ປະທານ ອາຊຽນ 2022 ປະກາດນະໂຍບາຍຟື້ນການທ່ອງທ່ຽວ

ສົມເດັດ ອັກຄະຣະມະຫາເສນາບໍດີ ເດໂຊ ຮຸນເຊນ, ນາຍົກລັດຖະມົນຕີ ແຫ່ງ ກຳປູເຈຍ, ໄດ້ເປີດເຜີຍວ່າ: ພາລະກິດຫຼັກຂອງສະມາຄົມປະຊາຊາດແຫ່ງເອເຊຍຕາເວັນອອກສຽງໃຕ້ (ອາຊຽນ) ປີ 2022, ຄືການຕໍ່ສູ້ກັບການແພ່ລະບາດຂອງພະຍາດໂຄວິດ-19 ແລະ ມຸ່ງຟື້ນຟູພາກການທ່ອງທ່ຽວ.

ລາຍງານຂ່າວຕ່າງປະເທດເມື່ອວັນທີ 19 ມັງກອນ 2022 ລະບຸວ່າ: ໃນຖານະປະທານອາຊຽນປີນີ້, ນາຍົກລັດຖະມົນຕີ ແຫ່ງ ກຳປູເຈຍ, ໄດ້ກ່າວໃນລະຫວ່າງພິທີເປີດກອງປະຊຸມການທ່ອງທ່ຽວອາຊຽນ ປີ 2022 ຫຼື ASEAN Tourism Forum ຊຶ່ງຈັດຂຶ້ນເມື່ອວັນທີ 18 ມັງກອນຜ່ານມາ, ທີ່ເມືອງສີຫະນຸວິລລ໌, ເມືອງແຄມຝັ່ງທະເລຂອງກຳປູເຈຍ, ໂດຍກ່າວຜ່ານລະບົບທາງໄກ ຕໍ່ບັນດາລັດຖະມົນຕີການທ່ອງທ່ຽວ ແລະ ຕົວແທນຈາກປະເທດສະມາຊິກອາຊຽນ ວ່າ “ການມີສ່ວນຮ່ວມຄັ້ງນີ້, ສະແດງໃຫ້ເຫັນເຖິງຄວາມມຸ່ງໝັ້ນຮ່ວມກັນ, ຄວາມເປັນນໍ້າໜຶ່ງໃຈດຽວກັນ, ຕະຫຼອດຈົນມິດຕະພາບໃນການພັດທະນາ ແລະ ຟື້ນຟູພາກການທ່ອງທ່ຽວໃຫ້ຟື້ນຕົວຈາກວິກິດໂຄວິດ-19 ຢ່າງແທ້ຈິງ”.

ໂດຍນາຍົກລັດຖະມົນຕີ ຮຸນເຊນ, ໄດ້ກ່າວເສີມວ່າ “ກຳປູເຈຍ, ສະໜັບສະໜູນຢ່າງເຕັມທີ່ຕໍ່ແນວຄິດລິເລີ່ມໃນການກັບມາເປີດການທ່ອງທ່ຽວໃນອາຊຽນອີກຄັ້ງ, ເຊັ່ນດຽວກັບການຄືນມາເປີດທັງພູມີພາກເພື່ອຕ້ອນຮັບນັກທ່ອງທ່ຽວຕ່າງປະເທດ”.

แชร์