ລາວ-ຫວຽດນາມ ຮ່ວມພັດທະນາວົງການສຶກສາ ແລະກີລາ

ກະຊວງສຶກສາທິການ ແລະ ກີລາ, ສປປ ລາວ ພ້ອມດ້ວຍກະຊວງສຶກສາທິການ ແລະ ກໍ່ສ້າງ, ສສ ຫວຽດນາມ ໄດ້ບັນລຸຂໍ້ຕົກລົງການຮ່ວມມືຊ່ວຍເຫຼືອເຊິ່ງກັນແລະ ກັນ, ໂດຍການສົ່ງເສີມພັດທະນາຂົງເຂດວຽກງານການສຶກສາ ແລະ ກີລາ. ໂດຍສະເພາະກໍແມ່ນການນຳສົ່ງນັກກີລາ ສປປ ລາວ ໄປຝຶກຊ້ອມເປັນເວລາ 3 ເດືອນເພື່ອກຽມພ້ອມຮ່ວມແຂ່ງຂັນງານມະຫະກຳກິລາຊີເກມສ໌ ຄັ້ງທີ 31 ທີ່ ສສ ຫວຽດນາມ ຮັບກຽດເປັນເຈົ້າພາບໃນກາງປີນີ້.

​ໃນວາລະທີ່ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະກີລາ (ສສກ) ໄດ້ຕິດຕາມຄະນະຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໂອກາດເດີນທາງໄປຢ້ຽມຢາມ ສສ ຫວຽດນາມ ຢ່າງເປັນທາງການເມື່ອລະຫວ່າງວັນທີ່ 8-10 ມັງກອນ 2022, ໂດຍປະຕິບັດຕາມຂໍ້ຕົກລົງວ່າດ້ວຍແຜນການຮ່ວມມືລະຫວ່າງລັດຖະບານລາວ ແລະລັດຖະບານຫວຽດນາມ, ກ່ຽວກັບຂົງເຂດການສຶກສາ ແລະກີລາ. ໃນໂອກາດດັ່ງກ່າວ, ລັດຖະມົນຕີກະຊວງ ສສກ ກໍໄດ້ລົງນາມໃນເອກະສານຮ່ວມມື ປີ 2022 ຈໍານວນ 3 ສະບັບຄື: 1) ແຜນການຮ່ວມມືປະຈໍາປີ 2022 ລະຫວ່າງກະຊວງສຶກສາທິການ ແລະ ກີລາ ສປປ ລາວ  ແລະ ກະຊວງສຶກສາທິການແລະກໍ່ສ້າງ ສສ ຫວຽດນາມ. ເພື່ອ “ຍົກສູງຄຸນນະພາບແລະປະສິດທິຜົນການຮ່ວມມືລະຫວ່າງ ລາວ-ຫວຽດນາມ ໃນຂົງເຂດການສຶກສາ ແລະ ພັດທະນາຊັບພະຍາກອນມະນຸດ ໄລຍະ 2011-2030”. 2) ໄດ້ເຊັນຂໍ້ຕົກລົງວ່າດ້ວຍການຜັນຂະຫຍາຍໂຄງການກໍ່ສ້າງສູນຄົ້ນຄວ້າວິທະຍາສາດ ແລະ ຝຶກອົບຮົມ ທີ່ມະຫາວິທະຍາໄລແຫ່ງຊາດ, ກະຊວງສຶກສາທິການ ແລະ ກີລາ ສປປ ລາວ ແລະ ມະຫາວິທະຍາໄລແຫ່ງຊາດ ສສ ຫວຽດນາມ. 3) ຂໍ້ຕົກລົງວ່າດ້ວຍການກໍ່ສ້າງໂຮງຮຽນສາມັນຊົນເຜົ່າແຂວງຄຳມ່ວນ ລະຫວ່າງກະຊວງສຶກສາທິການ ແລະກີລາ ສປປ ລາວ ແລະ ຄະນະກຳມະການປະຊາຊົນແຂວງກວາງບິ່ງ. 

ໃນວາລະດຽວກັນ, ຄະນະວິຊາການຂັ້ນສູງຂອງສອງຝ່າຍຍັງໄດ້ພົບປະກັບກະຊວງສຶກສາທິການ ແລະກໍ່ສ້າງ ແລະກະຊວງວັດທະນະທຳ, ກີລາ ແລະທ່ອງທ່ຽວ ສສ ຫວຽດນາມ, ເພື່ອຂະຫຍາຍຂອບການຮ່ວມມືໃນວຽກງານສຶກສາ ແລະພັດທະນາຊັບພະຍາກອນມະນຸດໃນຕໍ່ໜ້າໃຫ້ມີຄຸນນະພາບສູງ, ທັງເພື່ອດຳເນີນແຜນນຳສົ່ງນັກກີລາ ສປປ ລາວ ໄປຝຶກຊ້ອມເປັນເວລາ 3 ເດືອນ ເພື່ອກຽມແຂ່ງຂັນໃນມະຫະກຳກີລາຊີເກມ ຄັ້ງທີ 31 ທີ່ ສສ ຫວຽດນາມໃນກາງປີນີ້.

ຄຽງຄູ່ກັນນັ້ນ, ກໍຕ້ອງໄດ້ມີການສືບຕໍ່ປະສານກັບກະຊວງວິທະຍາສາດ ແລະເຕັກໂນໂລຊີ, ກະຊວງແຮງງານ, ຜູ້ເສຍອົງຄະ ແລະກິດຈະການສັງຄົມ ແລະສະພາບັນດິດວິທະຍາສາດ ແລະເຕັກໂນໂລຊີ, ຊຶ່ງໃນລາຍລະອຽດດັ່ງກ່າວ, ພາກສ່ວນວິທະຍາສາດແມ່ນຈະໄດ້ລົງເລິກຕື່ມກັບຝ່າຍຫວຽດນາມເພື່ອໃຫ້ໄດ້ບັນຈຸເນື້ອໃນການຮ່ວມມືເຂົ້າໃນກອງປະຊຸມ ຄັ້ງທີ 45.

ຂອບໃຈຂໍ້ມູນຈາກ: ຫ້ອງການ ກະຊວງ ສສກ

แชร์