ແອບອ້າງເປັນທະຫານ ສ້າງພາບຕົວະເອົາເງິນກວ່າ 300 ລ້ານ

ອີກໜຶ່ງລາຍຄະດີທີ່ສ້າງຄວາມເສຍຫາຍໃຫ້ແກ່ຄົນທີ່ຫຼົງເຊື່ອ ແລະຫວັງໄດ້ບັນຈຸເປັນເຈົ້າໜ້າທີ່ທາງລັດ, ຊຶ່ງຜູ້ຫຼອກລວງກໍຈັດໜັກໃສ່ເຄື່ອງແບບຕິດຊັ້ນນາຍພັນ ພ້ອມຫັນມາຕັ້ງນາມສະກຸນເພື່ອໃຫ້ບາງກຸ່ມຄົນເຊື່ອຖືຈົນຍອມວາງເງິນໃສ່ມື; ສຸດທ້າຍກໍນໍາໄປສູ່ຄວາມເສຍຫາຍທັງຊັບສິນ ແລະຄວາມຮູ້ສຶກ, ເມື່ອຄິດໄດ້ເລື່ອງນີ້ກໍເຖິງຕຳຫຼວດເພື່ອຂໍຮ້ອງໃຫ້ດຳເນີນການທາງກົດໝາຍຕໍ່ຜູ້ກະທຳຜິດ.

ອີງຕາມລາຍງານຂອງ ປກສ ນວ ເມື່ອວັນທີ 26 ມັງກອນ 2022 ລະບຸວ່າ: ພະແນກສືບສວນ-ສອບສວນ ຄະດີອາຍາ, ຫ້ອງຕໍາຫຼວດກອງບັນຊາການປ້ອງກັນຄວາມສະຫງົບນະຄອນຫຼວງວຽງຈັນ (ປກສ ນວ) ໄດ້ສົມທົບກັບກົມສືບຂ່າວກະຊວງປ້ອງກັນປະເທດ ແລະພາກສ່ວນທີ່ກ່ຽວຂ້ອງ, ດຳເນີນການສືບຄົ້ນຫາບຸກຄົນແອບອ້າງເປັນເຈົ້າໜ້າທີ່ທະຫານ, ຈິ່ງສາມາດກັກຕົວທ້າວ ຄໍາແພງ ຄົງຄະນິດ ຢູ່ບ້ານຄູນແກ້ວ ເມືອງຄູນຄຳ ແຂວງຄຳມ່ວນ, ເມື່ອວັນທີ 31 ທັນວາ 2021 ພ້ອມຂອງກາງຊຸດເຄື່ອງແບບນາຍທະຫານ ແລະປືນສັ້ນ CZ 1 ກະບອກ ພ້ອມລູກປືນ 125 ລູກ, ຈາກນັ້ນກໍໄດ້ນໍາຕົວຜູ້ກ່ຽວຂຶ້ນມາດໍາເນີນຄະດີຢູ່ນະຄອນຫຼວງວຽງຈັນ.

ຜ່ານການສອບສວນຂອງເຈົ້າໜ້າທີ່ ປກສ ນວ; ທ້າວ ຄຳແພງ ຄົງຄະນິດ ແມ່ນພັກເຊົາຢູ່ບ້ານດອນແດງ ເມືອງຈັນທະບູລີ ນະຄອນຫຼວງວຽງຈັນ, ຊຶ່ງຮັບສາລະພາບວ່າ: ຕົນເອງໄດ້ແອບອ້າງເປັນເຈົ້າໜ້າທີ່ທະຫານ, ດ້ວຍວິທີການສວມໃສ່ຊຸດເຄື່ອງແບບນາຍທະຫານຊຶ່ງການເຄື່ອນໄຫວດັ່ງກ່າວແມ່ນເລີ່ມແຕ່ຕົ້ນປີ 2021, ພ້ອມນັ້ນຍັງຕິດຊັ້ນນາຍພັນຕີ ແລະປ່ຽນນາມສະກຸນ ເພື່ອໃຊ້ແອບອ້າງໃຫ້ຄົນຫຼົງເຊື່ອ ແລະຫາຜົນປະໂຫຍດເຂົ້າຕົວ, ດ້ວຍການໃຊ້ເລ່ຫຼ່ຽມຕົວະຍົວະຫຼອກລວງວ່າຕົນເອງມີຄວາມສາມາດແລ່ນເອົາຄົນເຂົ້າເປັນທະຫານໄດ້, ເຮັດໃຫ້ມີ 3 ຄົນຫຼົງເຊື່ອ ແລະຈ່າຍເງິນວິ້ງເຕັ້ນເປັນມູນຄ່າເສຍຫາຍ 300.000.000 ກວ່າລ້ານກີບ.

ທັງນີ້, ກອງບັນຊາການ ປກສ ນວ ຂໍແຈ້ງມາຍັງປະຊາຊົນໃນທົ່ວສັງຄົມ, ຫາກໃຜເຄີຍຖືກທ້າວ ຄຳແພງ ຄົງຄະນິດ ຕົວະຍົວະຫຼອກລວງ, ກໍໃຫ້ເຂົ້າແຈ້ງຄວາມເພີ່ມຕື່ມໄດ້ທີ່ ພະແນກສືບສວນ-ສອບສວນ ຫ້ອງຕຳຫຼວດກອງບັນຊາການ ປກສ ນວ ຕາມໂມງລັດຖະການ. ປັດຈຸບັນ, ຄະດີດັ່ງກ່າວເຈົ້າໜ້າທີ່ກໍາລັງເລັ່ງສຶບສວນ-ສອບສວນ ຂະຫຍາຍຜົນຫາຜູ້ຮ່ວມຂະບວນການມາດຳເນີນຄະດີຕາມກົດໝາຍ.

แชร์