ອິນເດຍ ຕິດໂຄວິດເກີນ 2,7 ແສນຄົນ ໃນວັນດຽວ

ຕົວເລກຕິດເຊື້ອໂຄວິດ-19 ໃນປະເທດອິນເດຍ ພຸ່ງເກີນ 270.000 ຄົນ, ຊຶ່ງສະພາບລະບາດດັ່ງກ່າວ ,ເກີດຂຶ້ນທ່າມກາງຄວາມກັງວົນຕໍ່ພິທີອາບນ້ຳສັກສິດຢູ່ແມ່ນ້ຳຄົງຄາໃນປີນີ້, ຊຶ່ງອາດຈະກາຍເປັນຈຸດລະບາດຂະໜາດໃຫຍ່ອີກຄັ້ງ.

            ສຳນັກຂ່າວຕ່າງປະເທດ, ໄດ້ເປີດເຜີຍໃນວັນທີ 16 ມັງກອນ 2022 ວ່າ: ກະຊວງສາທາລະນະສຸກອິນເດຍ, ໄດ້ລາຍງານກ່ຽວກັບສະຖິຕິຜູ້ປ່ວຍພະຍາດໂຄວິດ-19. ສະສົມຫຼາຍກວ່າ 37,12 ລ້ານຄົນ, ຊຶ່ງເພີ່ມຂຶ້ນ 271.202 ຄົນ, ຄິດເປັນ 28,17% ເມື່ອທຽບກັບສະຖິຕິໃນຮອບວັນກ່ອນໜ້ານີ້ ແລະ ເປັນສະຖິຕິສູງສຸດໃນຮອບ 8 ເດືອນ. ຂະນະທີ່ສະຖິຕິຜູ້ເສຍຊີວິດ, ສະສົມຢ່າງໜ້ອຍ 486.066 ລາຍ ເພີ່ມຂຶ້ນ 314 ລາຍ.

            ຢ່າງໃດກໍຕາມ, ປະຊາກອນຈຳນວນຫຼວງຫຼາຍກໍຍັງຄົງຫຼັ່ງໄຫຼໄປເຂົ້າຮ່ວມພິທີ “ມະກອນສັງກຣານຕິ” ຊຶ່ງຈັດຂຶ້ນໃນໄລຍະກາງເດືອນມັງກອນ, ເພື່ອເປັນການບູຊາພຣະສຸຣະຍະປະຕິທິນຮິນດູ. ເຖິງວ່າໃນປີນີ້, ລັດຖະບານອິນເດຍ ຈະໃຊ້ການບິນອະວະກາດຍານໄຮ້ຄົນຂັບ ຫຼື ໂດຣນ ເພື່ອສີດພົ່ນນ້ຳສັກສິດຈາກແມ່ນ້ຳຄົງຄາ, ແຕ່ກໍຍັງມີປະຊາກອນຈຳນວນຫຼວງຫຼາຍ ພາກັນແຫ່ແຫນລົງໄປອາບນ້ຳໃນແມ່ນ້ຳຄົງຄາ ໂດຍບໍ່ສົນຄຳເຕືອນຂອງໜ່ວຍງານດ້ານສາທາລະນະສຸກແຕ່ຢ່າງໃດ. ຊຶ່ງໃນພິທີແບບດຽວກັນນີ້ເມື່ອປີຜ່ານມາ, ທີ່ເປັນໄລຍະເຊື້ອໂຄວິດ-19 ສາຍພັນເດລຕາກໍາລັງແພ່ລະບາດຢ່າງໜັກຈົນກາຍເປັນສູນກາງການລະບາດຂະໜາດໃຫຍ່, ສົ່ງຜົນໃຫ້ຈຳນວນຜູ້ຕິດເຊື້ອໃນອິນເດຍພຸ່ງສູງຂຶ້ນຢ່າງຕໍ່ເນື່ອງເປັນເວລາຫຼາຍເດືອນ.

แชร์