ເປີດກິດຈະກໍາຂີ່ລົດຖີບ ທ່ຽວຊົມທັດສະນິຍະພາບເມືອງຈອມເພັດ

ເປີດສາກຂຶ້ນຕັ້ງແຕ່ວັນທີ 21 ມັງກອນ 2022, ສຳລັບກິດຈະກໍາຂີ່ລົດຖີບທ່ຽວຊົມຫຼວງພຣະບາງ. ໂດຍເລີ່ມຈາກການຢ້ຽມຊົມທັດສະນິຍະພາບຂອງເມືອງຈອມເພັດ, ຊຶ່ງອອກສະຕາຣ໌ທຈາກຕະຫຼາດຊຸມບ້ານຊຽງແມນ ດິນແດນແຄມຝັ່ງແມ່ນໍ້າຂອງ ທີ່ຂຶ້ນຊື່ລືຊາອີກແຫ່ງໜຶ່ງຂອງແຂວງຫຼວງພຣະບາງ.

ໃນກິດຈະກຳຂີ່ລົດຖີບ ທ່ຽວຊົມສະຖານທີ່ທ່ອງທ່ຽວເມືອງຈອມເພັດ, ຊຶ່ງເປັນເມືອງເປົ້າໝາຍຈຸດທ່ອງທ່ຽວສີຂຽວທີ່ອົງການປົກຄອງແຂວງຫຼວງພຣະບາງ ໄດ້ກຳນົດເປີດການທ່ອງທ່ຽວໄລຍະທີ 1. ທັງນີ້, ເຂົ້າຮ່ວທເປີດງານໂດຍ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພຣະບາງ, ທ່ານ ນາງ ສຸດາພອນ ຄົມທະວົງ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ພ້ອມດ້ວຍການນຳຂອງແຂວງ ແລະ ເມືອງຈອມເພັດ, ມີຜູ້ປະກອບການທຸລະກິດທ່ອງທ່ຽວ ແລະ ສະມາຊິກສະມາຄົມຖີບລົດ.

ຂະບວນຂີ່ລົດຖີບຄັ້ງນີ້, ແມ່ນເລີ່ມຈາກຕະຫຼາດຊຸມຊົນບ້ານຊຽງແມນ ໄປຕາມເສັ້ນທາງການທ່ອງທ່ຽວສີຂຽວ, ຜ່ານວັດຊຽງແມນ, ວັດຈອມເພັດ, ວັດລ້ອງຄູນ, ວັດຖໍ້າສັກກະລິນ, ວັດຫາດສ້ຽວແລະ ວັດໜອງສະແກ້ວ, ໂດຍມີການຢຸດແວ່ທ່ຽວຊົມ ແລະ ຮັບຟັງການບັນຍາຍປະຫວັດຄວາມເປັນມາຂອງວັດວາອາຮາມ. ຈາກນັ້ນ, ກໍໄດ້ເດີນທາງໄປບ້ານຈ່ານເໜືອ ເຂົ້າຊົມສູນຫັດຖະກໍາເຄື່ອງປັ້ນດິນເຜົາ ແລະ ແວ່ຊົມຂົວອູ່ຂ້າມນໍ້າຈ່ານ.

ສໍາລັບກິດຈະກໍາຖີບລົດຄັ້ງຕໍ່ໄປ, ແມ່ນຈະເລີ່ມຈາກນະຄອນຫຼວງພຣະບາງ ໄປຫາເມືອງປາກອູ ແລະ ເມືອງງອຍ.

แชร์