ການລະບາດໂຄວິດ ບີບອະນາຄົດເດັກທົ່ວໂລກ

​ການປິດໂຮງຮຽນເພື່ອສະກັດກັ້ນການລະບາດຂອງພະຍາດໂຄວິດ-19, ສົ່ງຜົນຕໍ່ເດັກນັກຮຽນຫຼາຍກວ່າ 616 ລ້ານຄົນໃນທົ່ວໂລກ, ຜົນກະທົບຈາກການລະບາດໄດ້ປິດກັ້ນການພັດທະນາທັກສະໂດຍພື້ນຖານ ແລະ ມີຜົນກະທົບຕໍ່ສຸຂະພາບຈິດ; ຮ້າຍແຮງໄປກວ່ານັ້ນ ຍັງເຮັດໃຫ້ເດັກຕ້ອງຜະເຊີນໜ້າກັບຄວາມສ່ຽງຈາກການໃຊ້ຄວາມຮຸນແຮງ, ອີກທັງປິດກັ້ນເດັກບໍ່ໃຫ້ເຂົ້າເຖິງແຫຼ່ງໂພຊະນາການ.

​ລາຍງານຂ່າວຕ່າງປະເທດໃນວັນທີ 25 ມັງກອນ 2022, ໄດ້ອ້າງການຖະແຫຼງຂອງ ທ່ານ ໂຣເບິຣ໌ຕ ເຈນກິນສ໌, ຫົວໜ້າຝ່າຍການສຶກສາຂອງກອງທຶນເພື່ອເດັກແຫ່ງສະຫະປະຊາຊາດ ຫຼື ຢູນິເຊຟ, ທີ່ລະບຸວ່າ “ເຮົາກຳລັງຜະເຊີນໜ້າກັບຄວາມສູນເສຍໃນລະດັບທີ່ອາດຈະຜ່ານໄປບໍ່ໄດ້ໃນການຮຽນຂອງເດັກ, ຊຶ່ງການເປິດໂຮງຮຽນໃໝ່ເທົ່ານັ້ນແມ່ນຍັງບໍ່ພຽງພໍ; ແຕ່ຕ້ອງມີການສະໜັບສະໜູນຢ່າງແຂງແຮງເພື່ອຟື້ນຟູການສຶກສາທີ່ສູນເສຍໄປ”.

​ລາຍງານຂ່າວດຽວກັນໃຫ້ຮູ້ອີກວ່າ: ປະເທດທີ່ມີລາຍຮັບໜ້ອຍ ແລະລາຍຮັບປານກາງປະສົບບັນຫາຄວາມສູນເສຍດ້ານການຮຽນຮູ້ຈາກການປິດໂຮງຮຽນ, ເຮັດໃຫ້ເດັກໃນໄວ 10 ປີ ທີ່ກວມເຖິງ 73% ບໍ່ສາມາດອ່ານ ຫຼືເຂົ້າໃຈຂໍ້ຄວາມງ່າຍໆ, ສະພາບດັ່ງກ່າວເພີ່ມຂຶ້ນຈາກ 53% ໃນຊ່ວງກ່ອນເກີດການລະບາດຂອງພະຍາດໂຄວິດ-19.

ທັງນີ້ເດັກນັກຮຽນຂອງເອທິໂອເປຍ, ໄດ້ຮຽນຄະນິດສາດທີ່ມີການສອນຕາມປົກກະຕິພຽງແຕ່ 30-40% ເທົ່ານັ້ນ; ຂະນະທີ່ແອຟຣິກາໃຕ້ກໍມີລາຍງານວ່າ: ນັກຮຽນປະມານ 5 ແສນຄົນ ຕ້ອງອອກຈາກໂຮງຮຽນໃນໄລຍະເດືອນມີນາ 2020 ເຖິງເດືອນກໍລະກົດ 2021.

​ຢູນິເຊຟຊີ້ວ່າ: ສະຖານະການດັ່ງກ່າວບໍ່ໄດ້ເກີດຂຶ້ນກັບປະເທດທຸກຍາກເທົ່ານັ້ນ, ເພາະປະເທດຮັ່ງມີເຊັ່ນ ອະເມຣິກາ ຊຶ່ງເປັນຊາດທີ່ຈະເລີນ ແລະ ມີລະບົບການສຶກສາເປັນອັນດັບຕົ້ນໆຂອງໂລກ, ກໍພົບກັບຄວາມສູນເສຍດ້ານການຮຽນຮູ້ໃນຫຼາຍລັດ, ບໍ່ວ່າຈະເປັນເທ໊ກຊັສ, ແຄຣິຟໍຣ໌ເນຍ ແລະ ແມຣິແລນດ໌.

แชร์