ມ້າງຄະດີສໍ້ໂກງຊັບ ເຜີຍຄວາມເສຍຫາຍລົດໃຫຍ່ 40 ຄັນ

ເຈົ້າໜ້າທີ່ ປກສ ເມືອງ ຫາດຊາຍຟອງ ນະຄອນຫຼວງວຽງຈັນ, ເຜີຍປະຕິບັດການມ້າງຄະດີຍັກຍອກສໍ້ໂກງຊັບ ແລະ ຊຸກເຊື່ອງຄ້າຂາຍຊັບຜິດກົດໝາຍ, ຊຶ່ງສາມາດຈັບຜູ້ຖືກຫາໄດ້ 1 ຄົນ, ເບື້ອງຕົ້ນກວດພົບລົດໃຫຍ່ຖືກຍັກຍອກ 40 ຄັນ. ໃນນັ້ນ, ຜູ້ເສຍຫາຍໄດ້ເຂົ້າແຈ້ງຄວາມແລ້ວ 21 ຄົນ, ຂະນະທີ່ການເກັບກູ້ລົດໃຫຍ່ແມ່ນໄດ້ຄືນແລ້ວ 23 ຄັນ, ພ້ອມນັ້ນ ເຈົ້າໜ້າທີ່ກໍພວມເລັ່ງຂະຫຍາຍຜົນຫາຜູ້ຮ່ວມຂະບວນການ.

ອີງຕາມການລາຍງານຂອງໜັງສືພິມປ້ອງກັນຄວາມສະຫງົບ, ໄດ້ອ້າງການເປີດເຜີຍໂດຍ ພັທ ທັດສະພົງ ຫວັນມະນີຈັນ ຮອງຫົວໜ້າກອງບັນຊາການ ປກສ ເມືອງຫາດຊາຍຟອງ ເມື່ອວັນທີ 17 ມັງກອນ 2022 ວ່າ: ເບື້ອງຕົ້ນ, ເຈົ້າໜ້າທີ່ ພະແນກຕໍາຫຼວດ ປກສ ເມືອງຫາດຊາຍຟອງ, ໄດ້ຮັບຄໍາຮ້ອງຟ້ອງຈາກ ທ້າວ ວົງກົດ ອາຍຸ 29 ປີ ອາຊີບພະນັກງານຢູ່ບ້ານດ່ານຊ້າງ ເມືອງໄຊທານີ ນະຄອນຫຼວງວຽງຈັນ, ລະບຸ ຖືກທ້າວ ທົງໄຊ (ເບີດ) ອາຍຸ 35 ປີ ອາຊີບຄ້າຂາຍຢູ່ບ້ານທ່ານາ ເມືອງຫາດຊາຍຟອງ, ຍັກຍອກເອົາລົດໃຫຍ່ໂຕໂຢຕ້າ ຟໍຣ໌ຈູນເນີຣ໌ ໝາຍເລກທະບຽນ 7777 ກຳ ແພງນະຄອນ.

ຈາກນັ້ນ, ຄະນະກອງບັນຊາການ ປກສ ເມືອງຫາດຊາຍຟອງ ຈິ່ງໄດ້ແຕ່ງຕັ້ງເຈົ້າໜ້າທີ່ວິຊາສະເພາະ, ເຄື່ອນໄຫວສືບສວນ, ເກັບກຳຂໍ້ມູນ ແລະ ເຫັນວ່າມີຂໍ້ມູນຄວາມຈິງຕາມການຮ້ອງຟ້ອງ. ຈິ່ງໄດ້ເປີດການສືບສວນ-ສອບສວນ ແລະ ຮຽກຕົວຜູ້ຖືກຫາມາພົບ, ແຕ່ຜູ້ຖືກຫາກໍບໍ່ມາຕາມໝາຍຮຽກ, ຈິ່ງດໍາເນີນການຈັບຕົວໃນວັນທີ 18 ທັນວາ 2021.

