ລັດຖະບານຈີນ ມອບວັຄຊີນຊຸດທີ 8 ຈຳນວນ 2 ລ້ານໂດສ ຊ່ວຍລາວຕ້ານໂຄວິດ

ວັຄຊີນປ້ອງກັນໂຄວິດ-19 ຈໍານວນ 2 ລ້ານໂດສ ຈາກ ສປ ຈີນ ໄດ້ມາຮອດ ສປປ ລາວ ແລ້ວ, ໃນຕອນເຊົ້າຂອງວັນທີ 25 ມັງກອນ 2022 ຊຶ່ງນັບເປັນຄັ້ງທີ 8 ທີ່ລັດຖະບານ ສປ ຈີນ ໄດ້ໃຫ້ການຊ່ວຍເຫຼືອວັຄຊີນປ້ອງກັນໂຄວິດ-19 ແກ່ ສປປ ລາວ ແລະ ເປັນຄັ້ງທໍາອິດຂອງປີ 2022.

ທັງນີ້, ກ່າວມອບໂດຍ ທ່ານ ຈ່ຽງ ຈ້າຍ ຕົງ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປ ຈີນ ປະຈໍາ ສປປ ລາວ ແລະ ກ່າວຮັບໂດຍ ທ່ານ ພັນຄໍາ ວິພາວັນ ນາຍົກລັດຖະມົນຕີ, ມີທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ແລະ ພາກສ່ວນກ່ຽວຂ້ອງເຂົ້າຮ່ວມ.

ການຊ່ວຍເຫຼືອວັຄຊີນຂອງລັດຖະບານ ແລະ ປະຊາຊົນ ສປ ຈີນ ຄັ້ງທີ 8 ນີ້, ປະກອບມີວັຄຊີນ 1,5 ລ້ານໂດສ ພ້ອມເຂັມສັກຢາ, ແມ່ນມອບທີ່ນະຄອນຫຼວງວຽງຈັນ ແລະ ອີກ 5 ແສນໂດສ,ແມ່ນແຂວງຢູນນານມອບໃຫ້ແຂວງພາກເໜືອຂອງລາວທີ່ມີຊາຍແດນຕິດກັບຈີນ ລວມເປັນ 2 ລ້ານໂດສ.

ໂດຍທ່ານນາຍົກລັດຖະມົນຕີ, ໄດ້ຕີລາຄາສູງຕໍ່ການຊ່ວຍເຫຼືອຂອງລັດຖະບານ ແລະ ປະຊາຊົນ ສປ ຈີນ ຊຶ່ງເປັນການເສີມຂະຫຍາຍສາຍພົວພັນຮ່ວມມືໃຫ້ການຊ່ວຍເຫຼືອເຊິ່ງກັນ ແລະກັນ ລະຫວ່າງສອງພັກ-ລັດຂອງປະຊາຊົນສອງຊາດລາວ-ຈີນ, ພ້ອມນັ້ນ ກໍໄດ້ຕີລາຄາສູງຕໍ່ໝາກຜົນຂອງການຮ່ວມມືແກ້ໄຂການລະບາດພະຍາດໂຄວິດ-19 ຢູ່ລາວ ໃນໄລຍະຜ່ານມາ, ປະກອບສ່ວນໃຫ້ລັດຖະບານ ແລະປະຊາຊົນລາວສາມາດຄວບຄຸມການລະບາດພະຍາດໂຄວິດ-19 ໄດ້ຢ່າງມີຜົນສໍາເລັດເປັນກ້າວໆ.

ປີ 2022 ລັດຖະບານລາວ ໄດ້ຕັ້ງເປົ້າສັກວັຄຊີນໃຫ້ໄດ້ 80% ຂອງພົນລະເມືອງລາວ, ຊຶ່ງການຊ່ວຍເຫຼືອຂອງ ສປ ຈີນ ແລະ ບັນດາປະເທດເພື່ອນມິດສາກົນ, ຈະປະກອບສ່ວນສໍາຄັນໃຫ້ແກ່ໂຄງການເປີດການທ່ອງທ່ຽວສີຂຽວ ຂອງ ສປປ ລາວ ອີກດ້ວຍ.

แชร์