ໄທຢຶດຊີ້ນໝູລັກລອບນຳເຂົ້າຈາກລາວ 20 ໂຕນ

​ລາຄາຊີ້ນໝູຢູ່ຕະຫຼາດໄທທີ່ພຸ່ງສູງຂຶ້ນ, ໄດ້ດຶງດູດຂະບວນການຄ້າຂາຍເຖື່ອນທີ່ລັກລອບເຄື່ອນຍ້າຍຊີ້ນໝູຢູ່ລາວອອກໄປຂາຍຢູ່ຕະຫຼາດຕ່າງປະເທດ. ແຕ່ກໍຖືກເຈົ້າໜ້າທີ່ດ່ານກັກກັນສັດມຸກດາຫານຈັບໄດ້, ໃນນັ້ນພົບຊີ້ນໝູນຳເຂົ້າຈາກລາວ 20 ໂຕນ.

​ສື່ໄທໄດ້ລະບຸຊຶ່ງອ້າງການເປີດເຜີຍເມື່ອເວລາ 19:30 ໂມງຂອງວັນທີ 22 ມັງກອນ ໂດຍທ່ານ ສະຫຼອງຣັດ ຈັນສົ່ງແກ້ວ ຫົວໜ້າດ່ານກັກກັນສັດແຂວງມຸກດາຫານ, ທີ່ໄດ້ຮັບແຈ້ງເລື່ອງການລັກລອບນຳເຂົ້າຊາກໝູຈາກແຂວງສະຫວັນນະເຂດ ສປປ ລາວ, ຜ່ານເຂົ້າມາທາງດ່ານນະຄອນພະນົມຊຶ່ງໃຊ້ເສັ້ນທາງຂົວມິດຕະພາບແຫ່ງທີ 2 (ມຸກດາຫານ-ສະຫວັນນະເຂດ) ຈິ່ງໄດ້ປະສານໜ່ວຍງານຄວາມໝັ້ນຄົງແຂວງມຸກດາຫານ, ຮ່ວມນໍາກຳລັງເຈົ້າໜ້າທີ່ໄປເຝົ້າລະວັງທີ່ບໍລິເວນສາມແຍກປາກທາງອອກດ່ານຊາຍແດນມຸກດາຫານຖະໜົນຊະຢາງກູນ.

​ຕໍ່ມາຈິ່ງພົບລົດເທຣລເລີຣ໌ລາກລົດບັນທຸກຕູ້ຄອນເທນເນີຣ໌ ຍີ່ຫໍ້ອີຊູຊຸ ໝາຍເລກທະບຽນ 70-2126 ມຸກດາຫານ, ຕິດສະຕິກເກີຣ໌ດ້ານໜ້າລົດວ່າ ຫຈກ.ນານາຢາຢ່າ ທຣານສະປອຣ໌ຕ, ແລ່ນອອກມາຈາກດ່ານຊາຍແດນມຸກດາຫານຊຶ່ງກົງກັບທີ່ໄດ້ຮັບແຈ້ງ, ຈິ່ງລັດລົດໃຫ້ຢຸດ ແລະ ຂໍກວດກາພາຍໃນຕູ້ຄອນເທນເນີຣ໌ ພົບກ່ອງເຈ້ຍບັນຈຸສິ່ງຂອງວາງໄວ້ເຕັມຕູ້, ເມື່ອເປີດອອກເບິ່ງຈິ່ງເຫັນຊີ້ນໝູແຊ່ແຂງ ຊຶ່ງສ່ວນໃຫຍ່ເປັນຊີ້ນສາມຊັ້ນ, ນໍ້າໜັກລວມປະມານ 20.000 ກິໂລກຣາມ, ມູນຄ່າຈໍາໜ່າຍໃນປະເທດໄທປະມານ 5 ລ້ານບາດ.

​ຢ່າງໃດກໍຕາມ,ຄົນຂັບລົດຍັງໃຫ້ການປະຕິເສດພຽງແຕ່ບອກວ່າ: ມີຊິປປິ້ງຢູ່ແຂວງສະຫວັນນະເຂດ, ມາບອກໃຫ້ໄປຂັບລົດເທຣລເລີຣ໌ຫົວລາກບັນທຸກຕູ້ຄອນເທນເນີຣ໌ອີກຄັນ, ທີ່ມີຜູ້ຂັບມາຈອດໄວ້ໃຫ້ຂັບແທນ ແລະ ບອກວ່າ ເມື່ອຜ່ານດ່ານກວດທີ່ຊາຍແດນມຸກດາຫານມາແລ້ວ, ຈະມີຄົນຕິດຕໍ່ມາໃຫ້ຂັບລົດໄປໃສແທ້! ແຕ່ກໍຖືກເຈົ້າໜ້າທີ່ຮຽກກວດກ່ອນ.

แชร์