ເລຂາທິການໃຫຍ່ ຢ້ຽມຢາມ-ໂອ້ລົມ ນາຍ ແລະ ພົນທະຫານ ກອງພົນທີ 4

ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ພ້ອມຄະນະ, ເຄື່ອນໄຫວຢ້ຽມຢາມ, ໂອ້ລົມ ນາຍ ແລະ ພົນທະຫານ ກອງພົນທີ4 ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວຄົບຮອບ 73 ປີ ( 20 ມັງກອນ 1949-20 ມັງກອນ 2022), ໂດຍການຕ້ອນຮັບຂອງການນຳແຂວງສະຫວັນນະເຂດ, ຄະນະພັກ-ຄະນະບັນຊາ, ພະນັກງານຫຼັກແຫຼ່ງທົ່ວກອງພົນທີ4, ມີ ບັນດາຄະນະນຳກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ອຳນາດການປົກຄອງແຂວງ ເຂົ້າຮ່ວມ.

ທັງນີ້ສະຫາຍເລຂາທິການໃຫຍ່, ໄດ້ຮັບຟັງລາຍງານຈາກ ສະຫາຍ ພົນຈັດຕະວາ ສົມຈິດ ກິດຕິຍະລາດ ຫົວໜ້າການເມືອງກອງພົນທີ 4 ກ່ຽວກັບຜົນງານການເຄື່ອນໄຫວຕະຫຼອດໃນໄລຍະທີຜ່ານມາ, ຊຶ່ງຄະນະພັກ-ຄະນະບັນຊາ ແລະ ພະນັກງານ-ນັກຮົບທົ່ວກອງພົນທີ 4 ໄດ້ເປັນເຈົ້າການເຄື່ອນໄຫວເຮັດໜ້າທີ່ການເມຶອງຢ່າງຕັ້ງໜ້າ, ໂດຍສະເພາະແມ່ນການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງປ້ອງກັນປະເທດວາງອອກ ໃຫ້ສໍາເລັດເປັນກ້າວໆມາ. ໃນນີ້, ໄດ້ປະສານສົມທົບກັບກົມກອງເພື່ອນ, ອໍານາດການປົກຄອງແຂວງ, ບັນດາເມືອງ, ເພື່ອຫັນເອົາກໍາລັງລົງກໍ່ສ້າງຮາກຖານການເມືອງ. ພັດທະນາຊົນນະບົດຮອບດ້ານ ແລະ ສ້າງທ່າສະໜາມປະຊາຊົນ, ໂດຍສະເພາະແມ່ນສຸມໃສ່ຂອບເຂດກົມກອງຮັບຜິດຊອບ ຊຶ່ງມີ 65 ບ້ານ 7 ເມືອງ ລົງເຮັດໜ້າທີ່ກໍ່ສ້າງຮາກຖານການເມືອງພັດທະນາຊົນນະບົດຮອບດ້ານໃນທ່າມກາງການລະບາດຂອງເຊື້ອພະຍາດໂຄວິດ-19. ພ້ອມນັ້ນ, ກໍໄດ້ສຸມໃສ່ການປັບປຸງພື້ນຖານໂຄງລ່າງປະຕິບັດຕາມທິດກໍ່ສ້າງກອງທັບໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ, ຄຽງຄູ່ກັບການກໍ່ສ້າງກອງປອດໃສ, ປອດໄພ, ປອດຄະດີ, ສຸມໃສ່ວຽກງານຮັບປະກັນແກ້ໄຂຊີວິດການເປັນຢູ່ບົນພື້ນຖານຍົກສູງນໍ້າໃຈເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນ.

