ສຳລັບຂົງເຂດປ້ອງກັນຊາດ-ປ້ອງກັນຄວາມສະຫງົບ, ສືບຕໍ່ປະຕິບັດແນວທາງ ປກຊ-ປກສ ທົ່ວປວງຊົນຮອບດ້ານຢ່າງຕັ້ງໜ້າໂດຍເພີ່ມທະວີການສົມທົບແໜ້ນການເຄື່ອນໄຫວຂອງກຳລັງທຸກຂັ້ນກັບການມີສ່ວນຮ່ວມຂອງປວງຊົນ, ທັງເພີ່ມຄວາມເອົາໃຈໃສ່ໃນການຜັນຂະຫຍາຍ ແລະ ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໃຫ້ເຂົ້າສູ່ລວງເລິກ ແລະຈັດຕັ້ງປະຕິບັດຢ່າງຈິງຈັງ.

 

ຂົງເຂດເສດຖະກິດ, ສືບຕໍ່ສຸມໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ປະຈໍາປີ 2022 ແລະ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ກໍຄືການເປີດປະເທດ ເພື່ອຟື້ນຟູເສດຖະກິດ ໃນເງື່ອນໄຂການຢູ່ກັບໂຄວິດ-19 ຢ່າງແຂງແຮງ. ເພີ່ມຄວາມເອົາໃຈໃສ່ແກ້ໄຂບັນຫາສິ່ງກີດຂວາງຕ່າງໆໃຫ້ແກ່ການລົງທຶນພາຍໃນ ແລະຕ່າງປະເທດໃຫ້ມີການຫັນປ່ຽນແທ້ ແລະ ມີປະສິດທິຜົນສູງຂຶ້ນ. ເລັ່ງຈັດຕັ້ງປະຕິບັດບັນດາໂຄງການແຮ່ທາດ ແລະ ການເຮັດທົດລອງທຸລະກິດດິຈີຕອລທີ່ລັດຖະບານໄດ້ອະນຸຍາດໃຫ້ເຮັດທົດລອງໄປແລ້ວນັ້ນ, ໃຫ້ມີຄວາມຄືບໜ້າ ແລະມີປະສິດທິຜົນ. ສືບຕໍ່ປະຕິບັດມາດຕະການໃນການຈັດເກັບລາຍຮັບພາສີ, ອາກອນ ແລະຄ່າບໍລິການຕ່າງໆຢູ່ບັນດາດ່ານສາກົນເປັນທັນສະໄໝຕາມມະຕິວ່າດ້ວຍການຮັບຮອງແຜນການປະຕິບັດງານຕົວຈິງກ່ຽວກັບການຄຸ້ມຄອງລາຍຮັບ-ລາຍຈ່າຍງົບປະມານເປັນທັນສະໄໝໃນໄລຍະ 5 ປີ (2021-2025).

 

ລົງເລິກການປະເມີນແກ້ໄຂບັນຫານໍາເຂົ້າລົດບໍ່ຖືກຕ້ອງ ຕາມຄໍາສັ່ງຂອງນາຍົກລັດຖະມົນຕີ ວ່າດ້ວຍການກວດກາ ແລະປະຕິບັດມາດຕະການຕໍ່ຜູ້ທີ່ນໍາເຂົ້າ ແລະ ນໍາໃຊ້ຍານພາຫະນະທຸກປະເພດແບບບໍ່ຖືກຕ້ອງ. ສຸມໃສ່ການປັບປຸງລັດວິສາຫະກິດ ຕາມມະຕິເລກທີ 10/ລບ ລວມທັງການປັບປຸງການດໍາເນີນກິດຈະການຫວຍພັດທະນາລາວ. ເລັ່ງຜັນຂະຫຍາຍມະຕິຂອງລັດຖະບານວ່າດ້ວຍການຮັບຮອງ ແລະປະກາດໃຊ້ນະໂຍບາຍການນໍາໃຊ້ລົດໄຟຟ້າ ຢູ່ ສປປ ລາວ ເລກທີ 08/ລບ, ຖອດຖອນ ແລະ ປັບປຸງນິຕິກໍາຈາກຄໍາສັ່ງ ວ່າດ້ວຍການຂຶ້ນບັນຊີເຕົ້າໂຮມຊັບສິນ ທີ່ສານຕັດສິນຮິບເປັນຂອງລັດ ເລກທີ 07/ນຍ. ເພີ່ມທະວີຄວາມເອົາໃຈໃສ່ໃນການສົ່ງເສີມການຜະລິດ, ການປຸງແຕ່ງ, ການຄ້າ, ການບໍລິການ ແລະ ການທ່ອງທ່ຽວປິ່ນອ້ອມແລວທາງເສດຖະກິດລົດໄຟລາວ-ຈີນ ແລະເຂດອື່ນໆ ໃຫ້ຮັບປະກັນທາງດ້ານປະລິມານ ແລະ ຄຸນນະພາບທັງໃຫ້ກາຍເປັນແລວເສດຖະກິດຂອງປະເທດເຮົາ.

