ລາວ-ຈີນ ແລກປ່ຽນບົດຮຽນລຶບລ້າງທຸກຍາກ ຜ່ານຮູບເງົາລະຄອນເວທີ

ໂດຍຄະນະໂຄສະອົບຮົມສູນກາງພັກ ປປ ລາວ, ຄະນະພົວພັນຕ່າງປະເທດສູນກາງພັກ ປປ ລາວ ພ້ອມດ້ວຍ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຫ່ງ ສປປ ລາວ ສົມທົບກັບ ຄະນະພັກແຂວງຫູນານ ຮ່ວມກັນຈັດສາຍຮູບເງົາລະຄອນເວທີການແກ້ໄຂຄວາມທຸກຍາກ “ເພງສັນລະເສີນແຜ່ນດິນ” (ຕ້າຕີ້ຊົງເກີ) ແລະ ພິທີມອບ-ຮັບເຄື່ອງຊ່ວຍເຫຼືອຕ້ານພະຍາດໂຄວິດ-19 ຜ່ານລະບົບວິດີໂອທາງໄກ, ວາລະດັ່ງກ່າວຈັດຂຶ້ນເມື່ອວັນທີ 26 ມັງກອນ 2022 ທີ່ນະຄອນຫຼວງວຽງຈັນ, ສປປ ລາວ ແລະ ທີ່ນະຄອນສາງຊາ, ແຂວງຫູນານ, ສປ ຈີນ.

ເຂົ້າຮ່ວມໃນພິທີທີ່ນະຄອນຫຼວງວຽງຈັນ ໂດຍສະຫາຍ ກິແກ້ວ ໄຂຄໍາພິທູນ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຫົວໜ້າຄະນະສະເພາະກິດເພື່ອຕ້ານ, ສະກັດກັ້ນ ແລະ ແກ້ໄຂການແພ່ລະບາດຂອງພະຍາດໂຄວິດ-19 ຂັ້ນສູນກາງ, ສະຫາຍ ລາວປາວຊົ່ງ ນະວົງໄຊ, ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ສະຫາຍ ຈຽງ ຈ່າຍຕົງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ ແລະ ບັນດາແຂກຖືກເຊີນ, ທັງນີ້ ຍັງມີສະຫາຍເອກອັກຄະລັດຖະທູດ ແຫ່ງ ສປປ ລາວ ປະຈໍາ ສປ ຈີນ, ສະຖານກົງສຸນໃຫຍ່ ແຫ່ງ ສປປ ລາວ ປະຈໍາ ນະຄອນສາງຊາ ແຂວງຫູນານ, ບັນດາການນຳຂອງນະຄອນຫຼວງວຽງຈັນ, ແຂວງສະຫວັນນະເຂດ, ອຸດົມໄຊ ແລະ ຫຼວງພຣະບາງ ທີ່ເປັນແຂວງແຮກສ່ຽວກັບແຂວງຫູນານ ເຂົ້າຮ່ວມຜ່ານວິດີໂອທາງໄກອີກດ້ວຍ.

ສະຫາຍ ລາວປາວຊົ່ງ ນະວົງໄຊ, ໄດ້ທິຄໍາເຫັນຕໍ່ພິທີວ່າ “ແຂວງຫູນານ ໄດ້ກາຍເປັນຕົວແບບໂດດເດັ່ນແຫ່ງໜຶ່ງໃນທົ່ວປະເທດຈີນ, ໂດຍສະເພາະແມ່ນການລຶບລ້າງຄວາມທຸກຍາກຢູ່ບ້ານ 18 ຖໍ້າ ທີ່ສະຫາຍເລຂາທິການໃຫຍ່, ປະທານປະເທດ ສີ ຈິ້ນຜິງ ເຄີຍຊີ້ນໍາ-ນໍາພາໂດຍກົງ ແລະ ສະຫາຍ ບຸນຍັງ ວໍລະຈິດ, ອະດີດເລຂາທິການໃຫຍ່, ອະດີດປະທານປະເທດ ແຫ່ງ ສປປ ລາວ ກໍໄດ້ໄປຢ້ຽມຢາມບ້ານດັ່ງກ່າວເມື່ອປີ 2013. ການຖ່າຍທອດສົດຜົນສໍາເລັດດັ່ງກ່າວ ຜ່ານຮູບເງົາລະຄອນເວທີ ຢູ່ ສປປ ລາວ ໃນຄັ້ງນີ້, ຖືເປັນບົດຮຽນອັນປະເສີດໃຫ້ແກ່ພັກ, ລັດຖະບານ ແລະ ປະຊາຊົນລາວ ທີ່ພວມສູ້ຊົນແກ້ໄຂຄວາມທຸກຍາກໃຫ້ແກ່ປະຊາຊົນ, ຊຶ່ງເປັນວຽກໃນບຸລິມະສິດໜຶ່ງ ຂອງພັກ ແລະ ລັດຖະບານ ແຫ່ງ ສປປ ລາວ; ສຳລັບການແລກປ່ຽນບົດຮຽນໃນວຽກງານດັ່ງກ່າວ ລະຫວ່າງ ສປປ ລາວ ແລະ ສປ ຈີນ ກໍຄືກັບແຂວງຫູນານ, ຖືເປັນການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນອັນເປັນມູນເຊື້ອແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ກໍຄື ການສ້າງຄູ່ຮ່ວມຊາຕາກໍາ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ກໍຄື ລະຫວ່າງ ສປປ ລາວ ກັບ ແຂວງຫູນານ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.

ໃນວາລະດັ່ງກ່າວ, ສະຫາຍ ຈຽງ ຈ່າຍຕົງ ກໍໄດ້ຕາງໜ້າຄະນະພັກແຂວງຫູນານ ມອບອຸປະກອນການແພດ ມູນຄ່າ 1 ລ້ານຢວນ ໃຫ້ແກ່ ສປປ ລາວ ເພື່ອນຳໃຊ້ເຂົ້າໃນວຽກງານຕ້ານ, ສະກັດກັ້ນ ແລະ ແກ້ໄຂການແພ່ລະບາດຂອງພະຍາດໂຄວິດ-19.

แชร์