ໃຜຈູດກະໂພກ ຕ້ອງໂທດປັບໃໝສູງສຸດ 5 ລ້ານກີບ

​ນະຄອນຫຼວງວຽງຈັນ, ສັ່ງຫ້າມເດັດຂາດ ບໍ່ໃຫ້ຜະລິດ, ນຳເຂົ້າ, ຊື້-ຂາຍ, ມີໄວ້ຄອບຄອງ ແລະ ຈູດໝາກກະໂພກ, ບັ້ງໄຟດອກ ແລະ ໂຄມໄຟລອຍຟ້າ ໂດຍບໍ່ໄດ້ຮັບປະນຸຍາດຈາກກອງບັນຊາການ ປກສ-ປກຊ ນະຄອນຫຼວງວຽງຈັນ; ຖ້າບຸກຄົນ, ນິຕິບຸກຄົນ ຫຼື ອົງການຈັດຕັ້ງໃດລະເມີດ ແມ່ນໃຫ້ເຈົ້າໜ້າທີ່ ປກສ-ປກຊ, ພາສີ ແລະ ຂະແໜງການຄ້າ ແຕ່ລະຂັ້ນຢຶດ, ທັງປັບໃໝ ແລະ ດຳເນີນຄະດີຕາມກົດໝາຍຢ່າງເຂັ້ມງວດ.

​ໂດຍເຈົ້າຄອງນະຄອນຫຼວງວຽງຈັນ, ມີຄຳສັ່ງສະບັບເລກທີ 01/ຈນວ, ລົງວັນທີ 27 ມັງກອນ 2022 ວ່າດ້ວຍການຫ້າມຜະລິດ, ນຳເຂົ້າ, ຂົນສົ່ງ, ຊື້-ຂາຍ, ມີໄວ້ຄອບຄອງ, ຈູດໝາກກະໂພກ, ບັ້ງໄຟດອກ ແລະ ໂຄມໄຟລອຍຟ້າ. ຊຶ່ງລະບຸເຖິງກອງບັນຊາການ ປກສ-ປກສ ນະຄອນຫຼວງວຽງຈັນ, ຫົວໜ້າພະແນກອຸດສາຫະກຳ ແລະ ການຄ້າ ນວ, ເຈົ້າເມືອງ 9 ຕົວເມືອງ, ຫົວໜ້າພາສີປະຈຳ ນວ, ລວມທັງບຸກຄົນ, ນິຕິບຸກຄົນ ແລະ ການຈັດຕັ້ງພາຍໃນ ແລະ ຕ່າງປະເທດທີ່ດຳລົງຊີວິດ ແລະ ເຄື່ອນໄຫວຢູານະຄອນຫຼວງວຽງຈັນ. ຊຶ່ງຄຳສັ່ງດັ່ງກ່າວ, ແມ່ນອີງຕາມກົດໝາຍວ່າດ້ວຍການປົກຄອງທ້ອງຖິ່ນ ສະບັບເລກທີ 68/ສພຊ, ລົງວັນທີ 14 ທັນວາ 2015 ວ່າດ້ວຍພາລະບົດບາດ, ສິດ ແລະ ໜ້າທີ່ຂອງເຈົ້າແຂວງ, ເຈົ້າຄອງນະຄອນຫຼວງ; ອີງຕາມຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ສະບັບເລກທີ 620/ຈນວ, ລົງວັນທີ 29 ກັນຍາ 2020 ວ່າດ້ວຍການຄວບຄຸມສຽງເນືອງນັນ ຢູ່ນະຄອນຫຼວງວຽງຈັນ ແລະ ອີງຕາມການຊີ້ນຳຂອງກອງປະຊຸມ ເລຂາ-ຮອງເລຂາຄະນະນພັກນະຄອນຫຼວງວຽງຈັນ ຄັ້ງວັນທີ 10 ມັງກອນ 2022 ທັງນີ້, ເພື່ອຮັກສາຄວາມສະຫງົບ, ຄວາມປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ.

​ສຳລັບອັດຕາການປັບໃໝ, ຜູ້ທີ່ມີໝາກກະໂພກ, ບັ້ງໄຟດອກ ແລະ ໂຄມໄຟລອຍຟ້າ ຂະໜາດ/ນໍ້າໜັກ 1 ກິໂລກຣາມລົງມາ ປັບໃໝ 5 ແສນກີບ; ໝາກກະໂພກ , ບັ້ງໄຟດອກ ແລະ ໂຄມໄຟລອຍຟ້າທີ່ມີຂະໜາດ/ນໍ້າໜັກ 1 ກິໂລກຣາມຂຶ້ນໄປ ປັບໃໝກິໂລກຣາມລະ 5 ແສນກີບ; ສ່ວນຜູ້ທີ່ຈູດຈະຖືກປັບໃໝແຕ່ 5 ແສນ-5 ລ້ານກີບ.

แชร์