ຫຼາຍກວ່າ 89% ຂອງພື້ນທີ່ໂລກ ຕົກຢູ່ໃຕ້ໄພຂົ່ມຂູ່ຂອງ “ໂອມິຄຣອນ”

ອົງການອະນາໄມໂລກ ຫຼື WHO, ອອກມາເຕືອນວ່າ: ຄວາມສ່ຽງຈາກໄວຣັສກາຍພັນ “ໂອມິຄຣອນ” ຍັງຄົງຢູ່ໃນລະດັບສູງ, ດ້ວຍຈຳນວນຜູ້ຕິດເຊື້ອໃໝ່ທີ່ເພີ່ມຂຶ້ນຫຼາຍກວ່າ 21 ລ້ານຄົນ ໃນສັບປະດາຜ່ານມາ, ຊຶ່ງຖືວ່າສູງທີ່ສຸດຂອງການຕິດເຊື້ອໃນໄລຍະໜຶ່ງສັບປະດານັບຕັ້ງແຕ່ເກີດການລະບາດຂອງພະຍາດໂຄວິດ-19. ຢ່າງໃດກໍຕາມ, ຈາກຕົວຢ່າງທີ່ຖືກສົ່ງໄປທີ່ GISDIA ໃນໄລຍະ 30 ວັນຜ່ານມາ, ພົບເຊື້ອໄວຣັສກາຍພັນໂອມິຄຣອນ ສູງເຖິງ 89,1%, ສ່ວນສາຍພັນເດລຕາພົບພຽງ 10,7%.

​ລາຍງານຂອງສຳນັກຂ່າວຕ່າງປະເທດ, ໃນວັນທີ 26 ມັງກອນ 2022 ໄດ້ອ້າງການເປີດເຜີຍຂອງ WHO ຊຶ່ງລະບຸວ່າ: ຈຳນວນຜູ້ຕິດເຊື້ອໂຄວິດ-19 ກໍລະນີໃໝ່ເພີ່ມຂຶ້ນ 5% ໃນສັບປະດາທີ່ຜ່ານມາ ໂດຍນັບມາເຖິງວັນທີ 23 ມັງກອນ. ຂະນະທີ່ສັບປະດາກ່ອນ, ຕົວເລກຜູ້ຕິດເຊື້ອໃໝ່ເພີ່ມຂຶ້​ນ 20%, ສ່ວນຕົວເລກຜູ້ເສຍຜູ້ຊີວິດກໍມີຈຳນວນເກືອບ 50 ພັນລາຍ ຊຶ່ງສະຖິຕິການຕາຍແມ່ນບໍ່ຕ່າງຈາກສັບປະດາກ່ອນ, ເຖິງແມ່ນຕົວເລກຜູ້ຕິດເຊື້ອໃໝ່ຈະຫຼຸດລົງກໍຕາມ.

​ໂດຍອົງການອະນາໄມໂລກໄດ້ຊີ້ວ່າ:ໂຄວິດສາຍພັນກາຍພັນ ໂອມິຄຣອນ ຍັງຄົງເພີ່ມຈຳນວນຂຶ້ນຈົນກາຍເປັນສາຍພັນຫຼັກທີ່ລະບາດໄປທົ່ວໂລກຫຼາຍກວ່າສາຍພັນອື່ນໆ; ຂະນະທີ່ການລະບາດຂອງໄວຣັສກາຍພັນ ເດລຕາ ແມ່ນຫຼຸດລົງຢ່າງຕໍ່ເນື່ອງ, ສ່ວນໄວຣັສກາຍພັນ ອັລຟາ, ເບຕາ, ແລະແກມມາ ແມ່ນພົບໃນລະດັບທີ່ຕໍ່າຫຼາຍ. ຊຶ່ງປະເທດຕ່າງໆຍັງກວດພົບການເພີ່ມຂຶ້ນຢ່າງໄວວາຂອງຜູ້ຕິດເຊື້ອໂອມິຄຣອນ ໃນເດືອນພະຈິກ-ເດືອນທັນວາຜ່ານມາ, ແຕ່ມາຮອດເວລານີ້ຕົວເລກຜູ້ຕິດເຊື້ອກໍໄດ້ເລີ່ມຫຼຸດລົງ.

ທັງນີ້, ອົງການອະນາໄມໂລກ ໄດ້ຢໍ້າວ່າ: ເມື່ອເບິ່ງຈາກຫຼັກຖານທີ່ມີໃນຂະນະນີ້, ຄວາມສ່ຽງໃນພາບລວມທີ່ກ່ຽວເນື່ອງກັບໂຄວິດ-19 ສາຍພັນກາຍພັນ ໂອມິຄຣອນ “ຍັງຢູ່ໃນລະສູງ”.

แชร์