ປກສ ຫາດຊາຍຟອງ ສືບຕໍ່ມ້າງກຸ່ມແກ້ງຄ້າຢາ

ກອງບັນຊາການ ປກສ ເມືອງຫາດຊາຍຟອງ ນະຄອນຫຼວງວຽງຈັນ, ເລັ່ງຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ເພື່ອເຮັດໃຫ້ພື້ນທີ່ໃນຄວາມຮັບຜິດຊອບມີຄວາມສະຫງົບປອດໄພ. ຫຼ້າສຸດ, ໄດ້ສົມທົບກັບພາກສ່ວນກ່ຽວຂ້ອງອອກປະຕິບັດການຕິດຕາມເປົ້າໝາຍຢາເສບຕິດ, ຊຶ່ງສາມາດຈັບຜູ້ຂາຍຢາບ້າໄດ້ 1 ຄົນ ແລະຂະຫຍາຍຜົນຈັບຕົວໄດ້ອີກ 1 ຄົນ.

ພັທ ທັດສະພົງ ຫວັນມະນີຈັນ, ຮອງຫົວໜ້າກອງບັນຊາການ ປກສ ເມືອງຫາດຊາຍຟອງ, ຜູ້ຊີ້ນຳວຽກງານຕຳຫຼວດ, ໃຫ້ຮູ້ວ່າ: ໃນວັນທີ 19 ມັງກອນ 2022 ເວລາ 10:00 ໂມງ, ເຈົ້າໜ້າທີ່ພະແນກຕຳຫຼວດ ປກສ ເມືອງຫາດຊາຍຟອງ, ໄດ້ເຄື່ອນໄຫວມ້າງເປົ້າໝາຍຄ້າຂາຍຢາເສບຕິດຢູ່ບ້ານທ່າມ່ວງ, ເມືອງຫາດຊາຍຟອງ, ສາມາດຈັບຕົວ ທ້າວ ອານຸສັກ ຫຼື ລີ້ ອາຍຸ 24 ປີ, ກໍາມະກອນຢູ່ບ້ານພ້າວ ເມືອງຫາດຊາຍຟອງ, ພ້ອມຂອງກາງຢາບ້າ 1.753 ເມັດ, ໂທລະສັບໄອໂຟນ 7 ສີທອງ 1 ເຄື່ອງ ແລະ ລົດຈັກ 1 ຄັນ.

ທ້າວ ອານຸສັກ, ຮັບສາລະພາບຕໍ່ເຈົ້າໜ້າທີ່ວ່າ: ຢາບ້າທີ່ນຳມາຂາຍນັ້ນ, ແມ່ນຊື້ນຳທ້າວ ສຸກຂີ ອາຍຸ 30 ປີ, ຢູ່ບ້ານຮ່ອງແກ ເມືອງໄຊເຊດຖາ, ຊຶ່ງຊື້ມາເທື່ອລະ 1 ມັດ ຫຼື 2.000 ເມັດ, ແລ້ວ ນຳໄປຂາຍໃຫ້ກຸ່ມມົ້ວສຸມຢາເສບຕິດຢູ່ເຂດບ້ານທ່າມ່ວງ.

ຈາກນັ້ນ, ຕຳຫຼວດ ປກສ ເມືອງຫາດຊາຍຟອງ, ຈິ່ງສົມທົບກັບ ປກສ ກຸ່ມ 3 ສີສັງວອນ ແລະ ອົງການຈັດຕັ້ງບ້ານຮ່ອງແກ, ເຂົ້າຈັບຕົວທ້າວ ສຸກຂີ ໃນເວລາ 12:40 ຂອງວັນດຽວກັນ, ພ້ອມຂອງກາງຢາບ້າ 3.819 ເມັດ, ໂທລະສັບໄອໂຟນ 8 ສີທອງ 1 ເຄື່ອງ, ເງິນກີບ 1.753.000 ກີບ ແລະ 1.000 ບາດ (ສະກຸນເງິນໄທ).

ປັດຈຸບັນນີ້, ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ພະແນກຕໍາຫຼວດ ປກສ ເມືອງຫາດຊາຍຟອງ, ກໍາລັງດໍາເນີນການສືບສວນ-ສອບສວນຂະຫຍາຍຜົນຫາກຸ່ມແກ້ງຮ່ວມຂະບວນການມາລົງໂທດຕາມກົດໝາຍ.

แชร์