ລາວ ຢຸດຕິການສົ່ງຖ່ານດໍາ ໄປຂາຍຕ່າງປະເທດ

ກະຊວງກະສິກໍາ ແລະ ປ່າໄມ້, ມີແຈ້ງການໃຫ້ຢຸດຕິການອອກອະນຸຍາດເຄື່ອນຍ້າຍຖ່ານດໍາເພື່ອສົ່ງອອກໄປຕ່າງປະເທດຢ່າງເດັດຂາດ, ໃຫ້ດໍາເນີນການກວດກາ ແລະ ຂຶ້ນບັນຊີໂຮງງານຜະລິດຖ່ານ ແລະເຕົາເຜົາຖ່ານໃນຂອບເຂດແຂວງ. ຖ້າມີການອະນຸຍາດສ້າງຕັ້ງ ແລະດຳເນີນກິດຈະການໂດຍບໍ່ມີແຫຼ່ງທີ່ມາຂອງວັດຖຸດິບຈະແຈ້ງ ແລະ ບໍ່ຖືກຕ້ອງຕາມກົດໝາຍ, ໃຫ້ສັ່ງໂຈະການຜະລິດທັນທີ.

ທັງນີ້, ກະຊວງກະສິກໍາ ແລະ ປ່າໄມ້ ໄດ້ລະບຸວ່າ: ໃນໄລຍະຜ່ານມາ, ມີຫຼາຍທ້ອງຖິ່ນໄດ້ອະ ນຸຍາດເຄື່ອນຍ້າຍຖ່ານດໍາ ໂດຍອ້າງວ່າແມ່ນຖ່ານດໍາທີ່ຜະລິດຈາກໄມ້ປູກ ຊຶ່ງເປັນຂະບວນການ ແລະ ມີຈຳນວນຫຼວງຫຼາຍ ເພື່ອສົ່ງອອກໄປຕ່າງປະເທດ, ໂດຍຜ່ານສະຖານີລົດໄຟ, ດ່ານສາກົນ ແລະ ດ່ານປະເພນີອື່ນໆ. ຊຶ່ງຜ່ານການກວດກາຕົວຈິງ, ເຫັນວ່າມີການເກັບຊື້ຖ່ານດໍາທີ່ຜະລິດຈາກໄມ້ທໍາມະຊາດ, ຈາກເຕົາເຜົາຖ່ານທີ່ບໍ່ໄດ້ຮັບອະນຸຍາດສ້າງຕັ້ງ ແລະ ໄດ້ສວຍໂອກາດເຄື່ອນຍ້າຍປະປົນໄປນຳເປັນຈຳນວນຫຼວງຫຼາຍ.

ການເຄື່ອນຍ້າຍໃນລັກສະນະທີ່ຍົກມານັ້ນ, ກະຊວງກະສິກຳ ແລະ ປ່າໄມ້ ເຫັນວ່າ: ເປັນການທໍາລາຍປ່າໄມ້ທໍາມະຊາດຢ່າງໜັກໜ່ວງ ແລະ ເປັນການລະເມີດກົດໝາຍ ວ່າດ້ວຍປ່າໄມ້ ສະບັບເລກທີ 64/ສພຊ, ຂັດກັບຄໍາສັ່ງຂອງນາຍົກລັດຖະມົນຕີ ສະບັບເລກທີ 15/ນຍ, ຂໍ້ຕົກລົງຂອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະບັບເລກທີ 0851/ອຄ, ຄໍາແນະນຳຂອງລັດຖະມົນຕີ ກະຊວງກະສິກໍາ ແລະ ປ່າໄມ້ ສະບັບເລກທີ 0054/ກປ, ແຈ້ງການສະບັບເລກທີ 0073/ກປ, ແລະ ລະບຽບການອື່ນໆທີ່ກ່ຽວຂ້ອງ.

ສໍາລັບໂຮງງານຜະລິດຖ່ານ, ເຕົາເຜົາຖ່ານທີ່ບໍ່ໄດ້ຮັບອະນຸຍາດສ້າງຕັ້ງ ແລະ ດໍາເນີນກິດຈະການ, ແມ່ນໃຫ້ຍຸບເລີກພ້ອມທັງດໍາເນີນຄະດີຕາມກົດໝາຍ. ສຳລັບຖ່ານຂາວ ທີ່ຜະລິດຈາກໄມ້ຕິ້ວ, ຖ່ານອັດແທ່ງ ຫຼື ອັດເມັດຈາກຂີ້ເລື່ອຍແມ່ນສາມາດສົ່ງອອກໄດ້, ແຕ່ຕ້ອງປະຕິບັດໃຫ້ສອດຄ່ອງກັບຂໍ້ຕົກລົງສະບັບເລກທີ 0851/ອຄ, ລົງວັນທີ 14 ກັນຍາ 2021 (ມາດຕາ 1 ເອກະສານຊ້ອນທ້າຍ II, ຂໍ້ທີ 2.1 ແລະ 2.2) ບົນພື້ນຖານວັດຖຸດິບ (ໄມ້) ທີ່ນຳມາຜະລິດຖ່ານຕ້ອງໄດ້ຮັບອະນຸຍາດຕົວເລກແຜນການຂຸດຄົ້ນຈາກລັດຖະບານ. ພ້ອມນັ້ນ, ຜູ້ປະກອບການ ຫຼື ບໍລິສັດທີ່ດຳເນີນທຸລະກິດຜະລິດ ແລະ ສົ່ງອອກຖ່ານຂາວຕ້ອງໄດ້ຮັບອະນຸຍາດສ້າງຕັ້ງ, ຈົດທະບຽນຖືກຕ້ອງຕາມລະບຽບກົດໝາຍ, ຕ້ອງມີແຜນຊຸກຍູ້ ແລະ ສົ່ງເສີມການປູກໄມ້ຕິ້ວເພື່ອສະໜອງໃຫ້ແກ່ການຜະລິດຂອງຕົນຢ່າງຕໍ່ເນື່ອງ, ລວມທັງມີການຄຸ້ມຄອງແຫຼ່ງວັດຖຸດິບ ແລະການຄຸ້ມຄອງການສົ່ງອອກເພື່ອຫຼີກເວັ້ນບໍ່ໃຫ້ມີການສວຍໂອກາດດໍາເນີນການທີ່ບໍ່ສອດຄ່ອງກັບລະບຽບກົດໝາຍ. ທັງນີ້, ມອບໃຫ້ກົມກວດກາປ່າໄມ້ ແລະກົມປ່າໄມ້ສົມທົບກັບພາກສ່ວນທີ່ກ່ຽວຂ້ອງເຄື່ອນໄຫວຊຸກຍູ້, ຕິດຕາມການຈັດຕັ້ງປະຕິບັດແຈ້ງການສະບັບນີ້ຢ່າງເຂັ້ມງວດ.

แชร์