ລາວຕິດໂຄວິດໜ້ອຍລົງ ລັດສົ່ງສັນຍານເຕືອນຫ້າມປະໝາດ

ເຖິງແມ່ນວ່າຕົວເລກການຕິດເຊື້ອໃໝ່ໃນໄລຍະ 5 ວັນທີ່ຜ່ານມາ ຈະມີບໍ່ເຖິງ 1.000 ຄົນຕໍ່ວັນ, ແຕ່ກໍມີລາຍງານຢືນຢັນຜູ້ເສຍຊີວິດທຸກມື້ ແລະ ນີ້ກໍຄືບັນຫາສາທາລະນະສຸກທີ່ລັດຖະບານແຫ່ງ ສປປ ລາວ ກຳລັງເລັ່ງແກ້ໄຂ. ໂດຍປະກາດໃຫ້ປະຊາຊົນເຂົ້າຮັບວັຄຊີນຕາມສະຖານບໍລິການທີ່ກຳນົດໄວ້ ແລະ ເລັ່ງສັກເຂັມກະຕຸ້ນ (ເຂັມ 3) ໃຫ້ພະນັກງານດ່ານໜ້າ ແລະ ປະຊາຊົນກຸ່ມເປົ້າໝາຍເພື່ອຫຼຸດຜ່ອນອັນຕະລາຍຫາກເກີດກໍລະນີລະບາດອີກຄັ້ງ.

​ຍັງເປັນສະຖານະການທີ່ຕ້ອງເຝົ້າລະວັງຢ່າງໃກ້ຊິດສຳລັບສະພາບລະບາດໂຄວິດ-19, ຊຶ່ງ ສປປ ລາວ ກໍຄືບັນດາປະເທດທົ່ວໂລກທີ່ຍັງຄົງຕົກຢູ່ພາຍໃຕ້ໄພຂົ່ມຂູ່ຂອງໄວຣັສອັກເສບປອດສາຍພັນໃໝ່, ທີ່ຂ້າປະຊາກອນໂລກໄປແລ້ວ 5.553.734 ລາຍ ໃນນັ້ນ, ສະເພາະຕົວເລກການຕາຍໃນປະເທດລາວແມ່ນ 527 ລາຍ, ສະຖິຕິດັ່ງກ່າວຍັງຄົງເປັນສັນຍານອັນຕະລາຍທີ່ທຸກຝ່າຍຕ້ອງເຝົ້າລະວັງ ແລະຍັງຄົງໄວ້ຊຶ່ງມາດຕະການປ້ອງກັນເພື່ອຫຼຸດຜ່ອນຄວາມສູນເສຍ.

​ສຳລັບ ສປປ ລາວ ກໍມີລາຍງານທີ່ຊີ້ໃຫ້ເຫັນສະຖານະການຕິດເຊືອໃໝ່ໄດ້ຜ່ອນຄາຍລົງແລ້ວ, ຈາກວັນທີ 20 ມັງກອນ 2022 ລະບຸຜູ້ຕິດເຊື້ອໃໝ່ 901 ຄົນ, ຫຼຸດມາເປັນ 676 ຄົນໃນວັນທີ 21, ຫຼຸດມາເປັນ 612 ຄົນໃນວັນທີ 22, ຫຼຸດມາເປັນ 417 ຄົນໃນວັນທີ 23 ແລະ ຫຼຸດມາເປັນ 340 ຄົນໃນວັນທີ 24 ມັງກອນ; ແຕ່ຫາກວ່າຕົວເລກຜູ້ເສຍຊີວິດລວມກັນໃນ 5 ວັນຜ່ານມາກໍສູງເຖິງ 20 ລາຍ ແລະ ນັ້ນກໍຖືວ່າ ສປປ ລາວ ຍັງມີສະຖິຕິການຕາຍຈາກໂຄວິດ-19 ຢູ່ໃນລະດັບທີ່ຕ້ອງເຝົ້າລະວັງ.

​ໂດຍ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຖະແຫຼງໃນວັນທີ 24 ມັງກອນນີ້ວ່າ: ຕໍ່ສະຖານະການຕິດເຊື້ອທີ່ຫຼຸດລົງ ແຕ່ທົ່ວສັງຄົມກໍບໍ່ຄວນປະໝາດ ແລະ ຕ້ອງມີການປ້ອງກັນຕົວກ່ອນອອກຈາກເຮືອນ, ດ້ວຍການໃສ່ຜ້າອັດປາກ-ດັງ ແລະ ໝັ່ນລ້າງມືລວມເຖິງຕ້ອງເວັ້ນໄລຍະຫ່າງ, ເພື່ອຫຼີກເວັ້ນເຊື້ອໄວຣັສຮ້າຍທີ່ກະຈາຍຢູ່ໃນສະພາບແວດລ້ອມ. ດັ່ງນັ້ນ, ທຸກຄົນຈິ່ງຕ້ອງປັບຕົວດ້ວຍການປະຕິບັດມາດຕະການປ້ອງກັນພະຍາດຢ່າງເຄັ່ງຄັດ, ເພື່ອທີ່ຈະສາມາດຢູ່ລອດປອດໄພທ່າມກາງອັນຕະລາຍທີ່ເບິ່ງດ້ວຍຕາເປົ່າບໍ່ເຫັນ.

แชร์