114 ຄອບຄົວທີ່ຖືກຍົກຍ້າຍຈາກໄຟຟ້າຫົງສາ ກຽມຂຶ້ນເຮືອນໃໝ່

ສຳເລັດຮຽບຮ້ອຍແລ້ວ, ໂຄງການກໍ່ສ້າງເຮືອນ 136 ຫຼັງ ພ້ອມມີລະບົບໄຟຟ້າ, ນໍ້າໃຊ້, ຖະໜົນ ແລະລະບົບລະບາຍນໍ້າໃນບ້ານ, ມີໂຮງຮຽນອະນຸບານ, ໂຮງຮຽນປະຖົມ, ຫ້ອງການບ້ານ, ຕະຫຼາດ ແລະ ສຸກສາລາ ຊຶ່ງຖືວ່າເປັນການຕອບສະໜອງພື້ນຖານໂຄງລ່າງຄົບຊຸດ ສໍາລັບ 114ຄອບຄົວ ທີ່ຍົກຍ້າຍຈາກ ບ້ານກີ່ວງີ້ວ.

ໃນວັນທີ 26 ມັງກອນ 2022, ທ່ານ ນາງ ສຸລານີ ພູສຸວັນ ຮອງຜູ້ອໍານວຍການຝ່າຍພັດທະນາສັງຄົມ, ທ່ານ ຄົງເດດ ຊົມພູທອນ ຜູ້ຈັດການໂຄງການຂະຫຍາຍສາຍພານລໍາລຽງຖ່ານຫີນ, ທ່ານ ແກ້ວດວງສອນ ສີຫາລາດ ຜູ້ຈັດການພະແນກພັດທະນາສັງຄົມ ແລະ ທ່ານ ສຸລະໄຊ ປະດິດໄຊສະກຸນ ຜູ້ຈັດການພະແນກທຸລະການ, ໄດ້ເປັນຕົວແທນ ບໍລິສັດ ໄຟຟ້າ ຫົງສາ ຈໍາກັດ ເຂົ້າຮ່ວມພິທີ ມອບ-ຮັບ ບ້ານຈັດສັນໃໝ່ ສໍາລັບຜູ້ຖືກຍົກຍ້າຍ ບ້ານກີ່ວງີ້ວ ເມືອງເງິນ ແຂວງໄຊຍະບູລີ ທີ່ຫ້ອງການບ້ານຈັດສັນໃໝ່ ເພື່ອກຽມການຍົກຍ້າຍ.

ທັງນີ້, ໄດ້ມີພິທີທາງປະເພນີທີ່ບ້ານເກົ່າ ແລະ ບ້ານຈັດສັນໃໝ່ ຕາມຮີດຄອງຂອງພີ່ນ້ອງເຜົ່າມົ້ງລາວ, ພ້ອມທັງອະນາໄມ ແລະ ກະກຽມການຍົກຍ້າຍຊຶ່ງຈະເລີ່ມຂຶ້ນໃນວັນທີ 1 ກຸມພາ 2022ເປັນຕົ້ນໄປ ແລະ ຄາດວ່າຈະສໍາເລັດໃນກາງເດືອນກຸມພານີ້.

ໃຫ້ກຽດເປັນປະທານໃນພິທີໂດຍ ທ່ານ ທະວີສັກ ໄຊຍະວົງ ເຈົ້າເມືອງໆເງິນ, ມີຫົວໜ້າຫ້ອງການຍົກຍ້າຍຈັດສັນ (RLMU), ເຈົ້າໜ້າທີ່ກ່ຽວຂ້ອງ ແລະປະຊາຊົນບ້ານກີ່ວງີ້ວ, ບ້ານປາງບົງ, ບ້ານປຸ່ງຝາດ ແລະບ້ານບໍ່ຫຼວງ ຈໍານວນ 100 ກວ່າຄົນ ເຂົ້າຮ່ວມເປັນສັກຂີພິຍານ.

• 27/01/2022