ໄຊຍະບູລີ ຊີ້ແຈງສາເຫດເກັບລາຍຮັບບໍ່ໄດ້ຕາມແຜນ

ເຊັ່ນດຽວກັບຫຼາຍໆແຂວງຂອງ ສປປ ລາວ, ທີ່ບໍ່ສາມາດຈັດເກັບລາຍຮັບໄດ້ຕາມແຜນ. ຊຶ່ງໄຊຍະບູລີກໍເປັນອີກແຂວງໜຶ່ງທີ່ປະສົບບັນຫາການພັດທະນາເສດຖະກິດ-ສັງຄົມມີຈັງຫວະຫຼຸດຖອຍ, ອັນເນື່ອງມາຈາກຜົນກະທົບຂອງການລະບາດພະຍາດໂຄວິດ-19 ທີ່ແກ່ຍາວມາປະມານ 2 ປີແລ້ວ.

ປີ 2021 ຜ່ານມາ, ແຂວງໄຊຍະບູລີ ໄດ້ຮັບຕົວເລກແຜນການຈັດເກັບລາຍຮັບເບື້ອງຕົ້ນ 1.065,36 ຕື້ກີບ ແລະ ໃນໄລຍະທ້າຍປີກໍໄດ້ດັດແກ້ເພີ່ມ 69,41 ຕື້ກີບ, ລວມແຜນດັດແກ້ທັງໝົດ 1.134,77 ຕື້ກີບ. ຜ່ານການຈັດຕັ້ງປະຕິບັດຕົວຈິງສາມາດຈັດເກັບລາຍຮັບໄດ້ທັງໝົດ 1.046,39 ຕື້ກີບ, ເທົ່າກັບ 98,27% ຂອງແຜນເບື້ອງຕົ້ນ ແລະເທົ່າກັບ 92,26% ຂອງແຜນດັດແກ້.

ຂໍ້ມູນດັ່ງກ່າວໄດ້ຖືກເປີດເຜີຍຕໍ່ກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2021 ແລະທິດທາງແຜນການງົບປະມານແຫ່ງລັດ ປີ 2022, ໂດຍການເປັນປະທານຂອງ ທ່ານ ວັນດາວ ແວວທະນັດສີ ຫົວໜ້າພະແນກການເງິນແຂວງໄຊຍະບູລີ, ເຂົ້າຮ່ວມໂດຍ ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ, ທ່ານ ສົມຈິດ ຈັນທະວົງ ຮອງເຈົ້າແຂວງໄຊຍະບູລີ, ມີນັກວິຊາການທີ່ກ່ຽວຂ້ອງຂອງກະຊວງການເງິນ, ບັນດາພະແນກການ, ຄະນະປະຈໍາສະພາ, ຮອງເຈົ້າເມືອງ, ຫ້ອງການການເງິນຂອງ 11 ເມືອງ, ພ້ອມດ້ວຍນັກທຸລະກິດ ແລະ ຜູ້ປະກອບການເຂົ້າຮ່ວມ.

ທັງນີ້, ຫົວໜ້າພະແນກການເງິນແຂວງໄຊຍະບູລີໄດ້ຊີ້ແຈງຕໍ່ວາລະປະຊຸມເມື່ອວັນທີ 24 ມັງກອນ 2022 ວ່າ: ສາເຫດທີ່ເຮັດໃຫ້ການຈັດເກັບລາຍຮັບບໍ່ໄດ້ຕາມແຜນການ, ກໍຍ້ອນສະພາບລະບາດຂອງພະຍາດໂຄວິດ-19, ຊຶ່ງພາກລັດກໍໄດ້ມີນະໂຍບາຍຍົກເວັ້ນອາກອນລາຍໄດ້ແກ່ຈຸນລະວິສາຫະກິດເປັນເວລາ 3 ເດືອນ, ຄິດເປັນລາຍຮັບທີ່ປະຕິບັດບໍ່ໄດ້ທັງໝົດ 6,74 ຕື້ກີບ; ອີກດ້ານໜຶ່ງກໍຄືລາຍຮັບຈາກໂຄງການໄຟຟ້າແມ່ນໍ້າຂອງທີ່ເຄີຍເກັບໄດ້ 1,8 ຕື້ກີບຕໍ່ເດືອນ, ແຕ່ປີ 2021 ເກັບໄດ້ພຽງ 0,6 ຕື້ກີບຕໍ່ເດືອນຊຶ່ງຫຼຸດລົງ 14,4 ຕື້ກີບ.

แชร์