ເຊີນທ່ຽວຊົມເທສະການອາຫານລາວ
ເປີດສາກຂຶ້ນຢ່າງເປັນທາງການລະຫວ່າງວັນທີ 25-29 ມັງກອນ, ສຳລັບງານເທສະການອາຫານລາວ ປະຈຳປີ 2022 ທີ່ສວນເຈົ້າອະນຸວົງ ນະຄອນຫຼວງວຽງຈັນ, ເປັນກຽດເຂົ້າຮ່ວມໂດຍ ທ່ານ ນາງ ນາລີ ສີສຸລິດ ພັນລະຍາທ່ານປະທານປະເທດ, ທ່ານ ນາງ ສີຈັນ ວິພາວັນ ພັນລະຍາທ່ານນາຍົກລັດຖະມົນຕີ, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາເອກອັກຄະລັດຖະທູດ, ພັນລະຍາເອກອັກຄະລັດຖະທູດ, ທູຕານຸທູດຕ່າງປະເທດປະຈໍາ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ຈັນທະຈອນ ວົງໄຊ ປະທານຄະນະບໍລິຫານສະມາຄົມນັກທຸລະກິດແມ່ຍິງລາວ (ສທຍ) ປະທານຈັດງານເທສະການອາຫານລາວ ປະຈຳປີ 2022 ໄດ້ກ່າວວ່າ: ສທຍ ໄດ້ພະຍາຍາມຄັດຈ້ອນຈໍານວນຮ້ານຂາຍຈາກ 200 ຮ້ານ ໃຫ້ເຫຼືອພຽງ 120 ຮ້ານ ໃນນັ້ນ, ມີຮ້ານອາ ຫານລາວ 107 ຮ້ານ, ຮ້ານຂາຍເຄື່ອງຫັດຖະກໍາມີ 13 ຮ້ານ, ຊຶ່ງເປັນສິນຄ້າຈາກພາຍໃນປະເທດທັງໝົດ. ຈຸດປະສົງຂອງການຈັດງານຄັ້ງນີ້, ເພື່ອສ້າງແນວຄວາມຄິດດ້ານການອະນຸຮັກອາຫານ, ການດໍາລົງຊີວິດຕິດພັນວັດທະນະທໍາ, ຮີດຄອງປະເພນີລາວ ແລະ ສືບທອດມູນເຊື້ອດຸໝັ່ນຂອງແມ່ຍິງລາວ, ທັງເພື່ອໃຫ້ສາມາດປັບຕົວເຂົ້າກັບວິຖີຊີວິດປົກກະຕິແບບໃໝ່ໄດ້ຢ່າງປອດໄພ.
ງານເທສະການອາຫານລາວຊຶ່ງດຳເນີນເປັນເວລາ 5 ວັນ ແມ່ນເລີ່ມແຕ່ 9:00 ໂມງ-21:00 ໂມງ, ພາຍໃນງານມີກິດຈະກໍາໂຄສະນາສິນຄ້າຂອງບັນດາບໍລິສັດ ແລະ ທະນາຄານຕ່າງໆທີ່ໃຫ້ ການສະໜັບສະໜູນ ໂດຍຈັດຕັ້ງໝູນວຽນກັນຢູ່ເວທີໃນຕອນແລງ, ທັງໄດ້ຈັດໃຫ້ມີຮ້ານອາຫານລາວເອກະລັກເພື່ອໃຫ້ແຂກທີ່ມາທ່ຽວງານສາມາດຊິມ, ຊື້ ແລະ ຖ່າຍຮູບໄວ້ເປັນທີ່ລະນຶກ, ທັງຈະມີການຈັດຕັ້ງແຂ່ງຂັນປຸງແຕ່ງອາຫານ (ລາບໝູ) ທີ່ປຸງແຕ່ງໂດຍຍິງໜຸ່ມທີ່ມີພອນສະຫວັນ ຊຶ່ງຈະຕັດສິນໃນວັນສຸດທ້າຍຂອງງານ.