ໂອກາດນີ້, ສະຫາຍເລຂາທິການໃຫຍ່ ໄດ້ໂອ້ລົມ ແລະ ສະແດງຄວາມຊົມເຊີຍຕໍ່ຜົນສໍາເລັດຫຼາຍດ້ານ ທີ່ກອງພົນທີ 4 ຍາດມາໄດ້ ໃນຕະຫຼອດໄລຍະຜ່ານມາ. ຢ່າງໃດກໍດີ, ເພື່ອຕອບສະໜອງກັບຄວາມຮຽກຮ້ອງຕ້ອງການກັບໜ້າທີ່ການເມືອງຂອງກົມກອງໃນໄລຍະໃໝ່, ຄະນະພັກ-ຄະນະບັນຊາ ພ້ອມພະນັກງານທຸກຂັ້ນຂອງກອງພົນທີ 4, ຕ້ອງຍົກສູງການນໍາພາຢ່າງຮອບດ້ານເພື່ອຮັບປະກັນໃຫ້ຂອບເຂດກົມກອງຮັບຜິດຊອບມີຄວາມສະຫງົບໂດຍພື້ນຖານ, ສຸມໃສ່ຫັນເອົາກໍາລັງລົງກໍ່ສ້າງຮາກຖານການເມືອງຢ່າງແຂງແຮງ, ເອົາໃຈໃສ່ປັບປຸງກໍ່ສ້າງກໍາລັງໃຫ້ໜັກແໜ້ນທາງດ້ານການເມືອງ-ນໍາພາແນວຄິດພາຍໃນມີຄວາມເຂັ້ມແຂງ, ຕັ້ງໜ້າເສີມຂະຫຍາຍມູນເຊື້ອພິລະອາດຫານ ດຸໝັ່ນຂະຫຍັນພຽນ ບົນຈິດໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ແນ່ໃສ່ເຮັດໃຫ້ຊີວິດການເປັນຢູ່ຂອງພະນັກງານ-ນັກຮົບ ນັບມື້ດີຂຶ້ນ, ເພື່ອພ້ອມກັນສ້າງກອງທັບໃຫ້ກາຍ ເປັນກອງທັບປະຕິວັດທີ່ມີແບບແຜນທັນສະໄໝເທື່ອລະກ້າວໆ. ພ້ອມນັ້ນ, ກໍ່ຕ້ອງຍົກສູງສະຕິລະວັງຕົວ, ກໍາແໜ້ນທຸກສະພາບການເພື່ອສະກັດກັ້ນສະພາບທີ່ອາດເກີດຂຶ້ນໃຫ້ທັນກັບເວລາ, ຍົກວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ສູງຂຶ້ນກ່ວາເກົ່າ, ແຕ່ປັດໄຈສໍາຄັນແມ່ນຕ້ອງຍົກສູງຄວາມສາມັກຄີເປັນເອກະພາບພາຍໃນໃຫ້ແໜ້ນແຟ້ນ, ມີແບບແຜນວີທີເຮັດວຽກຕາມຫຼັກການລວມສູນປະຊາທິປະໄຕເປັນໝູ່ຄະນະ, ແບ່ງບຸກຄົນຮັບຜິດຊອບຢ່າງຈະແຈ້ງ, ເປັນແບບຢ່າງໃນທຸກຂົງເຂດວຽກງານ, ພ້ອມກັນປັບປຸງກໍ່ສ້າງກໍາລັງຂອງຕົນໃຫ້ໜັກແໜ້ນເຂັ້ມແຂງ,ສືບຕໍ່ປັບປຸງກໍ່ສ້າງກົມກອງໃຫ້ເປັນລະບຽບຮຽບຮ້ອຍເພື່ອໃຫ້ມີບາດກ້າວໃໝ່, ສຸມໃສ່ຝຶກແອບຮໍ່າຮຽນທາງດ້ານສິນລະປະຍຸດ-ຍຸດທະວິທີເພື່ອໃຫ້ມີຄວາມຊໍານິຊໍານານ, ມີໄຫວພິກທີ່ຄ່ອງແຄ້ວ,ພ້ອມກັນເຮັດສໍາເລັດໜ້າທີ່ ທີ່ຂັ້ນເທີງມອບໝາຍໃຫ້.

ໂອກາດນີ້, ສະຫາຍເລຂາທິການໃຫຍ່, ກໍໄດ້ນຳເອົາວັດຖຸປັດໄຈຈໍານວນໜຶ່ງໄປມອບໃຫ້ກອງພົນທີ4. ຈາກນັ້ນ, ທັງຄະນະກໍໄດ້ໄປຢ້ຽມຢາມສູນເທຄນິກກອງພົນທີ 4 ອີກດ້ວຍ.

ຂອບໃຈຂໍ້ມູນຈາກ: ຂ່າວອອນໄລນ໌ ໜັງສືພິມກອງທັບ

แชร์