ລາວ ສູນເສຍພື້ນທີ່ປູກກາເຟ

ສປປ ລາວ ກຳລັງສູນເສຍພື້ນທີ່ປູກກາເຟ, ເນື່ອງຈາກຊາວກະສິກຳກໍຫັນໄປຜະລິດພືດຊະນິດອື່ນເຊັ່ນ ມັນຕົ້ນ ແລະ ຢາງພາລາ, ເພາະວ່າໄລຍະເວລາໃນການປູກ ແລະ ເກັບກູ້ຜົນຜະລິດໄວກວ່າ.

ໂດຍທ່ານ ສີສະໜຸກ ສີສົມບັດ ປະທານທີ່ປຶກສາສະມາຄົມກາເຟລາວ ໄດ້ເປີດເຜີຍຕໍ່ສື່ເມື່ອວັນທີ 14 ມັງກອນ 2022 ທີ່ນະຄອນຫຼວງວຽງຈັນ ວ່າ: ໃນປີຜ່ານມາ ການສົ່ງອອກກາເຟລາວ ມີປະລິມານ 30 ພັນໂຕນ, ມາໃນປີ 2022 ປະລິມານການສົ່ງອອກກາເຟລາວ ຄາດວ່າຈະຫຼຸດລົງເຫຼືອ 20 ພັນໂຕນ. ເນື່ອງຈາກຕະຫຼາດກາເຟທົ່ວໂລກ ມີການປ່ຽນແປງຫຼາຍ, ຜົນຜະລິດຂອງກາເຟລາວກໍຫຼຸດລົງ, ເນື້ອທີ່ປູກກາເຟກໍໜ້ອຍລົງ. ຊຶ່ງຜູ້ປູກກາເຟເອງກໍຫັນໄປປູກພືດຊະນິດອື່ນທົດແທນ ເປັນຕົ້ນແມ່ນ ມັນຕົ້ນ ແລະ ຢາງພາລາ, ທັງນີ້ ປັດໄຈດ້ານການປູກກໍເປັນໜຶ່ງໃນສາເຫດທີ່ເຮັດໃຫ້ການຜະລິດການເຟໃນ ສປປ ລາວ ຫຼຸດລົງ.

ເຖິງແມ່ນການປູກກາເຟລາວຈະມີທ່າອຽງຫຼຸດລົງ, ແຕ່ຄວາມຕ້ອງການກາເຟໃນສັງຄົມກໍຍັງເພີ່ມຂຶ້ນ. ຕໍ່ກັບບັນຫາດັ່ງກ່າວ, ທາງສະມາຄົມກາເຟລາວ ກໍບໍ່ໄດ້ນິ້ງນອນໃຈໃນການຊຸກຍູ້ສົ່ງເສີມຂະບວນການຜະລິດ, ໂດຍສະເພາະແມ່ນໄດ້ຈັດຕັ້ງບຸນມະໂຫລານກາເຟຂຶ້ນທີ່ນະຄອນປາກເຊ ແຂວງຈຳປາສັກ ທີ່ເປັນເຂດຜະລິດກາເຟຂອງປະເທດ, ເພື່ອໂຄສະນາໃຫ້ສັງຄົມໄດ້ຮັບຮູ້ເຖິງຄຸນນະພາບຂອງກາເຟລາວ, ທັງເປັນການສົ່ງເສີມຊາວກະສິກໍາໃຫ້ຫັນມາປູກກາເຟຫຼາຍຂຶ້ນ, ໂດຍໄດ້ເຊີນແຂກຕ່າງປະເທດທັງພາຍໃນ, ພາກພື້ນ ແລະ ສາກົນເຂົ້າຮ່ວມ. ອີກທັງໄດ້ຈັດບຸນມະໂຫລານກາເຟ ຄັ້ງທີ 2 ຢູ່ ນະຄອນຫຼວງວຽງຈັນ, ຊຶ່ງເປັນເຂດທີ່ມີຄວາມນິຍົມຊົມໃຊ້ກາເຟ ແລະ ຄັ້ງທີ 3 ຈັດຂຶ້ນທີ່ນະຄອນປາກເຊ, ແຕ່ເນື່ອງຈາກສະພາບການລະບາດຂອງພະຍາດໂຄວິດ-19 ຈິ່ງບໍ່ໄດ້ຮັບຜົນດີເທົ່າທີ່ຄວນ.

ທັງນີ້ ປະທານທີ່ປຶກສາສະມາຄົມກາເຟລາວ, ໃຫ້ຮູ້ຕື່ມວ່າ: ໃນ 10 ປີທີ່ຜ່ານມາ ລາຄາກາເຟແມ່ນຕົກຕ່ຳລົງຫຼາຍ, ຈິ່ງເຮັດໃຫ້ຊາວສວນຜູ້ປູກກາເຟຫັນໄປປູກພືດຊະນິດອື່ນ ເພາະໃຊ້ເວລາສັ້ນໃນການເກັບຜົນຜະລິດ.

ຢ່າງໃດກໍດີ, ການຜະລິດກາເຟເປັນສິນຄ້າ ແມ່ນຕິດພັນກັບ 4 ອາຊີບຕົ້ນຕໍຄື: 1) ຊາວສວນຜູ້ປູກກາເຟ, 2) ຜູ້ຮັບຊື້ກາເຟຈາກຊາວສວນເຂົ້າໂຮງງານ ໂດຍມີການປັບຄຸນນະພາບເພື່ອສົ່ງອອກເປັນສິນຄ້າ ຫຼື ຂາຍພາຍໃນປະເທດ, 3) ຜູ້ຜະລິດປຸງແຕ່ງກາເຟໂດຍຜ່ານການຂົ້ວເພື່ອໃຫ້ກາຍເປັນອຸດສາຫະກໍາ ແລະ 4) ແມ່ນຜູ້ຂາຍກາເຟ ແລະ ແຮງງານພາກບໍລິການໃນຮ້ານຕ່າງໆ.

แชร์