ວັກຊີນ ໄຟເຊີຣ໌ ເກືອບ 9 ແສນໂດສ ຈາກອະເມຣິກາ ມາຮອດລາວແລ້ວ

ສປປ ລາວ ໄດ້ຮັບວັຄຊີນ ໄຟເຊີຣ໌ ໄບອອນເທຄ “Pfizer BioNTech” ຊຸດໃໝ່, ຊຶ່ງເປັນການຊ່ວຍເຫຼືອຈາກລັດຖະບານສະຫະລັດອະເມຣິກາ ຜ່ານໂຄງການ COVAX Facility, ທີ່ເປັນການຮ່ວມມືລະຫວ່າງອົງການພັນທະມິດດ້ານວັຄຊີນ “ອົງການກາວີ” (Gavi), ອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ (CEPI), ແລະອົງການອະນາໄມໂລກ (WHO), ໂດຍມີອົງການຢູນິເຊຟເປັນຄູ່ຮ່ວມງານໃນການຈັດສົ່ງ.

ການຊ່ວຍເຫຼືອຄັ້ງນີ້ປະກອບດ້ວຍວັກຊີນ Pfizer BioNTech ຈຳນວນ 899,730 ໂດສ ຊຶ່ງເປັນຄັ້ງທີ 2 ຈາກລັດຖະບານສະຫະລັດອະເມຣິກາ ໃຫ້ແກ່ ສປປ ລາວ ໃນເດືອນນີ້. ສ່ວນການຂົນສົ່ງຄັ້ງທຳອິດມີ 799.110 ໂດສ ໄດ້ມາຮອດ ສປປ ລາວ ແຕ່ວັນທີ 2 ມັງກອນ 2022, ນັບລວມຍອດການຈັດສົ່ງທັງໝົດໃນປີນີ້ແມ່ນ 1,698,840 ໂດສ, ໂດຍການຊ່ວຍເຫຼືອທັງໝົດນັບແຕ່ມີສະພາບລະບາດໂຄວິດ-19 ຄິດເປັນມູນຄ່າຫຼາຍກວ່າ 13 ລ້ານໂດລາສະຫະລັດ.

ໃຫ້ການຕ້ອນຮັບວັຄຊີນໃນວັນທີ 24 ມັງກອນ 2022 ທີ່ສະໜາມບິນສາກົນວັດໄຕ, ໂດຍດຣ ບຸນແຝງ ພູມມະໄລສິດ ລັດຖະມົນຕີວ່າການກະຊວງສາທາລະນະສຸກ, ທ່ານ ປີເຕີ ເຮມອນ (Peter M. Haymond) ເອກອັກຄະລັດຖະທູດແຫ່ງສະຫະລັດອະເມຣິກາ ປະຈໍາ ສປປ ລາວ, ທ່ານ ໄມໂຄ ຮອນນີ້ງ (Mr. Michael Ronning) ຜູ້ຕາງໜ້າອົງການ USAID ປະຈໍາ ສປປ ລາວ, ທ່ານ ນາງ ບີອາເຕ້ ດັສເທວ (Ms. Beate Dastel), ຮັກສາການຜູ້ຕາງໜ້າອົງການຢູນິເຊຟ ປະຈຳ ສປປ ລາວແລະ ​ດຣ.​ ຢູ ​ລີ ​ປາກ (Dr. Yu Lee Park) ​ຮັກສາການຫ້ອງການ​ອົງການ​ອະນາ​ໄມ​ໂລກ​ ປະຈໍາສປປ ລາວ.

ທັງນີ້, ຍັງຈະມີພິທີມອບ-ຮັບການຊ່ວຍເຫຼືອວັຄຊີນ Pfizer BioNTech ທັງສອງຄັ້ງຢ່າງເປັນທາງການລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານສະຫະລັດອະເມຣິກາ ໃນ​ວັນ​ທີ 26 ມັງກອນ 2022 ທີ່​ກະ​ຊວງ​ສາ​ທາ​ລະ​ນະ​ສຸກ.

ສຳລັບວັຄຊີນ Pfizer BioNTech ທີ່ສະໜອງໃຫ້ໂດຍລັດຖະບານສະຫະລັດອະເມຣິກາ, ຈະສຸມໃສ່ສະໜອງໃຫ້ແກ່ກຸ່ມທີ່ເປັນບຸລິມະສິດລວມມີໄວໜຸ່ມອາຍຸ 12 ຫາ 17 ປີ ແລະກຸ່ມອາຍຸ 60 ປີຂຶ້ນໄປ, ລວມທັງຄົນທີ່ມີພະຍາດປະຈໍາຕົວ ແລະແມ່ຍິງຖືພາ. ວັຄຊີນ Pfizer BioNTech ໄດ້ຖືກທົບທວນດ້ານຄວາມປອດໄພ ແລະ ປະສິດທິພາບໂດຍອົງການອະນາໄມໂລກ ແລະຖືເປັນວັຄຊີນ COVID-19 ຊະນິດທໍາອິດທີ່ອົງການອະນາໄມໂລກແນະນໍາສໍາລັບການນໍາໃຊ້ໃນບຸກຄົນທີ່ມີອາຍຸ 12 ປີຂຶ້ນໄປ.

แชร์