ປະເດັນດັ່ງກ່າວຖືກຍົກຂຶ້ນເປັນໜຶ່ງເນື້ອໃນສຳຄັນທີ່ຖືກກ່າວເຖິງໃນກອງປະຊຸມທາງໄກ ເພື່ອການແລກປ່ຽນ ແລະ ສະຫຼຸບວຽກງານສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສປ ຈີນ ຄົບຮອບ 60 ປີ ແລະ ປີມິດຕະພາບ ລາວ-ຈີນ. ຕາງໜ້າໃຫ້ລັດຖະບານ ສປປ ລາວ ໂດຍສະຫາຍ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ແລະ ຝ່າຍ ສປ ຈີນ ຕາງໜ້າໂດຍສະຫາຍ ຈ່ຽງ ຈາຍຕຸ່ງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳ ສປປ ລາວ. ມີບັນດາຄະນະກົມ, ແຂກຖືກເຊີນ ແລະພະນັກງານກ່ຽວຂ້ອງຂອງສອງຝ່າຍເຂົ້າຮ່ວມ.

 

ໂດຍສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອທີ່ມີປະຫວັດສາດຍາວນານ, ການເປັນຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ (ບ້ານໄກ້ເຮືອນຄຽງທີ່ດີ, ສະຫາຍທີ່ດີ, ເພື່ອນມິດທີ່ດີ ແລະ ຄູ່ຮ່ວມມືທີ່ດີ) ແລະ ການເປັນຄູ່ຮ່ວມຊາຕາກໍາ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ຈີນ ຊຶ່ງໄດ້ຮັບການເສີມຂະຫຍາຍຢ່າງແໜ້ນແຟ້ນ ພາຍຫຼັງທີ່ໄດ້ສ້າງຕັ້ງສາຍພັວພັນທາງການທູດນໍາກັນໃນວັນທີ 25 ເມສາ 1961 ເປັນຕົ້ນມາ. ຕະຫຼອດໄລຍະທີ່ປະຕິບັດພາລະກິດຕໍ່ສູ້ ເພື່ອເອກະລາດທີ່ສຸດແສນລຳບາກ, ຂ້ຽວຂາດ, ຍືດເຍື້ອຍາວນານ, ຈົນເຖິງໄລຍະສ້າງສາ ແລະ ພັດທະນາປະເທດຊາດ, ການພົວພັນຮ່ວມມື ລະຫວ່າງສອງຊາດ ແມ່ນເຕັມໄປດ້ວຍການທົດສອບນາໆປະການຈາກການຜັນແປຂອງສະພາບແວດລ້ອມຂອງໂລກ, ຊຶ່ງມີທັງກາລະໂອກາດ ແລະ ສິ່ງທ້າທ້າຍຕ່າງໆ, ແຕ່ດ້ວຍຄວາມຖະນຸຖະໜອມ ແລະ ເອົາໃຈໃສ່ຢ່າງໃກ້ຊິດຂອງການນໍາພັກ-ລັດ, ໂດຍເລີ່ມຈາກປະທານ ໄກສອນ ພົມວິຫານ ແລະ ປະທານ ເໝົາ ເຈີຕຸງ ແລະ ສືບທອດໂດຍການນໍາແຕ່ລະລຸ້ນ ແຕ່ລະສະໄໝຕໍ່ໆມາ, ການພົວພັນຮ່ວມມືຂອງສອງຊາດ ໄດ້ຮັບການເພີ່ມພູນຄູນສ້າງໃຫ້ອຸດົມສົມບູນ ແລະ ຍົກລະດັບຂຶ້ນຢ່າງຮອບດ້ານ. ກົນໄກການຮ່ວມມືກັນທັງຂັ້ນສູນກາງ ແລະ ທ້ອງຖິ່ນ ໄດ້ຮັບການພັດທະນາຂຶ້ນຢ່າງມີປະສິດທິພາບ ແລະ ປະສິດທິຜົນ ນັບມື້ນັບຂະຫຍາຍຕົວເຂົ້າສູ່ລວງເລິກ, ຊຶ່ງສາມາດນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ.

 

ມາຮອດປັດຈຸບັນ, ມູນຄ່າການລົງທຶນຂອງຈີນຢູ່ລາວ ບັນລຸເຖິງ 3,55 ຕື້ໂດລາສະຫະລັດ, ມູນຄ່າການລົງທຶນຂອງວິສາຫະກິດຈີນ ຢູ່ ລາວ ບັນລຸ 15,49 ຕື້ໂດລາສະຫະລັດ, ລວມມີ 803 ໂຄງການ ແລະຖືກຈັດເປັນອັນດັບ 1 ຂອງການລົງທຶນຕ່າງປະເທດຢູ່ລາວ. ພິເສດ, ສອງປະເທດໄດ້ມີຜົນສໍາເລັດອັນຍິ່ງໃຫຍ່ຂອງໂຄງການກໍ່ສ້າງເສັ້ນທາງລົດໄຟ ລາວ-ຈີນ ແລະ ໂຄງການທາງດ່ວນ ວຽງຈັນ-ວັງວຽງ ທີ່ໄດ້ເປີດນຳໃຊ້ຢ່າງເປັນທາງການແລ້ວ, ຊຶ່ງເປັນການຈັດຕັ້ງປະຕິບັດຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ແລະ “ການສ້າງປະຊາຄົມຮ່ວມຊາຕາກຳຂອງມວນມະນຸດຂອງ ສປ ຈີນ”, ໂດຍສອດຄ່ອງກັບນະໂຍບາຍຂອງ ສປປ ລາວ ໃນການຫັນປະເທດທີ່ບໍ່ມີຊາຍແດນຕິດກັບທະເລ ມາເປັນປະເທດເຊື່ອມໂຍງເຊື່ອມຈອດກັບພາກພື້ນ ແລະ ສາກົນ, ເປັນການເປີດສັງກາດໃໝ່ແຫ່ງການພົວພັນຮ່ວມມືຄ້າຂາຍ, ການຂົນສົ່ງ, ການໄປມາຫາສູ່ກັນຂອງປະຊາຊົນສອງຊາດ ແລະປະຊາຊົນບັນດາປະເທດໃກ້ຄຽງໃຫ້ໄດ້ຮັບຄວາມສະດວກ ແລະຂະຫຍາຍຕົວຂຶ້ນເປັນກ້າວໆ.