ພັນລະຍາປະທານປະເທດ ພ້ອມຄະນະ ຢ້ຽມຢາມອ້າຍນ້ອງທະຫານ ແລະ ປະຊາຊົນ ເມືອງຮົ່ມ

ທ່ານ ນາງ ນາລີ ສີສຸລິດ ພັນລະຍາປະທານປະເທດ, ພ້ອມດ້ວຍຄອບຄົວການນໍາຂັ້ນສູງ,ຮ່ວມກັບ ນັກທຸລະກິດລາວ, ລວມທັງສະມາຄົມຊ່ວຍເຫຼືອ ແລະ ບັນເທົາທຸກຈາກນະຄອນຫຼວງວຽງຈັນ. ໄດ້ໄປຢ້ຽມຢາມ ແລະ ມອບເຄື່ອງຊ່ວຍເຫຼືອໃຫ້ແກ່ອ້າຍນ້ອງທະຫານ ແລະ ປະຊາຊົນຊາວເມືອງຮົ່ມ ແຂວງໄຊສົມບູນ.

ໃຫ້ການຕ້ອນຮັບຄະນະພັນລະຍາປະທານປະເທດ, ເມື່ອລະຫວ່າງວັນທີ 17-18 ມັງກອນ 2022 ໂດຍທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ມີບັນດາການນຳເມືອງ ແລະ ພາກສ່ວນກ່ຽວຂອງ ເຂົ້າຮ່ວມ. ສໍາລັບເຄື່ອງຊ່ວຍເຫຼືອທີ່ນໍາມາມອບໃນຄັ້ງນີ້, ປະກອບມີ: ເຄື່ອງອຸປະໂພກ-ບໍລິໂພກ, ເຄື່ອງໃຊ້ໃນຄົວເຮືອນ, ເຄື່ອງນຸ່ງ, ເຄື່ອງບ່ອນນອນ ແລະ ເງິນສົດຈຳນວນໜຶ່ງ, ເພື່ອຊຸກຍູ້ອ້າຍນ້ອງທະຫານທີ່ພວມປະຕິບັດໜ້າທີ່ຢູ່ບັນດາປ້ອມເຂດຫາງໄກສອກຫຼີກ, ຊຶ່ງເຮັດໜ້າທີ່ຮັກສາຄວາມສະຫງົບສຸກແກ່ແມ່ປະຊາຊົນ. ການເຄື່ອນໄຫວຄັ້ງນີ້, ເປັນໜຶ່ງໃນຂະບວນການຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ, ຊຶ່ງສະແດງໃຫ້ເຫັນເຖິງຄວາມເປັນຫ່ວງເປັນໃຍຂອງຄອບຄົວການນຳຂັ້ນສູງ ທີ່ມີຕໍ່ອ້າຍນ້ອງທະຫານທີ່ພວມປະຕິບັດໜ້າທີ່ໃນການຮັກສາເຂດນໍ້າແດນດິນ ແລະ ຄວາມຢູ່ເຢັນເປັນສຸກຂອງປະຊາຊົນບັນດາເຜົ່າ.

ໂອກາດດັ່ງກ່າວ, ພັອ ເພັດລັງສີ ພິຈິດ ຫົວໜ້າຫ້ອງພາລາທິການ, ກອງບັນຊາການ-ທະຫານ ແຂວງໄຊສົມບູນ, ໄດ້ສະແດງຄວາມຂອບໃຈເປັນຢ່າງສູງມາຍັງ ທ່ານ ນາງ ນາລີ ສີສຸລິດ, ພ້ອມດ້ວຍຄະນະ, ທີ່ມີຄວາມເປັນຫ່ວງເປັນໃຍອ້າຍນ້ອງທະຫານ ແລະ ປະຊາຊົນ ທີ່ປະຕິບັດງານ ແລະ ດຳລົງຊີວິດຢູ່ເຂດຫ່າງໄກສອກຫຼີກ. ຊຶ່ງນໍ້າຈິດນໍ້າໃຈຈາກຄອບຄົວການນໍາ, ຈາກນັກທຸລະກິດລາວ ແລະ ສະມາຄົມຊ່ວຍເຫຼືອ ແລະ ບັນເທົາທຸກຖືເປັນຂວັນກຳລັງໃຈສຳຄັນໃຫ້ແກ່ກຳລັງປະກອບອາວຸດທີ່ປະຈຳການຢູ່ເມືອງຮົ່ມ, ລວມເຖິງປະຊາຊົນໃນເຂດດັ່ງກ່າວ.

แชร์