ທັງນີ້, ກອງປະຊຸມໃຫຍ່ຜູ້ແທນ ຄັ້ງທີ IV ຂອງອົງຄະນະພັກສະພາແຫ່ງຊາດ ໄດ້ໄຂຂຶ້ນຢ່າງເປັນທາງການເມື່ອວັນທີ 21 ມັງກອນ 2022 ທີ່ຫ້ອງປະຊຸມຫ້ອງວ່າການສູນກາງພັກຕຶກເກົ່າ (ຫຼັກ 6) ພາຍໃຕ້ການເປັນປະທານຂອງ ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ເລຂາຄະນະພັກສະພາແຫ່ງຊາດ, ປະທານສະພາແຫ່ງຊາດ. ໂດຍການເຂົ້າຮ່ວມຂອງສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ມີບັນດາສະຫາຍຄະນະພັກສະພາແຫ່ງຊາດ ຊຸດທີ III, ຜູ້ແທນສົມບູນ, ສະມາຊິກພັກອາວຸໂສບໍານານ, ກໍາມະການກົມການເມືອງສູນກາງພັກ ແລະ ບັນດາສະຫາຍຕາງໜ້າຈາກຄະນະພັກຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ຫ້ອງວ່າການສໍານັກງານປະທານປະເທດ, ຫ້ອງວ່າການສໍານັກງານນາຍົກລັດຖະມົນຕີ, ສູນກາງແນວລາວສ້າງຊາດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ກະຊວງຍຸຕິທໍາ, ອົງການກວດສອບແຫ່ງລັດພ້ອມດ້ວຍສະມາຊິກພັກອາວຸໂສເຂົ້າຮ່ວມ.

 

ກອງປະຊຸມ, ໄດ້ສຸມໃສ່ພິຈາລະນາ ແລະ ຮັບຮອງເອົາບົດລາຍງານການເມືອງ, ແຜນການພັດທະນາໃນໄລຍະ 5 ປີຕໍ່ໜ້າ (2021-2025), ບົດສໍາຫຼວດການຊີ້ນໍາ-ນໍາພາລວມຂອງຄະນະພັກສະພາແຫ່ງຊາດຊຸດເກົ່າ. ນອກນັ້ນ, ຍັງມີການປະກອບຄໍາເຫັນຂອງຮາກຖານພັກ ແລະ ຕາງໜ້າອົງການຈັດຕັ້ງມະຫາຊົນພາຍໃຕ້ຫົວຂໍ້ “ການກໍ່ສ້າງພັກປອດໃສ, ເຂັ້ມແຂງ, ໜັກແໜ້ນ”, “ການເປັນເສນາທິການໃນວຽກບໍລິຫານ-ບໍລິຫານປິ່ນອ້ອມ”, “ຍົກສູງບົດບາດການນໍາພາຂອງພັກຕໍ່ກັບອົງການຈັດຕັ້ງມະຫາຊົນ”. ໂດຍຜູ້ແທນກອງປະຊຸມໃຫຍ່ໄດ້ສຸມສະຕິປັນຍາ, ໃຊ້ສິດປະຊາທິປະໄຕ ແລະຍົກສູງຄວາມຮັບຜິດຊອບເຂົ້າໃນການຄົ້ນຄວ້າພິຈາລະນາບັນຫາຕ່າງໆ ຕາມສິດ ແລະໜ້າທີ່ທີ່ກຳນົດໄວ້ໃນກົດລະບຽບຂອງພັກ.

 

ກອງປະຊຸມໃຫຍ່ຄັ້ງທີ IV ຂອງອົງຄະນະພັກສະພາແຫ່ງຊາດ,ໄດ້ຮັບຟັງການໂອ້ລົມໃຫ້ທິດເຍືອງທາງຂອງສະຫາຍເລຂາທິການໃຫຍ່ຄະນະບໍລິຫານງານພັກປະຊາຊົນປະຕິວັດລາວ, ໂດຍໄດ້ເນັ້ນໜັກໃຫ້ຄະນະບໍລິຫານງານພັກຊຸດໃໝ່ປັບປຸງອົງຄະນະພັກຄະນະນໍາສະພາແຫ່ງຊາດ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ແລະ ນໍາພາສະພາແຫ່ງຊາດ ໃຫ້ມີການຫັນປ່ຽນໃໝ່ຢ່າງເລິກເຊິ່ງ, ປະຕິບັດຖືກຕ້ອງສອດຄອ່ງກັບລັດຖະທໍາມະນູນ ແລະກົດໝາຍ.