5 ແຂວງໃຈກາງ ສະຫຼຸບວຽກງານຄວາມສະຫງົບ

ຄະນະຊີ້ນຳແກ້ໄຂຄວາມບໍ່ສະຫງົບຈຸດສຸມໃຈກາງ, ໄດ້ສໍາເລັດການຈັດປະຊຸມສະຫຼຸບວຽກງານຮັກສາຄວາມສະຫງົບ 5 ແຂວງ ເຂດໃຈກາງ ປະຈຳປີ 2021 ແລະ ວາງທິດທາງແຜນການໃນປີ 2022 ວາລະດັ່ງກ່າວຈັດຂຶ້ນເມື່ອອາທິດທີ່ຜ່ານມາທີ່ສະໂມສອນກອງບັນຊາການທະຫານແຂວງໄຊສົມບູນ, ພາຍໃຕ້ການເປັນປະທານຂອງ ພົອ ຈັນສະໝອນ ຈັນຍາລາດ ກຳມະການກົມການເມືອງສູນການພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ທັງເປັນຄະນະຊີ້ນໍາແກ້ໄຂຄວາມບໍ່ສະຫງົບຈຸດສຸມໃຈກາງ, ມີ ພົຕ ຄຳລຽງ ອຸທະໄກສອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງໄຊສົມບູນ, ບັນດາທ່ານຄະນະແກ້ໄຂຄວາມບໍ່ສະຫງົບ 5 ແຂວງຈຸດສຸມເຂດໃຈກາງຄື: ໄຊສົມບູນ, ບໍລິຄຳໄຊ, ວຽງຈັນ, ຊຽງຂວາງ ແລະຫຼວງພຣະບາງ ເຂົ້າຮ່ວມ.

ພົຈວ ສອນທອງ ແກ້ວລໍຄຳ ຫົວໜ້າກົມສູ້ຮົບ, ກົມໃຫຍ່ເສນາທິການກອງທັບໄດ້ຂຶ້ນຜ່ານບົດສະຫຼຸບ ແລະທິດທາງແຜນການ. ຊຶ່ງຕະຫຼອດໄລຍະ 1 ປີ ຜ່ານມາ, ຄະນະຊີ້ນໍາແກ້ໄຂຄວາມບໍ່ສະຫງົບຈຸດສຸມເຂດໃຈກາງໄດ້ເຄື່ອນໄຫວເຮັດສຳເລັດໜ້າທີ່ວຽກງານໃນຫຼາຍດ້ານ, ເປັນຕົ້ນແມ່ນໄດ້ເອົາໃຈໃສ່ຫັນເອົາກຳລັງລົງກໍ່ສ້າງຮາກຖານການເມືອງຕາມທິດຂອງຂັ້ນເທິງ, ນຳເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດໄປເຜີຍແຜ່ໃຫ້ອຳນາດການປົກຄອງຕະຫຼອດຮອດປະຊາຊົນບັນດາເຜົ່າ ເພື່ອສ້າງຄວາມສາມັກຄີປອງດອງ ແລະ ປະກອບສ່ວນຕັ້ງໜ້າເຂົ້າໃນວຽກງານ ປກຊ-ປກສ, ແກ້ໄຂຊີວິດການເປັນຢູ່ໃຫ້ດີຂຶ້ນເທື່ອລະກ້າວ ແລະ ສ້າງບ້ານ ປກຊ-ປກສ ໄດ້ຈຳນວນໜຶ່ງ. ເອົາໃຈໃສ່ສຶກສາອົບຮົບແກ້ໄຂບັນຫາປະກົດການຫຍໍ້ທໍ້ຕ່າງໆ, ປັບປຸງກົງຈັກອຳນາດການປົກຄອງ-ກອງຫຼອນ ເຄື່ອນໄຫວຕາມພາລະບົດບາດ, ສິດ, ແລະ ໜ້າທີ່ຢ່າງແຂງແຮງ ແລະມີປະສິດທິພາບສູງ. ສົມທົບກັບພາກສ່ວນທີ່ກ່ຽວຂ້ອງລົງກວດກາ, ເກັບກຳຂໍ້ມູນຂຶ້ນທະບຽນສຳມະໂນຄົວ, ການຈັບຈອງທີ່ດິນ, ຕັ້ງສະນຳ-ຄັງສັດຢູ່ເຂດຫວງຫ້າມ ແລະເກັບກູ້ອາວຸດເສິກ-ອາວຸດລ່າເນື້ອ ແລະເຄື່ອງທີຜິດກົດໝາຍອີກຈຳນວນໜຶ່ງ.