ຊຶ່ງທ້າວ ທົງໄຊ ໄດ້ໃຫ້ການຮັບສາລະພາບໃນເບື້ອງຕົ້ນວ່າ: ນັບຕັ້ງແຕ່ເດືອນມີນາ 2021 ເປັນຕົ້ນມາ ໄດ້ເຄື່ອນໄຫວກໍ່ເຫດຍັກຍອກ, ສໍ້ໂກງລົດໃຫຍ່ຈຳນວນຫຼາຍສິບຄັນ, ດ້ວຍວິທີປະກາດໂຄສະນາທາງສື່ອອນໄລນ໌ວ່າ ຮັບເຊົ່າ ແລະ ຮັບຊວດຈຳລົດໃຫຍ່ໂດຍໃຫ້ຄ່າເຊົ່າລາຄາສູງ. ເມື່ອໄດ້ລົດມາ, ກໍໄດ້ນຳໄປຂາຍຕໍ່ດ້ວຍການເຄື່ອນໄຫວຮ່ວມກັບໝູ່ 2 ຄົນຄື: ທ້າວ ລໍາເລີ ອາຍຸ 32 ປີ ອາຊີບຄ້າຂາຍຢູ່ບ້ານແກ້ວກູ່ ເມືອງແກ້ວອຸດົມ ແຂວງວຽງຈັນ ແລະ ນາງ ຈັນໄດ ອາຍຸ 31 ປີ ຢູ່ບ້ານທາງໂຄ້ງ ເມືອງປາກງື່ມ ນະຄອນຫຼວງວຽງຈັນ (ທັງສອງແມ່ນຜົວເມຍກັນ).

ມາຮອດປັດຈຸບັນ, ມີຜູ້ເສຍຫາຍເຂົ້າມາແຈ້ງຄວາມຕໍ່ເຈົ້າໜ້າທີ່ ປກສ ເມືອງຫາດຊາຍຟອງ ແລ້ວ 21 ຄົນ, ຜົນເສຍຫາຍມີລົດໃຫຍ່ຈຳນວນ 40 ຄັນ, ໃນນັ້ນ ລົດກະບະໂຕໂຢຕ້າ 26 ຄັນ, ລົດເກັ໋ງໂຕໂຢຕ້າ 4 ຄັນ, ກະບະຟຣ໌ອດແຣນເຈີຣ໌ 3 ຄັນ ແລະ ກະບະນິສສັນ 3 ຄັນ, ລົດເກັ໋ງຮຸນໄດ 2 ຄັັນ, ລົດເກັ໋ງເກຍ 1 ຄັນ ແລະ ກະບະຮຸນໄດ 1 ຄັນ. ຊຶ່ງຜູ້ຖືກຫາຮັບຊວດຈຳຈາກຜູ້ເສຍຫາຍແລ້ວເອົາໄປຂາຍຕໍ່ 5 ຄັນ, ຮັບເຊົ່າໂດຍໃຫ້ຄ່າເຊົ່າສູງ ແລ້ວນຳໄປຂາຍຕໍ່ 35 ຄັນ, ໂດຍເຈົ້າໜ້າທີ່ສາມາດເກັບກູ້ຄືນມາແລ້ວ 23 ຄັນ (ຍັງເກັບຮັກສາໄວ້ຢູ່ຫ້ອງການ ປກສ ເມືອງຫາດຊາຍຟອງ).

ຢ່າງໃດກໍຕາມ, ການເຄື່ອນໄຫວກະທຳຜິດດັ່ງກ່າວ ກໍຄາດວ່າ: ຍັງມີຜູ້ຮ່ວມຂະບວນການອີກຫຼາຍຄົນ, ຊຶ່ງເຈົ້າໜ້າທີ່ ກຳລັງເລັ່ງ ສືບສວນ-ສອບສວນຂະຫຍາຍຜົນ, ສ່ວນຜູ້ຮ່ວມຂະບວນການ 2 ຄົນທີ່ຜູ້ຖືກຫາຊັດຖອດເຖິງນັ້ນ,  ປັດຈຸບັນ ເຈົ້າໜ້າທີ່ກໍພວມດຳເນີນການຕາມຄຳສັ່ງຈັບຕົວຂອງອົງການໄອຍະການປະຊາຊົນເຂດ IV.

แชร์