ແມ່ນຫຍັງຖ່ວງດຶງສິ່ງອໍານວຍຄວາມສະດວກດ້ານການຄ້າ?

ເຖິງແມ່ນຫຼາຍນິຕິກຳໄດ້ຮັບການສ້າງຕັ້ງຂຶ້ນ ແລະໄດ້ຮັບການປັບປຸງແລ້ວ;ແຕ່ແຜນການຈັດຕັ້ງປະຕິບັດວຽກງານອຳນວຍຄວາມສະດວກທາງດ້ານການຄ້າໃນປີຜ່ານມາ ກໍເຫັນວ່າມີຫຼາຍອັນຍັງບໍ່ທັນສອດຄ່ອງ ແລະບໍ່ເຂັ້ມງວດຕາມຂໍ້ກຳນົດທີ່ລະບຸໄວ້ໃນກົດໝາຍ.

ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກໍາ ແລະການຄ້າຮອງຫົວໜ້າ ຄອຄສ, ໄດ້ລາຍງານຕໍ່ກອງປະຊຸມຄະນະກໍາມະການອໍານວຍຄວາມສະດວກທາງດ້ານການຄ້າ ທົ່ວປະເທດ ຄັ້ງທີ IV ເມື່ອວັນທີ 25 ມັງກອນ 2022 ທີ່ກະຊວງອຸດສາຫະກໍາ ແລະການຄ້າ, ໂດຍການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະການລົງທຶນ, ທັງເປັນຫົວໜ້າຄະນະກໍາມະການຊີ້ນໍາລວມອໍານວຍຄວາມສະດວກທາງດ້ານການຄ້າຂັ້ນສູນກາງ (ຄອຄສ), ຊຶ່ງມີພາກສ່ວນກ່ຽວຂ້ອງຈາກສູນກາງ ແລະທ້ອງຖິ່ນເຂົ້າຮ່ວມປຶກສາຫາລືທັງແບບເຊິ່ງໜ້າ ແລະແບບທາງໄກ.

ທັງນີ້, ລັດຖະມົນຕີກະຊວງອຸດສາຫະກໍາ ແລະການຄ້າ ຮອງຫົວໜ້າ ຄອຄສ ໄດ້ຊີ້ແຈງວ່າ: ຄວາມຫ້າວຫັນໃນການປະຕິບັດວຽກງານຂອງທຸກພາກສ່ວນ, ໄດ້ເຮັດໃຫ້ການປັງປຸງ ແລະ ແກ້ໄຂບັນຫາຕ່າງໆມີຜົນສໍາເລັດໃນລະດັບດີສົມຄວນ ເຊັ່ນ: ການສ້າງ ແລະ ປັບປຸງບັນດານິຕິກໍາທີ່ຕິດພັນກັບຫຼາຍຂະແໜງການເພື່ອເຈາະຈົງໃສ່ບັນຫາໃດທີ່ຍັງບໍ່ສອດຄ່ອງ ຫຼື ຖ່ວງດຶງການຂະຫຍາຍຕົວຂອງເສດຖະກິດ-ການຄ້າ, ຊຶ່ງໃນຈໍານວນ 51 ມາດຕະການ ປີ 2021 ກໍມີການປັບປຸງສໍາເລັດຕື່ມ 9 ມາດຕະການ, ພວມດໍາເນີນການ 28 ມາດຕະການ, ໃນນັ້ນ ບໍ່ຄືບໜ້າເລີຍ 5 ມາດຕະການ.

ບັນຫາຄົງຄ້າງທີ່ ທ່ານ ຄຳແພງ ໄຊສົມແພງ ໄດ້ກ່າວຢໍ້າຕໍ່ກອງປະຊຸມຄັ້ງນີ້ກໍຄື  “ບັນດາໜ່ວຍງານປະຈໍາດ່ານ ແລະ ການເກັບຄ່າທໍານຽມຍັງບໍ່ສອດຄ່ອງກັບດໍາລັດ 558/ລບ, ການກວດກາການເຄື່ອນຍ້າຍສິນຄ້າພາຍໃນປະເທດ ແລະການອອກໃບຢັ້ງຢືນການເຄື່ອນຍ້າຍສິນຄ້າຍັງປະຕິບັດບໍ່ຖືກຕາມເນື້ອໃນຈິດໃຈຂອງ ຄໍາສັ່ງ 12/ນຍ. ການປັບປຸງນິຕິກໍາເຖິງແມ່ນປະຕິບັດສໍາເລັດໄປແລ້ວສ່ວນໜຶ່ງ; ແຕ່ກໍມີຄວາມຫຼ້າຊ້າຫຼາຍ ເພາະຍັງ 33 ມາດຕະການ ຊຶ່ງຄວນໄດ້ຮັບການປັບປຸງໃຫ້ສໍາເລັດໃນປີຕໍ່ມາ. ສຳລັບບັນຫາຄ້າງຄາ ແລະຊໍາເຮື້ອມາຫຼາຍປີທີ່ຍັງແກ້ບໍ່ຕົກກໍຄືການອອກໃບຢັ້ງຢືນ ຫຼືໃບອະນຸຍາດໃຊ້ເວລາດົນ, ຄ່າທໍານຽມສູງ ແລະຫຼາຍຂັ້ນຕອນ. ນອກນັ້ນ, ຍັງປາກົດມີບັນຫາກວດກາຕາມເສັ້ນທາງ, ການເລືອກປະຕິບັດຊັ່ງນໍ້າໜັກລົດບັນທຸກ ແລະອື່ນໆ”.

แชร์