ສັງລວມແລ້ວໃນໜຶ່ງປີຜ່ານມາ, ຄະນະຊີ້ນໍາສາມາດເຮັດສໍາເລັດໜ້າທີ່ ແລະຍາດໄດ້ຜົນງານຫຼາຍດ້ານ. ພົ້ນເດັ່ນແມ່ນສາມາດສະກັດກັ້ນ, ແກ້ໄຂບັນດາໜໍ່ແໜງກໍ່ຄວາມບໍ່ສະຫງົບ ແລະປະກົດການຫຍໍ້ທໍ້ຕ່າງໆຢູ່ 5 ແຂວງເຂດໃຈກາງ, ມີສະຖຽນລະພາບທາງດ້າການເມືອງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ ແລະມີຄວາມສະຫງົບໂດຍພື້ນຖານ. ເຮັດໃຫ້ບັນຍາກາດການໄປມາ-ຄ້າຂາຍ ແລະການຜະລິດແກ້ໄຂຊີວິດການເປັນຢູ່ຂອງປະຊາຊົນດີຂຶ້ນເປັນກ້າວໆ, ສ້າງເງື່ອນໄຂເອື້ອອຳນວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມໄດ້ຂະຫຍາຍຕົວຢ່າງຕໍ່ເນື່ອງ. ພ້ອມນີ້, ບັນດາຜູ້ຕາງໜ້າ 5 ແຂວງເຂດໃຈກາງກໍໄດ້ພ້ອມກັນປະກອບຄຳຄິດເຫັນໃສ່ບົດສະຫຼຸບຢ່າງກົງໄປກົງມາເພື່ອຄວາມເປັນເອກະພາບໃນການຈັດຕັ້ງປະຕິບັດ ແລະເຮັດໃຫ້ວຽກງານໃນຕໍ່ໜ້າໄດ້ຮັບໝາກຜົນຫຼາຍຍິ່ງຂຶ້ນ.

ທັງນີ້, ລັດຖະມົນຕີກະຊວງປ້ອງກັນປະເທດໄດ້ໃຫ້ກຽດໂອ້ລົມຕໍ່ກອງປະຊຸມ, ໂດຍທ່ານໄດ້ສະແດງຄວາມຊົມເຊີຍຕໍ່ຜົນສຳເລັດຂອງບັນດາສະຫາຍທີ່ຍາດມາໄດ້ໃນໄລຍະຜ່ານມາ. ພ້ອມທັງເນັ້ນໜັກໃຫ້ເອົາໃຈໃສ່ເພີ່ມທະວີວຽກງານເຄື່ອນໄຫວບາງດ້ານໃຫ້ມີປະສິດທິພາບ, ປະສິດທິຜົນຂຶ້ນຕື່ມ.ໂດຍສຸມໃສ່ສຶກສາອົບຮົບປະຊາຊົນບັນດ່າເຜົ່າ ໃຫ້ຮັບຮູ້ ແລະເຂົ້າໃຈຕໍ່ແນວທາງນະໂຍບາຍຂອງພັກ, ກົດໝາຍຂອງລັດເພື່ອສ້າງຄວາມເປັນເອກະພາບທາງດ້ານຄວາມຄິດ, ຫັນປ່ຽນພຶດຕິກຳ, ຫັນເອົາກຳລັງລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານຕິດພັນກັບວຽກງານສາມສ້າງ,ເຮັດໃຫ້ປະຊາຊົນມີສ່ວນຢ່າງຕັ້ງໜ້າໃນການປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບເພື່ອຮັບປະກັນໃຫ້ 5 ແຂວງເຂດໃຈກາງມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບປອດໄພ, ຄຽງຄູ່ກັບການພັດທະນາເສດຖະກິດ-ສັງຄົມ ແລະແກ້ໄຂຄວາມທຸກຍາກຂອງປະຊາຊົນໃຫ້ດີຂຶ້ນເປັນກ້າວໆ.

แชร์