 

ສືບຕໍ່ເອົາໃຈໃສ່ຄຸ້ມຄອງລາຄາສິນຄ້າອຸປະໂພກ ແລະ ບໍລິໂພກ, ການນໍາເຂົ້າ-ສົ່ງອອກສິນຄ້າຕາມລະບຽບກົດໝາຍຢ່າງເຂັ້ມງວດ. ພ້ອມຊຸກຍູ້, ສົ່ງເສີມການຜະລິດ ແລະ ສົ່ງເສີມການຊົມໃຊ້ສິນຄ້າພາຍໃນໃຫ້ຫຼາຍຂຶ້ນ. ສືບຕໍ່ປັບປຸງແກ້ໄຂກົນໄກການຂຶ້ນທະບຽນ ແລະ ອອກໃບຕາດິນ ໃນຂອບເຂດທົ່ວປະເທດໃຫ້ມີຄວາມສະດວກວ່ອງໄວ ແລະ ຖືກຕ້ອງ. ຕັດສິນໃຈແກ້ໄຂບັນຫາຄົງຄ້າງທີ່ຜ່ານມາ, ເຊື່ອມໂຍງຂໍ້ມູນລະຫວ່າງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມກັບກະຊວງການເງິນ. ສືບຕໍ່ປັບປຸງ ແລະ ຍົກສູງຄຸນນະພາບການບໍລິການຜູ້ໂດຍສານທາງລົດໄຟ ແລະ ການບໍລິການຂົນສົ່ງສິນຄ້າໃຫ້ສະດວກ, ວ່ອງໄວ ແລະມີປະສິດທິຜົນສູງ. ສືບຕໍ່ຊີ້ນໍາໂຄງການກໍ່ສ້າງການຍົກລະດັບເສັ້ນທາງເລກທີ 13 ເໜືອ, ໂຄງການປັບປຸງຍົກລະດັບສະໜາມບິນຫ້ວຍຊາຍ ແຂວງບໍ່ແກ້ວ, ໂຄງການສະໜາມບິນໜອງຄ້າງ ແລະ ໂຄງການອື່ນໆ ໃຫ້ສໍາເລັດຕາມແຜນ.

 

ສືບຕໍ່ເປີດການຮຽນ, ການສອນທຸກຊັ້ນ, ທຸກສາຍ, ຜ່ານຫຼາຍຮູບແບບ ແລະສືບຕໍ່ປະເມີນສະຖານການສຶກສາທີ່ໄດ້ທົດລອງຮຽນແບບເຊິ່ງໜ້າຢູ່ໃນເຂດທີ່ຍັງມີການລະບາດຂອງພະຍາດໂຄວິດ-19, ເອົາໃຈໃສ່ປຸກລະດົມນັກຮຽນ-ນັກສຶກສາ ຕາມເກນອາຍຸທີ່ກະຊວງສາທາລະນະສຸກກຳນົດໄປສັກວັຄຊີນ. ເພີ່ມທະວີການຄຸ້ມຄອງ, ຕິດຕາມ, ກວດກາ ແລະຊຸກຍູ້ການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ, ເຝົ້າລະວັງ ແລະແກ້ໄຂການແພ່ລະບາດຂອງພະຍາດໂຄວິດ-19 ແລະພະຍາດຕາມລະດູການ.