ໂດຍການເປັນປະທານຂອງສະຫາຍ ຄຳເຈນ ວົງໂພສີ ກຳມະການສູນກາງພັກ, ເລຂາຄະນະພັກ ຫສນຍ, ແລະ ໃຫ້ກຽດເຂົ້າຮ່ວມໂດຍ ສະຫາຍ ກິແກ້ວ ໄຂຄຳພິທູນ ກຳມະການກົມການເມືອງສູນກາງພັກມີຜູ້ຕາງໜ້າຈາກຄະນະກວດກາສູນກາງພັກ, ຄະນະຈັດຕັ້ງສູນກາງພັກ, ຫ້ອງວ່າການສູນກາງພັກ ພ້ອມດ້ວຍຜູ້ແທນສົມບູນ 149 ສະຫາຍ, ຍິງ 48 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ ຫສນຍ ຈຳນວນ 287 ສະຫາຍ, ຍິງ 102 ສະຫາຍ.

 

ກອງປະຊຸມ ໄດ້ລົງປະຊາມະຕິເປັນເອກະສັນຮັບຮອງເອົາຮ່າງລາຍງານການເມືອງ ແລະທິດທາງຄາດໝາຍສູ້ຊົນແຕ່ລະດ້ານ, ທັງວຽກງານກໍ່ສ້າງພັກ-ພະນັກງານ, ການນໍາພາຊີ້ນໍາວຽກງານອົງການຈັດຕັ້ງມະຫາຊົນ, ວຽກງານວິຊາສະເພາະ, ວຽກງານການພົວພັນຮ່ວມມືກັບຕ່າງປະເທດ ແລະຮ່າງບົດສຳຫຼວດການນຳພາລວມຂອງຄະນະພັກໂດຍໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການຊີ້ນຳ-ນຳພາ ແລະການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຜ່ານມາ.

ໄດ້ຮັບຮອງເອົາແຜນພັດທະນາວຽກງານວິຊາສະເພາະຂອງ ຫສນຍ ໄລຍະ 2021-2025 ເຊິ່ງເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ເປັນແຜນງານ, ແຜນວຽກລະອຽດ, ໃນນັ້ນໄດ້ຮັບຮອງເອົາ 4 ຄາດໝາຍ ແລະ 3 ໜ້າທີ່ຕົ້ນຕໍຂອງ ຫສນຍ ໃນຕໍ່ໜ້າ, ຊຶ່ງຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະບໍລິຫານງານພັກຊຸດໃໝ່ບົນພື້ນຖານຫຼັກການລວມສູນປະຊາທິປະໄຕ, ທັງຖືກຕ້ອງສອດຄ່ອງກັບມາດຕະຖານເງື່ອນໄຂທີ່ກຳນົດ.

 

ກອງປະຊຸມຄັ້ງປະຖົມມະລືກຂອງຄະນະບໍລິຫານງານພັກ ຄັ້ງທີ V ຂອງອົງຄະນະພັກ ຫສນຍ, ໄດ້ເປັນເອກະສັນກັນເລືອກຕັ້ງເອົາຄະນະປະຈໍາພັກ ຈຳນວນ 3 ສະຫາຍ ຄື: ສະຫາຍ ຄຳເຈນ ວົງໂພສີ ເປັນເລຂາຄະນະພັກ, ສະຫາຍ ຄຳລາວັນ ຈັນທະລາວັນ ເປັນຮອງເລຂາຄະນະພັກ ແລະ ສະຫາຍ ນາງ ທິບພະກອນ ຈັນທະວົງສາ ເປັນປະທານກວດກາພັກ, ສະຫາຍ ວິແກ້ວ ບຸບຜາວັນ ແລະ ສະຫາຍ ນາງ ດາລາພອນ ຄຳມູນເຮືອງ ເປັນຮອງປະທານກວດກາພັກ.

 

ໃນໂອກາດນີ້ ສະຫາຍ ກິແກ້ວ ໄຂຄໍາພິທູນ ໄດ້ໂອ້ລົມຕໍ່ກອງປະຊຸມໂດຍເນັ້ນໜັກໃຫ້ ຫສນຍ ຍົກສູງບົດບາດ, ໜ້າທີ່ ແລະ ຄວາມຮັບຜິດຊອບເຂົ້າໃນວຽກງານໂຄສົກລັດຖະບານ, ການສະໜອງຂໍ້ມູນຂ່າວສານ, ການໂຄສະນາເຜີຍແຜ່ຕ້ອງວ່ອງໄວ ແລະຮັບປະກັນຄຸນນະພາບ, ໂດຍສະເພາະການແກ້ຂ່າວທີ່ໂຈມຕີລັດຖະບານຕ້ອງຕອບແກ້ໄຂຢ່າງທັນການ, ຂໍ້ມູນຈາກລັດຖະບານ ຫາ ປະຊາຊົນ ແລະຈາກປະຊາຊົນເຖິງລັດຖະບານຕ້ອງຊັດເຈນ, ແທດເຖິງຕົວຈິງ ແລະ ທັນເວລາ. ສືບຕໍ່ຄົ້ນຄວ້າປັບປຸງການຈັດຕັ້ງ ແລະ ການເຄື່ອນໄຫວຂອງຕົນໃຫ້ແທດເໝາະກັບເງື່ອນໄຂໃໝ່ ແລະ ຮັບປະກັນການປະຕິບັດໜ້າທີ່ວຽກງານຂອງຕົນໄດ້ຕາມທິດກະທັດຮັດ, ມີປະສິດທິຜົນ, ການບໍລິຫານ-ການຈັດການໃຫ້ມີຄວາມວ່ອງໄວ, ຊັດເຈນ, ເດັດຂາດ, ໂປ່ງໃສ ແລະ ເປັນມືອາຊີບ. ບັນດາສະຫາຍໃນຄະນະພັກຊຸດໃໝ່ຈົ່ງສືບຕໍ່ຝຶກຝົນຫຼໍ່ຫຼອມຕົນເອງທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ຕັ້ງໜ້າຄົ້ນຄວ້າຮ່ໍາຮຽນ, ຍົກສູງຄວາມຮັບຜິດຊອບດ້ານເມືອງ; ເພື່ອຍົກລະດັບຄວາມຮູ້ຄວາມສາມາດຕິດພັນກັບການປັບປຸງແຜນການນໍາພາ ແລະວິທີເຮັດວຽກໃຫ້ດີຂຶ້ນເປັນກ້າວໆ.

 

ຂອບໃຈຂໍ້ມູນຂ່າວຈາກ: ຫສນຍ