ກະຊວງການເງິນ ແລະສະຫວັນນະເຂດ ຮ່ວມຫາລືເລື່ອງຜັນຂະຫຍາຍວາລະແຫ່ງຊາດ

ກະຊວງການເງິນ ແລະ ແຂວງສະຫວັນນະເຂດ, ໄດ້ພ້ອມກັນຄົ້ນຄວ້າ, ລົງເລິກວຽກງານເສດຖະກິດ-ການເງິນ ໂດຍເນັ້ນໃສ່ຄວາມຮັບຜິດຊອບຂອງທຸກຂະແໜງການ ເພື່ອພ້ອມໃຈກັນເຂົ້າຮ່ວມຕາມພາລະບົດບາດ ແລະມີສ່ວນຮ່ວມໃນການແກ້ໄຂບັນຫາ; ຊຶ່ງການຍົກລະດັບການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ເປັນວາລະແຫ່ງຊາດ, ແມ່ນຊີ້ໃຫ້ເຫັນການຕັດສິນໃຈໃນການແກ້ບັນຫາທີ່ເຄັ່ງຮ້ອນຂອງລັດຖະບານ, ທີ່ຈະຕ້ອງສຸມໃສ່ແກ້ຂໍ້ຄົງຄ້າງຢ່າງຈິງຈັງ ແລະເປັນລະບົບ.

ໃນໂອກາດທີ່ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ພ້ອມຄະນະໄດ້ເຄື່ອນໄຫວຊີ້ນຳວຽກງານການເງິນຢູ່ແຂວງສະຫວັນນະເຂດ ເມື່ອບໍ່ດົນມານີ້, ໂດຍການຕ້ອນຮັບຂອງ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ໃນວາລະດັ່ງກ່າວກໍໄດ້ຈັດເວທີປຶກສາຫາລືທີ່ຫໍວັດທະນະທຳໄກສອນພົມວິຫານ.

ໂດຍເຈົ້າແຂວງສະຫວັນນະເຂດ, ໄດ້ລາຍງານໃຫ້ທັງຄະນະຊາບກ່ຽວກັບບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ຊຶ່ງເປັນບັນຫາທີ່ສະສົມມາຢ່າງຍາວນານທີ່ບໍ່ທັນໄດ້ຮັບການແກ້ໄຂ, ເປັນຕົ້ນແມ່ນບັນຫາໜີ້ສິນສາທາລະນະ, ບັນຫາການລະເມີດວິໄນແຜນການ-ການເງິນ, ບັນຫາຂຸດຄົ້ນທຸກແຫຼ່ງລາຍຮັບທີ່ບົ່ມຊ້ອນ ແລະ ສະພາບການຮົ່ວໄຫຼໃນການເກັບລາຍຮັບຊຶ່ງຍັງເປັນບັນຫາທີ່ເກີດຂຶ້ນຢ່າງແພ່ລາມ, ລວມທັງການຂາດດຸນງົບປະມານ, ການລະດົມທຶນເພື່ອການພັດທະນາ ແລະ ເພື່ອດຸ່ນດ່ຽງງົບປະມານ.

ທັງນີ້, ທ່ານ ສັນຕິພາບ ພົມວິຫານ ໄດ້ກ່າວເນັ້ນວ່າ: ປະເດັນທີ່ຍົກມາແມ່ນເປັນບັນຫາພື້ນຖານທີ່ທຸກພາກສ່ວນເສດຖະກິດ-ສັງຄົມ ຕ້ອງພ້ອມກັນແກ້ໄຂ, ເປັນຕົ້ນແມ່ນ ອັດຕາແລກປ່ຽນສະກຸນເງິນຕ່າງໆ, ອັດຕາເງິນເຟີ້, ຄ່າຄອງຊີບ, ການເກັບລາຍຮັບເຂົ້າງົບປະມານ, ການຄຸ້ມຄອງ-ຈັດຫາວຽກເຮັດງານທຳ, ການຊຸກຍູ້ສົ່ງເສີມການຜະລິດໃຫ້ບັນລຸຕາມຄາດໝາຍ. ບັນຫາສຳຄັນທີ່ສຸດແມ່ນພວກເຮົາຕ້ອງຮັບຮູ້ຢືນຢັນຕໍ່ຜົນສຳເລັດທີ່ຍາດມາໄດ້ ແລະຕ້ອງຮັບຮູ້ເຖິງບັນຫາພື້ນຖານທີ່ເປັນຈຸດອ່ອນ ແລະ ຂໍ້ຄົງຄ້າງທີ່ຈະຕ້ອງໄດ້ຮັບການແກ້ໄຂຢ່າງຮີບດ່ວນ.

ໃນວາລະດຽວກັນ, ກໍໄດ້ຮັບຟັງການເຜີຍແຜ່ຄຳສັ່ງເລກທີ 01 ຂອງກົມການເມືອງສູນກາງພັກວ່າດ້ວຍການເພີ່ມທະວີການນຳພາຊີ້ນຳຂອງຄະນະພັກແຕ່ລະຂັ້ນໃນການຈັດຕັ້ງປະຕິບັດມາດຕະການແກ້ໄຂຄວາມຫຍຸ້ງຍາກທາງດ້ານເສດຖະກິດ, ຊຶ່ງນໍາສະເໜີໂດຍ ທ່ານ ວຽງທະວີສອນ ເທບພະຈັນ ຮອງເຈົ້າແຂວງສະຫວັນນະເຂດ.

ທັງນີ້, ລັດຖະມົນຕີກະຊວງການເງິນກໍໄດ້ເຜີຍແຜ່ຄຳສັ່ງຂອງນາຍົກ ລັດຖະມົນຕີ ເລກທີ 18/ນຍ, ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ແລະ ໄດ້ແລກປ່ຽນ, ໂອ້ລົມ, ເຈາະຈີ້ມ ທັງຊີ້ນຳບາງບັນຫາສຳຄັນ, ໂດຍສະເພາະແມ່ນການຈັດຕັ້ງປະຕິບັດວາລະແຫ່ງຊາດທີ່ຕິດພັນກັບຂະແໜງການເງິນຢູ່ແຂວງສະຫວັນນະເຂດ. ໃນໂອກາດສຳຄັນນີ້, ກໍໄດ້ມີພິທີລົງນາມໃນບົດບັນທຶກການຮ່ວມມືສະໜອງຂໍ້ມູນເຊິ່ງກັນ ແລະກັນລະຫວ່າງພະແນກການເງິນ ແລະພະແນກອຸດສາຫະກຳ ແລະການຄ້າແຂວງ.

แชร์