ພົ້ນໂທດຄະດີປຸ້ນຊັບ-ອອກມາຈັດໜັກຄ້າຢາ

ຫຼັງຈາກຕິດຄຸກ 6 ປີ 6 ເດືອນ ຖານປຸ້ນຊັບພົນລະເມືອງ, ແຕ່ວ່າທ້າວ ນົງ ກໍບໍ່ເຂັດຫຼາບ. ເມື່ອໄດ້ຮັບອິດສະຫຼະພາບ ຫຼື ພົ້ນໂທດອອກມາແລ້ວ, ຜູ້ກ່ຽວກໍຫັນມາເຄື່ອນໄຫວຄ້າຂາຍຢາເສບຕິດ, ການກະທຳຜິດກົດໝາຍດັ່ງກ່າວຈິ່ງນຳພາທ້າວກັບເຂົ້າສູ່ຫ້ອງຂັງ.

ລາຍງານຂ່າວຈາກກຳລັງປ້ອງກັນຄວາມສະຫງົບ, ໃນວັນ 21 ມັງກອນ 2022  ໃຫ້ຮູ້ວ່າ: ເມື່ອວັນທີ 19 ມັງກອນຜ່ານມາ, ເຈົ້າໜ້າທີ່ພະແນກຕຳຫຼວດກອງບັນຊາການ ປກສ ເມືອງໄຊເສດຖາ ນະຄອນຫຼວງວຽງຈັນ ໄດ້ເຂົ້າຈັບຕົວ ທ້າວ ທະນົງສິນ ຫຼື ນົງ ອາຍຸ 34 ປີ ຢູ່ບ້ານທົ່ງພານທອງ ເມືອງສີສັດຕະນາກ ພ້ອມຂອງກາງຢາບ້າ 2 ພັນເມັດ, ເງິນ 1 ລ້ານກີບ ແລະ ລົດຈັກຍີ້ຫໍ້ MSX.

ຜ່ານການສືບສວນ-ສອບສວນຂະຫຍາຍຜົນ, ຈິ່ງສາມາດຈັບຕົວເປົ້າໝາຍຊັດທອດໄດ້ອີກ 1 ຄົນ ຊື່ທ້າວ ບຸນວາຈຽງ ຫຼື ບຸນ ອາຍຸ 35 ປີ ຢູ່ບ້ານ ທົ່ງພານທອງ ເມືອງສີສັດຕະນາກ ພ້ອມເງິນ 144.000 ກີບ, 71.000 ບາດ (ສະກຸນເງິນໄທ), ໂທລະສັບ 1 ໜ່ວຍ ແລະ ລົດຈັກຍີ້ຫໍ້ PCX ສີດຳບໍ່ມີປ້າຍ 1 ຄັນ.

ລາຍງານຂ່າວດຽວກັນໃຫ້ຮູ້ຕື່ມວ່າ: ທ້າວ ທະນົງສິນ ເຄີຍຖືກສານຕັດສິນລົງໂທດຕັດອິດສະຫຼະພາບມາແລ້ວ 6 ປີ 6 ເດືອນ ໃນສະຖານປຸ້ນຊັບພົນລະເມືອງ, ຊຶ່ງຜູ້ກ່ຽວໄດ້ຮັບການປ່ອຍຕົວໃນວັນທີ 28 ຕຸລາ 2021. ສ່ວນທ້າວ ບຸນວາຈຽງ ກໍເຄີຍຖືກສານຕັດສິນລົງໂທດຕັດອິດສະຫຼະພາບ 2 ປີ 6 ເດືອນ ໃນສະຖານເສບ ແລະ ມີຢາເສບຕິດໄວ້ໃນຄອບຄອງ, ຊຶ່ງໄດ້ຮັບການປ່ອຍຕົວເມື່ອເດືອນມີນາ 2021, ແຕ່ຫາກວ່າພວກກ່ຽວກໍບໍ່ເຂັດຫຼາບ ແລະສືບຕໍ່ເຄື່ອນໄຫວໃນສິ່ງຜິດກົດໝາຍຈົນພາໃຫ້ທັງສອງຖືກຈັບກຸມອີກຄັ້ງ.

แชร์