ປີຜ່ານມາ ເສດຖະກິດໄຊຍະບູລີ ຂະຫຍາຍຕົວ 4,4%

ເຖິງແມ່ນວ່າໃນປິຜ່ານມາ, ແຂວງໄຊຍະບູລີ ຈະຜະເຊີນກັບສິ່ງທ້າທາຍຫຼາຍດ້ານ, ບໍ່ວ່າຈະເປັນການລະບາດພະຍາດໂຄວິດ-19, ໄພທໍາມະຊາດ (ນໍ້າຖ້ວມ), ການລະບາດຂອງພະຍາດສັດ ແລະ ສັດຕູພືດທໍາລາຍຜົນລະປູກ. ແຕ່ພາຍໃຕ້ການນຳພາ-ຊີ້ນຳຢ່າງໃກ້ຊິດຂອງຄະນະພັກ, ອົງການປົກຄອງທຸກຂັ້ນ ແລະ ບັນດາຂະແໜງການຕ່າງໆ, ຈິ່ງເຮັດໃຫ້ຫຼາຍຄາດໝາຍສູ້ຊົນສາມາດບັນລຸຕາມແຜນ ແລະ ມີລັກສະນະຫັນປ່ຽນຢ່າງຕັ້ງໜ້າ. ໂດຍສະເພາະແມ່ນດ້ານເສດຖະກິດ, ຊຶ່ງໝົດປີ 2021 ເສດຖະກິດຂອງແຂວງຂະຫຍາຍຕົວ 4,4%.

ທ່ານ ສົມຈິດ ຈັນທະວົງ ກໍາມະການປະຈໍາພັກແຂວງ, ຮອງເຈົ້າແຂວງໄຊຍະບູລີ, ຜູ້ຊີ້ນໍາວຽກງານເສດຖະກິດ-ສັງຄົມ ໄດ້ລາຍງານຕໍ່ກອງປະຊຸມ ຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ 5 ສະໄໝທີ VII ເມື່ອຕອນເຊົ້າຂອງວັນທີ 17 ມັງກອນ 2020 ວ່າ: ຕະຫຼອດ 1 ປີຜ່ານ ມາ, ອົງການປົກຄອງແຂວງ ໄດ້ສຸມໃສ່ນຳພາ-ຊີ້ນຳການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2021 ດ້ວຍຈິດໃຈບຸກທະລຸ, ຕິດພັນກັບການຜັນຂະຫຍາຍວາລະແຫ່ງຊາດ ໃນການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ໄດ້ເຮັດໃຫ້ເສດຖະກິດຂອງແຂວງສືບຕໍ່ຂະຫຍາຍຕົວໃນລະດັບ 4,4%, ລວມຍອດຜະລິດຕະພັນພາຍໃນ (GDP) ບັນລຸໄດ້ 11.041 ຕື້ກີບ ທຽບໃສ່ແຜນການປະຕິບັດໄດ້ 98%, ສະເລ່ຍຕໍ່ຫົວຄົນ 3.115 ໂດລາສະຫະລັດ. ດ້ານການເງິນແມ່ນໄດ້ສຸມໃສ່ສໍາຫຼວດຫົວໜ່ວຍທຸລະກິດ, ຈັດຖານລາຍຮັບຄືນໃໝ່, ຄຸ້ມຄອງຈັດເກັບລາຍຮັບໃຫ້ຄົບຖ້ວນ, ຫັນການຈັດເກັບໄປສູ່ລະບົບທັນສະໄໝ, ເພື່ອຮັບປະກັນການຮົ່ວໄຫຼງົບປະມານ ແລະ ສອດຄ່ອງກັບລະບຽບວິໄນການເງິນ, ຊຶ່ງສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 1.046,92 ຕື້ກີບ, ເທົ່າກັບ 92,26% ຂອງແຜນດັດແກ້ເພີ່ມຕົວເລກລາຍຮັບ ແລະ ປະຕິບັດລາຍຈ່າຍໄດ້ທັງໜົດ 531,19 ຕື້ກີບ.

ສໍາລັບແຜນການຕໍ່ໜ້າ, ແຂວງໄຊຍະບູລີ ຈະສືບຕໍ່ສ້າງແຂວງໃຫ້ມີຄວາມໝັ້ນຄົງ, ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ສຸມໃສ່ແກ້ໄຂບັນຫາຢາເສບຕິດ, ພັດທະນາເສດຖະກິດໃຫ້ສືບຕໍ່ຂະຫຍາຍຕົວຕໍ່ເນ່ື່ອງໄປພ້ອມກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ສ້າງການຫັນປ່ຽນໂຄງປະກອບເສດຖະກິດໄປຕາມທິດຫັນເປັນອຸດສາຫະກໍາ ແລະ ທັນສະໄໝ, ດ້ວຍການສົ່ງເສີມອຸດສາຫະກໍາຂະໜາດນ້ອຍ-ຂະໜາດກາງ ແລະ ການບໍລິການໃນຂະແໜງການທີ່ມີເງື່ອນໄຂ, ຍູ້ການຜະລິດພາຍໃນທົດແທນການນຳເຂົ້າ ແລະ ເປັນສິນຄ້າສົ່ງອອກຕາມທ່າແຮງຂອງແຂວງ, ແນໃສ່ເຊື່ອມໂຍງເຊື່ອມຈອດກັບແລວທາງເສດຖະກິດຂອງປະເທດເພື່ອນບ້ານ ແລະ ເສັ້ນທາງລົດໄຟລາວ-ຈີນ.

แชร์