ລົດໄຟລາວ-ຈີນ ເພີ່ມຈຸດບໍລິການຂົນສົ່ງສິນຄ້າ ສະຖານີວັງວຽງ ເປັນແຫ່ງທີ 3

ໃນໄລຍະຜ່ານມາ, ການຂົນສົ່ງສິນຄ້າຜ່ານເສັ້ນທາງລົດໄຟ ລາວ-ຈີນ ແມ່ນໄດ້ເປີດບໍລິການ 2 ແຫ່ງຄື: ສະຖານີຂົນສົ່ງສິນຄ້າວຽງຈັນໃຕ້ ແລະ ສະຖານີຂົນສົ່ງສິນຄ້ານາເຕີຍ, ຜ່ານການບໍລິການເຫັນວ່າ ສັງຄົມໃຫ້ການຕອບຮັບຫຼາຍຂຶ້ນນັບມື້. ດັ່ງນັ້ນ, ຈິ່ງໄດ້ເປີດນໍາໃຊ້ລານຂົນສົ່ງສິນຄ້າຢູ່ສະຖານີວັງວຽງ ເພີ່ມຂຶ້ນເປັນ 3 ຈຸດ.

ສະຖານີວັງວຽງ ຕັ້ງຢູ່ແຄມທາງຫຼວງເລກ 13 ຂອງເມືອງວັງວຽງ, ແຂວງວຽງຈັນ. ສຳລັບລານສິນຄ້າແຫ່ງນີ້, ຕົ້ນຕໍແມ່ນດຳເນີນທຸລະກຳສິນຄ້າຂາເຂົ້າ-ຂາອອກ, ມີເສັ້ນທາງຂົນສົ່ງສິນຄ້າ 2 ເສັ້ນທາງ, ຊຶ່ງເສັ້ນທາງທີ 1 ສາມາດເຮັດວຽກເທື່ອໜຶ່ງໄດ້ 18 ຕູ້ສິນຄ້າ, ເສັ້ນທາງທີ 2 ສາມາດເຮັດວຽກເທື່ອໜຶ່ງໄດ້ 11 ຕູ້ສິນຄ້າ. ສະເພາະລານສະຖານີວັງວຽງທັງໝົດ, ສາມາດບັນຈຸຕູ້ຄອນເທນເນີຣ໌ໄດ້ 420 ຕູ້.

ສໍາລັບການຂົນສົ່ງສິນຄ້າ ຊຶ່ງກ່ອນຈະດໍາເນີນທຸລະການ, ເຈົ້າຂອງສິນຄ້າຕ້ອງເຊັນ “ສັນຍາການຈ່າຍຄ່າຂົນສົ່ງທາງລົດໄຟລ່ວງໜ້າ”, “ສັນຍາຄວາມປອດໄພການຂົນສົ່ງຕູ້ສິນຄ້າ” ແລະ“ສັນຍານຳໃຊ້ຕູ້ສິນຄ້າເຂົ້າ-ອອກສະຖານີສິນຄ້າ” ກັບບໍລິສັດທາງລົດໄຟລາວ-ຈີນ ແລະ ຕ້ອງໂອນເງິນມັດຈຳ ທັງຈ່າຍເງິນລ່ວງໜ້າເຂົ້າບັນຊີທີ່ກຳນົດໄວ້, ຫຼັງຈາກໄດ້ຮັບເງິນມັດຈໍາ ແລະ ເງິນລ່ວງໜ້າທີ່ຈ່າຍໃຫ້ແລ້ວ, ທ່ານກໍສາມາດໄປທີ່ສະຖານີຂົນສົ່ງສິນຄ້າເພື່ອຮັບຕູ້ສິນຄ້າ, ຫຼັງຈາກທີ່ຕູ້ສິນຄ້າບັນທຸກສິນຄ້າຮຽບຮ້ອຍແລ້ວ ແລະ ໄດ້ສຳເລັດການແລ່ນຂັ້ນຕອນຜ່ານດ່ານພາສີແລ້ວ, ກໍສາມາດສົ່ງອອກໄດ້.

ລາຍງານຂອງຜູ້ຮັບຜິດຊອບພະແນກດຳເນີນການຂອງບໍລິສັດທາງລົດໄຟລາວ-ຈີນ, ເມື່ອວັນທີ 13 ມັງກອນ 2022 ໃຫ້ຮູ້ວ່າ: ນັບແຕ່ໄດ້ເປີດໃຫ້ບໍລິການລົດໄຟລາວ-ຈີນເປັນຕົ້ນມາ, ລາຍການຂົນສົ່ງສິນຄ້າຂອງທາງລົດໄຟລາວ-ຈີນແມ່ນມີຈຳນວນຫຼວງຫຼາຍ, ສິນຄ້າທີ່ສົ່ງໄປຈີນຕົ້ນຕໍແມ່ນຢາງພາລາ, ເຂົ້າ, ຖ່ານ, ແຮ່ເຫຼັກ ແລະ ອື່ນໆ. ສ່ວນສິນຄ້າທີ່ສົ່ງມາລາວຕົ້ນຕໍແມ່ນ ປຸ໋ຍ, ຜະລິດຕະພັນກົນຈັກໄຟຟ້າ ແລະ ອື່ນໆ, ນອກນັ້ນ ຍັງມີສິນຄ້າເຢັນທີ່ຂົນສົ່ງໄປປະເທດໄທ.

ມາຮອດວັນທີ 12 ມັງກອນປີ 2022, ປະລິມານການຂົນສົ່ງສິນຄ້າຂອງທາງລົດໄຟລາວ-ຈີນ ໄດ້ບັນລຸ 60 ພັນໂຕນ. ໂດຍບໍລິສັດທາງລົດໄຟລາວ-ຈີນ ຈະສືບຕໍ່ໃຫ້ບໍລິການທີ່ດີຍິ່ງໆຂຶ້ນ, ຊຶ່ງເປັນການປະກອບສ່ວນສໍາຄັນໃນການຊຸກຍູ້ການສົ່ງອອກສິນຄ້າຄຸນນະພາບສູງ ແລະ ສົ່ງເສີມການພັດທະນາເສດຖະກິດຂອງ ສປປ ລາວ.

ຂອບໃຈຂໍ້ມູນ: ບໍລິສັດທາງລົດໄຟລາວ-ຈີນ

แชร์