ຕາດເຍືອງ ຮັບລາງວັນມາດຕະຖານການທ່ອງທ່ຽວແບບຍືນຍົງ ອາຊຽນ

ສະຖານທີ່ທ່ອງທ່ຽວນໍ້າຕົກຕາດເຍືອງ ເມືອງປາກຊ່ອງ ແຂວງຈຳປາສັກ, ໄດ້ຮັບລາງວັນ ທ່ອງທ່ຽວແບບຢືນຍົງອາຊຽນປີ 2022, ໂດຍມີ ທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເຂົ້າຮ່ວມໃນພິທີມອບ-ຮັບຊຶ່ງຈັດຂຶ້ນໃນລະຫວ່າງວັນທີ 16-22 ມັງກອນ 2022 ທີ່ແຂວງສີຫະນຸ ປະເທດກໍາປູເຈຍ.

ລາງວັນການທ່ອງທ່ຽວແບບຍືນຍົງອາຊຽນ (ASEAN SustainableTourism Awards) ແມ່ນການລິເລີ່ມຂອງ ສປປ ລາວ, ໃນໄລຍະທີ່ປະເທດລາວ ເປັນປະທານອາ ຊຽນ ໃນປີ 2016. ສໍາລັບປີ 2022 ຖືເປັນການມອບລາງວັນຄັ້ງທີ 3, ໂດຍມີຈຸດປະສົງສ້າງແຮງຈູງໃຈໃຫ້ແກ່ຈຸດໝາຍປາຍທາງການທ່ອງທ່ຽວອາຊຽນ ແລະ ພາກສ່ວນທີ່ກ່ຽວຂ້ອງ, ເພື່ອຮ່ວມກັນພັດທະນາຜະລິດຕະພັນການທ່ອງທ່ຽວ ແລະ ເພື່ອຫຼຸດຜ່ອນບັນຫາດ້ານສິ່ງແວດລ້ອມ, ວັດທະນະທໍາ-ສັງຄົມ ແລະ ເສດຖະກິດ ທີ່ເກີດຈາກການຂະຫຍາຍຕົວຂອງການທ່ອງທ່ຽວຢ່າງວ່ອງໄວ, ຄຽງຄູ່ກັບການສ້າງແຮງຈູງໃຈທີ່ເປັນປະໂຫຍດໃຫ້ແກ່ພາກລັດ ແລະ ພາກທຸລະກິດ ເພື່ອປັບປຸງຜະລິດຕະພັນ ແລະ ການບໍລິການໃຫ້ໄດ້ມາດຕະຖານອາຊຽນ.

ສໍາລັບ ຫົວຂໍ້ລາງວັນ ການທ່ອງທ່ຽວແບບຍືນຍົງອາຊຽນ ປີ 2022 ແມ່ນ “ການທ່ອງທ່ຽວປອດໄພ” ໂດຍເນັ້ນໃສ່ມາດຕະການສະກັດກັ້ນ ແລະ ປ້ອງກັນການລະບາດຂອງພະຍາດໂຄວິດ-19 ໃນຜະລິດຕະພັນການທ່ອງທ່ຽວ, ໃຫ້ມີການພັດທະນາ ແລະ ການບໍລິການທີ່ມີຄວາມປອດໄພ. ຊຶ່ງບັນດາປະເທດອາຊຽນ ມີຜະລິດຕະພັນການທ່ອງທ່ຽວ ທີ່ໄດ້ຮັບລາງວັນທັງໝົດ 13 ລາງວັນ ລວມມີຜະລິດຕະພັນການທ່ອງທ່ຽວເຂດຕົວເມືອງ ແລະ ຜະລິດຕະພັນການທ່ອງທ່ຽວເຂດຊົນນະບົດ. ໃນນັ້ນ ສປປ ລາວ ໄດ້ຮັບ 2 ລາງວັນ ຄື: ສະຖານທີ່ທ່ອງທ່ຽວນໍ້າຕົກຕາດເຍືອງ ແຂວງຈໍາປາສັກ ໄດ້ຮັບລາງວັນ ຜະລິດຕະພັນການທ່ອງທ່ຽວເຂດຕົວເມືອງ ແລະ ສະຖານທີ່ທ່ອງທ່ຽວນໍ້າຕົກຕາດກວາງຊີ ແຂວງຫຼວງພຣະບາງ ໄດ້ຮັບລາງວັນຜະລິດຕະພັນການທ່ອງທ່ຽວເຂດຊົນນະບົດ.

ທ່ານ ນາງ ສອນທິດາ ອຸນາພົມ ຜູ້ອຳນວຍການບໍລິສັດ ພັດທະນາແຫຼ່ງທ່ອງທ່ຽວ ນໍ້າຕົກຕາດເຍືອງ ໃຫ້ຮູ້ວ່າ: ການໄດ້ຮັບລາງວັນໃນຄັ້ງນີ້, ຖືເປັນຂວັນກໍາລັງໃຈໃຫ້ແກ່ຜູ້ພັດທະນາ ແລະ ຊຸມຊົນ, ລວມເຖິງອຳນາດການປົກຄອງທ້ອງຖິ່ນ ແລະ ຂັ້ນສູນກາງ, ເຊິ່ງສ່ອງແສງໃຫ້ເຫັນຄວາມສາມັກຄີໃນການພັດທະນາ ແລະ ຂໍຊົມເຊີຍທຸກຂົງເຂດທີ່ໄດ້ຮັບລາງວັນຮ່ວມກັນ, ຊຶ່ງເປັນນິມິດໝາຍອັນດີໃນການພັດທະນາດ້ານການທ່ອງທ່ຽວແບບຍືນຍົງ.

ການມອບ-ຮັບລາງວັນ ມາດຕະຖານການທ່ອງທ່ຽວອາຊຽນ ລວມມີ 4 ປະເພດ ຄື: ມາດຕະຖານໂຮງແຮມຂຽວ ອາຊຽນ ປະເທດລະ 5 ລາງວັນ; ມາດຕະຖານເມືອງທ່ອງທ່ຽວສະອາດອາຊຽນ ປະເທດລະ 3 ລາງວັນ; ມາດຕະຖານສະຖານທີ່ຈັດງານອາຊຽນ ປະເພດຫ້ອງປະຊຸມ ປະເທດລະ 5 ລາງວັນ, ປະເພດສະຖານທີ່ຈັດງານວາງສະແດງປະເທດລະ 5 ລາງວັນ; ລາງວັນການທ່ອງທ່ຽວແບບຍືນຍົງອາຊຽນປະເທດລະ 2 ລາງວັນ.

แชร์