ຄົ້ນພົບຄວາມມະຫັດສະຈັນໃນຖໍ້າເຂດເມືອງເຟືອງ

​ຖືເປັນຄວາມພາກພູມໃຈຂອງທີມງາມ ກຣີນດິສໂຄເວີຣີລາວ (Greendiscoverylaos) ໂດຍນັກສຳຫຼວດເພື່ອພັດທະນາສະຖານທີ່ທ່ອງທ່ຽວ ແລະ ສ້າງສັນກິດຈະກຳທ່ອງທ່ຽວແບບອະນຸຮັກສິ່ງແວດລ້ອມ ຫຼື Eco Tour ຊຶ່ງເປັນຜູ້ຄົ້ນພົບຄວາມງາມມະຫັດສະຈັນທີ່ເຊື່ອງຊ້ອນຢູ່ພາຍໃນຖໍ້າແຫ່ງໜຶ່ງຂອງເຂດເມືອງເຟືອງ ແຂວງວຽງຈັນ.

​ໂດຍ ທ່ານ ບຸນມະນີ ປັນຍາວົງ ໜຶ່ງໃນທີມສຳຫຼວດຖ້ຳໃນເຂດເມືອງເຟືອງ ໄດ້ໃຫ້ສຳພາດພິເສດກັບທີມຂ່າວອອນໄລນ໌ ເສດຖະກິດ-ສັງຄົມ ເມື່ອວັນທີ 25 ມັງກອນ 2022 ວ່າ: ຖໍ້າແຫ່ງນີ້ເປັນທີ່ຮູ້ຈັກກັນດີຂອງຊາວເມືອງເຟືອງມາຫຼາຍເຊັ່ນຄົນ, ໃນຖານະແຫຼ່ງສຳປະທານເອົາຂີ້ເຈຍອອກມາຂາຍຊຶ່ງຊາວບ້ານພາກັນເອີ້ນວ່າ “ຖໍ້າແກ້ວ”. ສໍາລັບການເດີນທາງເຂົ້າໄປຫາຖໍ້າ, ຕ້ອງບຸຜ່ານຜາຫີນຜຸພັງ ແລະ ສູງຊັນ, ຊຶ່ງບາງບ່ອນຕ້ອງໃຊ້ເຊືອກຫ້ອຍຢ່ອນລົງເພື່ອຂ້າມຈຸດທີ່ເປັນສະພາບດິນເຈື່ອນ ຈິ່ງສາມາດເຂົ້າໄປເຖິງພາຍໃນຖໍ້າ, ແຕ່ດ້ວຍຄວາມພະຍາຍາມຂອງທີມງານ ກຣີນດິສໂຄເວີຣີລາວ ຈິ່ງສາມາດນຳເອົາພາບງາມໆ ແລະ ຕື່ນຕາຕື່ນໃຈອອກມາເຜີຍແຜ່ໃຫ້ທົ່ວສັງຄົມໄດ້ຮັບຮູ້. ຂະນະດຽວກັນ ກໍມີການສະເໜີເຖິງຄະນະນຳເມືອງເຟືອງ, ຊຶ່ງອຳນາດການປົກຄອງເມືອງກໍໄດ້ສະເໜີເຖິງຄະນຳແຂວງໃຫ້ຮັບຊາບເປັນທີ່ຮຽບຮ້ອຍແລ້ວ, ແຕ່ຂໍສະຫງວນຈຸດທີ່ຕັ້ງຂອງຖໍ້າໄວ້ກ່ອນ.

​“ຄວາມໂດດເດັ່ນຂອງຖໍ້າແຫ່ງນີ້, ແມ່ນຫີນງອກຫີນຍ້ອຍທີ່ເປັ່ງປະກາຍດັ່ງອັນຍະມະນີແລະ ເບິ່ງຄືວ່າມີການຍ້ອຍລະລາຍຂອງຢົດນໍ້າກ້ອນ, ຈິ່ງເຮັດໃຫ້ຫຼາຍຄົນທີ່ເຫັນພາບຄິດວ່າ ເປັນຖໍ້ານໍ້າກ້ອນ; ຢ່າງໃດກໍດີ, ນັກວິຊາການໄດ້ຊີ້ວ່າ: ລັດສະໝີທີ່ເປັ່ງປະກາຍອອກມາຈາກຫີນງອກຫີນຍ້ອຍແມ່ນເມັດມະນີຂອງແຮ່ ແຄລໄຊຕ໌ (Calcite) ຫຼື ຫີນແຫ່ງການຊຳລະລ້າງ, ຊຶ່ງສູດເຄມີແມ່ນ CaCO3” ທ່ານ ບຸນມະນີ ກ່າວ.

ຢ່າງໃດກໍດີ, ການຄົ້ນພົບຄັ້ງນີ້ກໍຖືເປັນຂຸມຊັບບົ່ມຊ້ອນທີ່ພ້ອມຈະອຳນວຍໃຫ້ແກ່ການພັດທະນາອຸດສາຫະກຳການທ່ອງທ່ຽວ. ທັງນີ້, ທີມງານ Greendiscoverylaos ກໍພ້ອມທີ່ຈະໃຫ້ຄວາມຮ່ວມມືໃນການສຳຫຼວດ ແລະເຂົ້າເຖິງພື້ນທີ່ກັບພາກສ່ວນທີ່ກ່ຽວຂ້ອງ, ເພື່ອພ້ອມກັນນໍາສະເໜີຄວາມງາມທີ່ມະຫັດສະຈັນຂອງ “ຖໍ້າແກ້ວ” ໜຶ່ງໃນມໍລະດົກທາງທຳມະຊາດເທິງດິນແດນລາວອອກສູ່ສາຍຕາຊາວໂລກ.

(ຂອບໃຈຮູບພາບງາມໆຈາກເຟຊບຸກ:Boun Panyavong)

แชร์