຈັດເກັບລາຍຮັບ, ຊຶ່ງບັນຫາຫຼັກກໍແມ່ນວຽກງານຕ້ານການຮົ່ວໄຫຼຂອງງົບປະມານທີ່ແກ່ຍາວ ແລະບໍ່ໄດ້ຮັບການແກ້ໄຂອັນໄດ້ສົ່ງຜົນເສຍຫາຍມະຫາສານໃຫ້ແກ່ລັດຖະບານກໍຄືແຂວງຈຳປາສັກ.

ປະເດັນດັ່ງກ່າວຖືກຍົກຂຶ້ນຫາລືໃນ​ກອງ​ປະ​ຊຸມເຜີຍແຜ່ວາລະແຫ່ງຊາດຕິດພັນກັບຂະແໜງການເງິນ, ຊຶ່ງຈັດຂຶ້ນທີ່ສະໂມສອນແຂວງ​ຈຳ​ປາ​ສັກ ເມື່ອວັນທີ 26 ມັງກອນ 2022, ໂດຍການເປັນປະທານຮ່ວມຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ແລະ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ມີການນຳເມືອງ, ນະຄອນ ແລະຂະ​ແໜງ​ການ​ກ່ຽວ​ຂ້ອງເຂົ້າຮ່ວມ.

ຈຸດປະສົງກໍເພື່ອເລັ່ງໃສ່ການປະເມີນຜົນການຈັດຕັ້ງປະຕິບັດວາລະແຫ່ງຊາດທີ່ຕິດພັນກັບຂະແໜງການເງິນ, ໂດຍສະເພາະກໍແມ່ນການຈັດຕັ້ງປະຕິບັດການປ້ອງກັນ ແລະ ແກ້ໄຂບັນຫາຫຍຸ້ງຍາກທາງດ້ານເສດຖະກິດ-ການເງິນ, ຊຶ່ງກອງປະຊຸມໄດ້ຍົກໃຫ້ເຫັນ 4 ຂອດໃຫຍ່ທີ່ເປັນບັນຫາລວມໃນຂອບເຂດທົ່ວປະເທດ. ໃນນັ້ນ, ແມ່ນຂອດການນຳເຂົ້ານໍ້າມັນເຊື້ອໄຟ, ການນຳເຂົ້າສິນຄ້າອຸປະໂພກ-ບໍລິໂພກ ລວມທັງບັນຫາພາຫະນະ, ອາໄຫຼ່ບໍ່ຖືກຕ້ອງ,ການຮົ່ວໄຫຼໃນຂົງເຂດບັນຊີ (ການຖືສອງບັນຊີ) ແລະ ບັນຫາກົງຈັກການຈັດຕັ້ງການແບ່ງຂັ້ນຄຸ້ມຄອງ.

ເພື່ອປະສິດທິພາບໃນການຈັດຕັ້ງປະຕິບັດວາລະແຫ່ງຊາດທີ່ຕິດພັນຂະແໜງການເງິນ,  ດັ່ງນັ້ນທີ່ປະຊຸມຈິ່ງໄດ້ເຜີຍແຜ່ຄຳສັ່ງເລກທີ 01 ຂອງກົມການເມືອງສູນກາງພັກ ວ່າດ້ວຍການເພີ່ມທະວີການນຳພາ ຊີ້ນຳຄຸ້ມຄອງຂອງຄະນະພັກແຕ່ລະຂັ້ນ, ຄຳສັ່ງຂອງນາຍົກລັດຖະມົນຕີ ສະບັບເລກທີ 18/ນຍ ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງງົບປະມານແຫ່ງລັດ ແລະ ເອກະສານທີ່ຕິດພັນກັບວາລະແຫ່ງຊາດ, ຄຳສັ່ງນາຍົກລັດຖະມົນຕີ ເລກທີ 20/ນຍ ແລະ ຄຳແນະນຳຂອງກະຊວງການເງິນ ທີ່ຕິດພັນກັບວຽກງານການເງິນໂດຍສະເພາະ.

แชร์